សាកលវិទ្យាល័យអន្តរជាតិ ផារ៉ាហ្គនប្រកាសផ្តល់អាហារូបករណ៍ដល់និស្សិតកម្ពុជាដែលត្រឡប់មកពីប្រទេសថៃវិញ ដោយសារវិបត្តិជម្លោះព្រំដែនកម្ពុជា-ថៃ ដែលមានបំណងបន្តការសិក្សានៅកម្ពុជា ហើយជ្រើសរើសយកសាកលវិទ្យាល័យអន្តរជាតិមួយនេះ ដែលអាចផ្តល់ជូនចន្លោះពី ៥០% ដល់ ១០០%។

លោកបណ្ឌិតប៊ូឡាត់ អាក់មែដខារីម៉ូវ(Bulat Akhmetkarimov) សាកលវិទ្យាធិការនៃសាកលវិទ្យាល័យអន្តរជាតិ ផារ៉ាហ្គន បានគូសបញ្ជាក់ថា នេះជាកម្មវិធីរួមចំណែកផ្តល់ឱកាសដល់ និស្សិតកម្ពុជាដែលត្រឡប់ពីប្រទេសថៃអាចបន្តការសិក្សារបស់ខ្លួននៅសាកលវិទ្យាល័យក្នុងស្រុក ជាពិសេសអ្នកដែលចង់មកសិក្សានៅសាកវិទ្យាល័យអន្តរជាតិ ផារ៉ាហ្គន ដែលសាលានឹងផ្តល់ជូនទៅតាមលក្ខណៈសម្បត្តិរបស់និស្សិត។

លោកសង្កត់ធ្ងន់ថា “នេះជាគំនិតផ្តួចផ្តើមដែលស្របនឹងឆន្ទៈរបស់រដ្ឋាភិបាល ដើម្បីផ្តល់លទ្ធភាពលើការបណ្តុះធនធានមនុស្សដែលមានទេពកោសល្យនៅក្នុងស្រុក ព្រមទាំងជាស្មារតីជួយយកអាសារគ្នា ក្នុងគ្រាលំបាក។ ខ្ញុំសង្ឃឹមថា និស្សិតដែលត្រឡប់ពីប្រទេសថៃវិញ នឹងទទួលបានផ្លែផ្កាជាវិជ្ជមាននៅក្នុងការផ្តល់ជូននេះ ដែលនឹងអាចចូលរួមចំណែកអភិវឌ្ឍន៍ប្រទេសកម្ពុជា”។

លោកបណ្ឌិតបន្ថែមថា សាកលវិទ្យាល័យអន្តរជាតិ ផារ៉ាហ្គន ប្តេជ្ញាចិត្តក្នុងការផ្តល់គុណភាពអប់រំមួយដែលប្រកបដោយស្តង់ដារខ្ពស់នៅក្នុងស្រុក ខណៈសាកលវិទ្យាល័យក៏បានទទួលស្គាល់គុណភាពអប់រំក្នុងតំបន់ពីស្ថាប័ន AUN របស់អាស៊ានផងដែរ ហើយជាងនេះទៅទៀត នាពេលថ្មីៗនេះ ផារ៉ាហ្គន បានសហការជាមួយអាជ្ញាធរគុណភាពអប់រំប្រទេសស្កុតលេន SQA ដែលជាស្ថាប័នកម្រិតពិភពលោកផងដែរ។

បណ្តានិស្សិតដែលទើបត្រឡប់មកពីប្រទេសថៃវិញ ហើយមានបំណងចង់បន្តការសិក្សានៅសាកលវិទ្យាល័យអន្តរជាតិ ផារ៉ាហ្គន ត្រូវមានសមត្ថភាពភាសាអង់គ្លេសស្របតាមលក្ខខណ្ឌរបស់សាកលវិទ្យាល័យបានកំណត់ និងត្រូវបំពេញបែបបទតាមប្រព័ន្ធអនឡាញ ដោយភ្ជាប់ជាមួយឯកសារដែលចាំបាច់ និងប្រតិបត្តិពិន្ទុរបស់ខ្លូនពីសាកលវិទ្យាល័យនៅប្រទេសថៃដែលខ្លួនសិក្សា និងសញ្ញាបត្រមធ្យមសិក្សាទុតិយភូមិ តាមរយៈតំណភ្ជាប់ https://forms.gle/TygYgNXf5nyb1pmSA ឱ្យបានមុនថ្ងៃទី៣១ ខែសីហា ឆ្នាំ២០២៥។

គួរបញ្ជាក់ថា សាកលវិទ្យាល័យអន្តរជាតិ ផារ៉ាហ្គន មានការបណ្តុះបណ្តាលលើ ១២មុខជំនាញ ក្នុងកម្រិតបរិញ្ញាបត្រ ដែលមានមហាវិទ្យាល័យចំនួន៤ ក្នុងនោះមានមហាវិទ្យាល័យវិស្វកម្មដែលមានមុខជំនាញដូចជា ស្ថាបត្យកម្ម, វិស្វកម្មឧស្សាហកម្ម និងវិស្វកម្មសំណង់ស៊ីវិល។ មហាវិទ្យាល័យព័ត៌មាន និងបច្ចេកវិទ្យាកុំព្យូទ័រ រួមមាន ជំនាញវិទ្យាសាស្ត្រកុំព្យូទ័រ, រចនាប្លង់ និងប្រព័ន្ធផ្សព្វផ្សាយ និងគ្រប់គ្រងប្រព័ន្ធព័ត៌មាន។ មហាវិទ្យាល័យវិទ្យាសាស្ត្រសង្គម និងសេដ្ឋកិច្ច រួមមាន ជំនាញធនាគារ និងហិរញ្ញវត្ថុ, គ្រប់គ្រងពាណិជ្ជកម្ម, សេដ្ឋកិច្ច, ទំនាក់ទំនងអន្តរជាតិ ព្រមទាំង ភ័ស្តុភារ និងពាណិជ្ជកម្មអន្តរជាតិ។ មហាវិទ្យាល័យគណិតវិទ្យា និងវិទ្យាសាស្ត្រ មាន មុខជំនាញគណិតវិទ្យា៕