ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសំណេះសំណាលជាមួយសិស្សនិទ្ទេស A នាព្រឹកថ្ងៃទី១០ ខែកុម្ភៈ ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងថា អនាគតរបស់ប្រទេសជាតិ គឺផ្សារភ្ជាប់ជាមួយនឹងអនាគតរបស់យុវជនយើង ព្រោះបើយុវជនយើងមានចំណេះដឹង មានសុខភាពល្អ ហើយការរៀនភ្ជាប់ជាមួយនឹងតម្រូវការរបស់សង្គម នោះពួកគេអាចកសាងនូវអនាគត ដែលនេះគឺជាការចូលរួមសំខាន់នៅក្នុងការអភិវឌ្ឍប្រទេសជាតិ។
ដើម្បីជួយយុវជនរៀនឱ្យស្របទៅនឹងតម្រូវការរបស់សង្គម សម្តេចនាយករដ្ឋមន្រ្តីបានលើកឡើងថា រាជរដ្ឋាភិបាលបានគិតគូរតាំងពីដើមអាណត្តិ ក្នុងការត្រៀមលក្ខណៈបណ្តុះបណ្តាលយុវជនឱ្យស្របទៅតាមតម្រូវការ នៃការវិវត្តរបស់ប្រទេស ដោយក្រសួងអប់រំ និងក្រសួងការងារ បានសហការគ្នារៀបចំជាគន្លងនៃការរៀនសូត្រ ក៏ដូចជាតម្រង់ទិសអាជីពទៅថ្ងៃអនាគត ចាប់ពីថ្នាក់ទី១០ឡើងទៅ។
សម្តេចនាយករដ្ឋមន្រ្តីសង្កត់ធ្ងន់ថា កិច្ចការងារនេះ គឺដើម្បីធានានូវប្រសិទ្ធភាព នៃការបង្កើនចំណេះដឹងឱ្យស្របទៅតាមតម្រូវការការងារ ក៏ដូចជាគន្លងនៃអាជីព ឬចំណង់ចំណូលចិត្តរបស់យុវជនយើង ដែលវាក៏កំពុងអនុវត្តនៅបណ្តាប្រទេសអភិវឌ្ឍជាច្រើន ដូចជាប្រទេសសឹង្ហបុរី និងអាល្លឺម៉ង់ ជាដើម។
“នេះគឺជាការគិតគូរ ព្រោះអនាគតរបស់ប្រទេសជាតិ ភ្ជាប់ជាមួយនឹងអនាគតយុវជន ប្រជាជនយើង”
បើតាមប្រសាសន៍សម្តេចនាយករដ្ឋមន្រ្តី ការតម្រង់ទិសយុវជនពីថ្នាក់ទី៩ ឱ្យស្គាល់នូវអាជីព គឺជាកិច្ចការដែលត្រូវធ្វើ ដើម្បីពួកគេទទួលបាននូវព័ត៌មានត្រឹមត្រូវក្នុងការសម្រេចចិត្តជ្រើសរើសអាជីពទៅថ្ងៃអនាគតរបស់ពួកគេ។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ដោយអនុវត្តតាមអនុសាសន៍របស់សម្តេចនាយករដ្ឋមន្រ្តី នៅក្នុងឆ្នាំនេះ ក្រសួងអប់រំបានដាក់ឱ្យអនុវត្តសាកល្បងនូវគន្លងអាជីពថ្មី ដែលជាគន្លងវិជ្ជាជីវៈ ដោយបច្ចុប្បន្នមានវិទ្យាល័យចំនួន ៤៦កំពុងអនុវត្ត។
ក្នុងចំណោមវិទ្យាល័យចំនួន ៤៦នោះ មានវិទ្យាល័យចំនួន១៣ កំពុងតែធ្វើការបណ្តុះបណ្តាលលើមុខជំនាញចំនួន ១៣ ដូចជា អគ្គិសនី អេឡិចត្រូនិច មេកានិច មេកាត្រូនិច ព័ត៌មានវិទ្យា បសុសត្វ ក្សេតសាស្រ្ត កសិកម្មវ័យឆ្លាត កសិកម្មទំនើប កែច្នៃម្ហូបអាហារ គណនេយ្យ ការិយាល័យជួរមុខ និងការរៀបចំសណ្ឋាគារ។ ដោយឡែកវិទ្យាល័យចំនួន ២៨ទៀត កំពុងតែអនុវត្តសាកល្បងលើការបណ្តុះបណ្តាលជំនាញគណនេយ្យ និងព័ត៌មានវិទ្យា៕
