ភ្នំពេញ – លើក​ឡើង​នៅ​ក្នុង​ពិធីជួបសំណេះសំណាល​ជាមួយ​បងប្អូន​កម្មករ កម្មការិនី ជិត​២ម៉ឺននាក់​នៅ​តំបន់ព្រៃស្ពឺ ក្នុងខណ្ឌពោធិ៍សែនជ័យ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា បានបញ្ជាក់ថា បច្ចុប្បន្ននេះ កម្ពុជា​មាន​តម្រូវការ​កម្លាំង​ពលកម្ម​ក្នុង​១ឆ្នាំ​ប្រមាណជាង​៣០ម៉ឺននាក់។

តាមប្រសាសន៍របស់សម្តេចតេជោ បច្ចុប្បន្ន​សេដ្ឋកិច្ចវិស័យ​ឧស្សាហកម្ម​មានការ​កើន​ឡើង​ខ្ពស់​រហូត​ដល់ទៅ​៣៨ភាគរយ ។ តែយ៉ាងណាជាមួយ​គ្នានេះ រាជរដ្ឋាភិបាល​កំពុង​បន្ត​ខិតខំ​ធ្វើ​ការ​កសាង​ហេដ្ឋារចនាសម្ព័ន្ធ​ទាំងផ្នែក​រឹង និង​ទន់ ដើម្បីបម្រើ​ដល់​ការ​ទាក់ទាញ​វិនិយោគមក​កាន់ប្រទេស​កម្ពុជា ដោយ​ក្នុងនោះ​ហេដ្ឋា​រចនាសម្ព័ន្ធផ្នែករឹង រួមមានផ្លូវ កំពង់ផែ ព្រលានយន្តហោះ អគ្គិសនី និង​អ្វីៗជាច្រើនទៀតដើម្បីផ្គត់ផ្គង់សម្រាប់ទាក់ទាញវិនិយោគ ឯហេដ្ឋារចនាសម្ព័ន្ធទន់ រួម​មាន ផ្នែកច្បាប់ លិខិតបទដ្ឋានគតិយុត្តិ ជាមួយ​នឹង​ការ​បណ្តុះបណ្តាលធនធាន​មនុស្សសម្រាប់ជំនាញ។

សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា

“បើយើងនិយាយដូចជាជប៉ុនជាដើម ពេល​មកស្រុកយើង​គាត់សួរតែ២ចំណុចទេសំខាន់ ទី១ គាត់សួរធនធាន​មនុស្ស តើ​មានលទ្ធភាពផ្គត់ផ្គង់ពលកម្មជំនាញ​ឱ្យ​គាត់ដែរ ឬក៏អត់? ដល់សំណួរទី២ តម្លៃអគ្គិសនី…”

សម្តេចតេជោ ហ៊ុន សែន សង្កត់ធ្ងន់ថា ​ចាប់ពីខែក្រោយ​នេះទៅ កម្ពុជា​នឹង​ចាប់ផ្តើម​ធ្វើការ​បណ្តុះបណ្តាល​ជំនាញ​សម្រាប់ពលរដ្ឋ១លាន៥សែននាក់ ក្នុងរយៈ​ពេល​៥ឆ្នាំ ជាមួយ​នឹងការដោះស្រាយ​ការងារ ដែលមានទំហំប៉ុនគ្នានេះដែរ។

គួរ​បញ្ជាក់ដែរថា កាលពីដើមឆ្នាំនេះ ក្រសួងការងារ និង​បណ្តុះបណ្តាលវិជ្ជាជីវៈ បាន​រៀបចំ​ផែនការបណ្តុះបណ្តាល​ជំនាញវិជ្ជាជីវៈ​ដល់​យុវជន​១លាន​៥សែននាក់ ដែល​មក​ពី​គ្រួសារក្រីក្រ និង​គ្រួសារងាយរងគ្រោះ​នៅ​ទូទាំង​ប្រទេស​កម្ពុជា​ចាប់ពី​ឆ្នាំ២០២៣នេះ​ទៅ ដោយ​រដ្ឋ​ជាអ្នក​ឧបត្ថម្ភប្រាក់​ដល់​ពួកគេ។ ការរៀបចំបណ្តុះបណ្តាលជំនាញវិជ្ជាជីវៈដល់យុវជន១លាន៥សែកនាក់នេះ ត្រូវ​បានប្រមុខរាជរដ្ឋាភិបាលបញ្ជាក់ថា គឺដើម្បីឱ្យកម្ពុជាមានធនធានមនុស្ស ក្នុងការបម្រើសេចក្តីត្រូវការ និងការវិនិយោគ ដែលមកពីក្រៅប្រទេស៕