ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីបិទវគ្គបណ្តុះបណ្តាលភាពយន្តខ្នាតខ្លីកម្ពុជា កាលពីចុងសប្តាហ៍កន្លងទៅនេះ ឯកឧត្តម ស៊ីយ៉ុន សុភារិទ្ធ អគ្គនាយកបច្ចេកទេសវប្បធម៌ លើកឡើងថា វគ្គបណ្តុះបណ្តាលភាពយន្តខ្លីកម្ពុជា បានផ្តល់ឱកាស និងចំណេះដឹងជាមូលដ្នានលើជំនាញបច្ចេកទេសនៃការផលិតភាពយន្ត ជូនដល់យុវជនរបស់យើង ហើយសកម្មភាពនេះ បានរួមចំណែកយ៉ាងសំខាន់ក្នុងការអនុវត្តគោលនយោបាយយុទ្ធសាស្រ្តបញ្ចកោណរបស់រាជរដ្ឋាភិបាលនីតិកាលទី៧នៃរដ្ឋសភា ពិសេសជួយជំរុញលើកស្ទួយឧស្សាហកម្មវប្បធម៌ និងច្នៃប្រតិដ្ឋ។
វគ្គបណ្តុះបណ្តាលភាពយន្តខ្លីកម្ពុជា (Cambodia Film Lap 2023) រៀបចំដោយនាយកដ្ឋានសិល្បភាពយន្តនិងផ្សព្វផ្សាយវប្បធម៌នៃ ក្រសួងវប្បធម៌ និងវិចិត្រសិល្បៈ សហការជាមួយមជ្ឈមណ្ឌលបណ្តុះបណ្តាលជំនាញ និងទទួលការថតភាពយន្ត, Cine-Hub និង Cine-Studio ដោយបានធ្វើការបណ្តុះបណ្តាលជា ៣ដំណាក់កាល ក្នុងនោះ ការសិក្សាអនឡាញលើទ្រឹស្តី និងការរៀបចំអត្ថបទនិពន្ធ ការសិក្សាបច្ចេកទេស និងអនុវត្តផ្ទាល់ និងការចុះផលិតស្នាដៃភាពយន្តរបស់សិក្ខាកាម ក្រោមការជួយបង្ហាត់បង្រៀន ណែនាំដោយលោកគ្រូ អ្នកគ្រូចំនួន១១រូប ក្នុងរយ:ពេល០២ខែ។
សម្រាប់លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ មានប្រសាសន៍ថា ភាពយន្តខ្នាតខ្លី គឺជាជំហានឆ្ពោះទៅរកខ្សែភាពយន្តខ្នាតវែង។ ក្នុងជំនាន់ទី១ ដែលបានបណ្ដុះបណ្ដាលកាលពីឆ្នាំ២០១៦ មានសិក្ខាកាមរបស់យើង ក្លាយជាផលិតករខ្នាតវែងរួចទៅហើយ ហើយកើតឡើងដោយមានសមត្ថភាពខ្លាំង។
លោក បូរក្ស បន្តថា នាយកដ្ឋានភាពយន្ត មានកម្លាំងនិងឆន្ទៈ រៀបចំវគ្គបណ្ដុះបណ្ដាលកាន់តែច្រើនទៀត នៅឆ្នាំបន្តបន្ទាប់ ពេលឃើញសិក្ខាកាម ប្រឹងប្រែងរៀនសូត្រ និងយកចំណេះទាំងនោះ ទៅអភិវឌ្ឍន៍វិស័យភាពយន្តនៅកម្ពុជា ឱ្យកាន់តែប្រសើរឡើង។ លោកថា ការធ្វើឱ្យវិស័យមួយមានភាពរីកចម្រើនបាន ចំណុចសំខាន់ គឺការអប់រំមនុស្ស ប្រសិនមិនមានធនធានមនុស្ស និងមិនមានការបណ្ដុះបណ្ដាលទេ នោះនឹងមិនអាចជំរុញការផលិត ឱ្យមានកម្រិតឈានឡើង ជានិរន្តរភាពឡើយ។
គួរជំរាបជូនថា វគ្គបណ្ដុះបណ្ដាលភាពយន្តខ្នាតខ្លីកម្ពុជា បានបង្កើតជាលើកដំបូងក្នុងឆ្នាំ២០១៦ ហើយគិតមកដល់ឆ្នាំ២០២៣នេះ បានបណ្ដុះបណ្ដាលសិក្ខាកាមចំនួន៦ជំនាន់ ដោយខកខាននៅឆ្នាំ២០២០ និងឆ្នាំ២០២១៕
