ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ឆ្លើយតបទៅនឹងកង្វល់ចំពោះអនាគតប្រជាជនកម្ពុជា ដែលមនុស្សវ័យចំណាស់នឹងមានចំនួនកើនឡើងច្រើនជាងមនុស្សវ័យក្មេង ដូចស្ថានភាពនៅប្រទេសជប៉ុនបច្ចុប្បន្ន សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញឱ្យមានការពង្រឹងទំនៀមទម្លាប់វប្បធម៌ប្រពៃណីជាតិរបស់កម្ពុជា។
ការជំរុញនេះ បានធ្វើឡើងនៅក្នុងឱកាសសម្តេចអញ្ជើញសម្ពោធដាក់ឱ្យប្រើប្រាស់ជាផ្លូវការអាគារថ្មី នៃបណ្ឌិត្យសភាភូមិន្ទយុត្តិធម៌កម្ពុជា និងប្រគល់សញ្ញាបត្រជូនដល់សិស្សចៅក្រម សិស្សក្រឡាបញ្ជី សិស្សអាជ្ញាសាលា និងសិស្សសាករី ដែលបញ្ចប់ការសិក្សានៅបណ្ឌិត្យសភាភូមិន្ទយុត្តិធម៌កម្ពុជា នាព្រឹកថ្ងៃទី៦ ខែមិថុនា ឆ្នាំ២០២៣។
សម្តេចតេជោមានប្រសាសន៍ថា ក្នុងជំនួបជាមួយដៃគូអភិវឌ្ឍ ពួកគេបានលើកឡើងអំពីកង្វល់ចំពោះអនាគតប្រជាជនកម្ពុជា ដែលមនុស្សមានវ័យចាស់នឹងកើន ដែលស្ថានភាពនេះ បានកើតឡើងនៅប្រទេសជប៉ុនរួចស្រេចទៅហើយ ។ សម្តេចបន្តថា ថ្ងៃក្រោយប្រទេសកម្ពុជានឹងឈានដល់ចំណុចនេះដែរ តែទំរាំឈានដល់វានៅវែងឆ្ងាយ យ៉ាងណាប្រសិនបើករណីនេះវាបានកើត កម្ពុជាគួរពង្រឹងនូវទំនៀមទម្លាប់វប្បធម៌ប្រពៃណីជាតិរបស់ខ្លួន។
អ្វីទៅដែលហៅថា ទំនៀមទម្លាប់វប្បធម៌ប្រពៃណីជាតិរបស់កម្ពុជា ?
សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា នៅអឺរ៉ុប កូនចៅយកឪពុកម្តាយ ឬមនុស្សចាស់ទៅដាក់នៅកន្លែងថែទាំងមនុស្សចាស់ ប៉ុន្តែសម្រាប់ជនជាតិខ្មែរយើង ត្រូវពង្រឹងនូវទំនៀមទម្លាប់ប្រពៃណី ការគោរពចាស់ទុំ ដែលព្រះសង្ឃ ក៏ដូចជាច្បាប់ក្រមង៉ុយតែងតែដាស់តឿនថា «កុំភ្លេចព្រះនៅក្នុងផ្ទះ»។
សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
” អញ្ចឹងទេជាផ្នែកមួយនៃការដោះស្រាយបញ្ហាសង្គមនៅពេលអនាគត ដែលត្រូវពង្រឹងនូវគុណធម៌សម្រាប់កូនចៅ ត្រូវមើលថែទាំឪពុកម្តាយ ជីដូនជីតាចាស់ៗ…”
គួរបញ្ជាក់ថា វប្បធម៌ប្រពៃណីខ្មែរបានឱ្យតម្លៃខ្ពស់ទៅលើការគោរព និងមើលថែទាំមនុស្សវ័យចាស់ ។ ដោយឡែកបើយោងតាមរបាយការណ៍របស់ក្រសួងផែនការ ប្រជាជនវ័យចាស់នៅកម្ពុជាដែលមានអាយុ៦០ឆ្នាំឡើង បច្ចុប្បន្នបានកើនឡើងយ៉ាងលឿនក្នុងរយៈពេលចុងក្រោយនេះ ដោយក្នុងនោះ កាលពីឆ្នាំ១៩៩៨ មនុស្សវ័យចាស់នៅកម្ពុជាមានចំនួន ៥ភាគរយនៃប្រជាជនសរុប, នៅឆ្នាំ២០០៨ បានកើនដល់៦ភាគរយ, ហើយនៅឆ្នាំ២០១៨ បានកើនដល់ ៧,៦ភាគរយ និងឈានទៅ ៩,៣ភាគរយនៅឆ្នាំ២០២៣ ។ ជាមួយគ្នានេះ គេក៏បានព្យាករណ៍ថា អត្រាកំណើននឹងកើនដល់ ១១,៥ភាគរយ នៅឆ្នាំ២០៣០ ។ គេក៏បានរកឃើញដែរថា កត្តាដែលបង្កឱ្យមានកំណើនប្រជាជនវ័យចាស់នេះ គឺដោយសារការថយចុះអត្រាមានកូន និងភាពប្រសើរឡើង នៃអាយុកាលសង្ឃឹមរស់។
របាយការណ៍ពន្យល់ថា ការថយចុះអត្រាលទ្ធភាពមានកូន ធ្វើឱ្យមានការថយចុះចំនួនកុមារដែលបានកើត ហើយជាលទ្ធផលក៏ធ្វើឱ្យអត្រាកំណើនប្រជាជនជាកុមារមានការថយចុះផងដែរ។ អាយុកាលសង្ឃឹមរស់ មានភាពប្រសើរឡើង មានន័យថា មនុស្សអាចរស់បានអាយុកាន់តែវែង ហើយការកើនឡើងនៃសមាមាត្រប្រជាជនដែលអាចរស់នៅរហូតដល់វ័យចាស់ និងបន្តរស់នៅក្នុងរយៈពេលកាន់តែវែងជាងមុនក្រោយពីបានឈានដល់អាយុ៦០ឆ្នាំហើយ ។ ហេតុនេះ ប្រជាជនវ័យចាសនឹងកើនឡើងក្នុងអត្រាលឿនជាងប្រជាជនវ័យក្មេង៕
