​យើង​ភាគ​ច្រើន​ដឹង​ហើយ​ថា​ ​សារធាតុ​សរសៃ ​(​Fiber​) ​គឺជា​ប្រភេទ​កាបូអ៊ីដ្រាត​ដែល​អាច​ជួយ​ដល់​ការ​ទល់​លាមក​ ការ​គ្រប់គ្រង​ទម្ងន់​ ​និង​កាត់បន្ថយ​ហានិភ័យ​នៃ​ជំងឺ​ទឹកនោម​ផ្អែម​ប្រភេទ​ទី​២​ ​ជំងឺ​បេះដូង​ ​និង​ជំងឺ​មហារីក​មួយចំនួន​។ ​វា​មាន​ផ្ទុក​នៅក្នុង​ផ្លែ​ឈើ​ ​បន្លែ​ ​គ្រាប់​ធញ្ញជាតិ​ ​គ្រាប់​សណ្តែក​ និង​គ្រាប់​រុក្ខជាតិ​ផ្សេង​ៗ​។ ​ប៉ុន្តែ​ ​ការ​ស្រាវជ្រាវ​ថ្មី​ៗ​បាន​បង្ហាញ​ថា​ ​ជីវជាតិ​មួយ​នេះ​ក៏​ផ្តល់​អត្ថប្រយោជន៍​យ៉ាង​ច្រើន​ដល់​ «​ខួរក្បាល​» ​ផងដែរ​។​

​១. ​ទំនាក់ទំនង​រវាង​ពោះវៀន​ ​និង​ខួរក្បាល​

​ឥទ្ធិពល​វិជ្ជមាន​ ​នៃ​សារធាតុ​សរសៃ​ទៅ​លើ​ខួរក្បាល​ ​គឺ​បណ្តាល​មកពី​ «​ទំនាក់ទំនង​រវាង​ពោះវៀន​ ​និង​ខួរក្បាល​» ​(​Gut​-​Brain​ ​Connection​)​។ ​ប្រព័ន្ធ​រំលាយ​អាហារ​ និង​ខួរក្បាល​មាន​ការ​ប្រាស្រ័យទាក់ទង​ ​និង​ជះឥទ្ធិពល​ទៅ​វិញ​ទៅមក​តាមរយៈ​សារធាតុ​បញ្ជូន​សរសៃ​ប្រសាទ ​(​Neurotransmitters​)​។ ​នៅក្នុង​ពោះវៀន​របស់​យើង​មាន​បាក់តេរី​ល្អ​ៗ​ជាច្រើន​ ​ដែល​ពួក​វា​លូតលាស់​ទៅ​តាម​អាហារ​ដែល​យើង​ញ៉ាំ​។ ​ការ​ញ៉ាំ​អាហារ​ដែល​មាន​សារធាតុ​សរសៃ​ខ្ពស់​ ​ជួយ​ឱ្យ​បាក់តេរី​ក្នុង​ពោះវៀន​មាន​សុខភាព​ល្អ​ និង​ជួយ​ផ្លាស់ប្តូរ​មុខងារ​ខួរក្បាល​ឱ្យ​កាន់តែ​ប្រសើរ​ ព្រមទាំង​អាច​កាត់បន្ថយ​ហានិភ័យ​នៃ​ជំងឺ​វង្វេង ​(​Dementia​) ​ទៀតផង​។

​២. ​តើ​សារធាតុ​សរសៃ​ជួយ​ការពារ​ខួរក្បាល​របស់​អ្នក​យ៉ាងដូចម្តេច​?​

​កាត់បន្ថយ​ការ​រលាក​ក្នុង​ខួរក្បាល​ ​៖ ​នៅ​ពេល​ដែល​បាក់តេរី​ក្នុង​ពោះវៀន​បំបែក​សារធាតុ​សរសៃ ​ពួកវា​បង្កើត​បានជា​ «​អាស៊ីត​ខ្លាញ់​ខ្សែ​ខ្លី​»​។ ​អាស៊ីត​មួយ​ប្រភេទ​ឈ្មោះ​ថា​ ​ប៊ុយ​ទីរ៉ាត ​(​Butyrate​) ​មាន​សមត្ថភាព​ប្រឆាំង​នឹង​ការ​រលាក ​ដែល​ជួយ​ដល់​ការ​ចងចាំ​ ​និង​ការ​គិត​ ​ព្រោះ​ជំងឺ​ខួរក្បាល​ភាគ​ច្រើន​ ​(​ដូចជា​ ​ជំងឺ​វង្វេង​អាល់ហ្សៃ​មឺរ ​ឬ​ជំងឺ​ញ័រ​ផាក​ឃីន​សិន​) ​គឺ​បណ្តាល​មកពី​ការ​រលាក​ក្នុង​ខួរក្បាល​នេះ​ឯង​។​

​បញ្ចុះ​សម្ពាធ​ឈាម​ ​៖ ​អាស៊ីត​ខ្លាញ់​ខ្សែ​ខ្លី​ទាំង​នេះ​ក៏​ជួយ​សម្រួល​ដល់​សម្ពាធ​ឈាម​ផងដែរ​។​ មនុស្ស​ដែល​មាន​សម្ពាធ​ឈាម​ខ្ពស់​ ងាយ​នឹង​ប្រឈមមុខ​នឹង​ការ​ធ្លាក់ចុះ​ការ​ចងចាំ​ ​និង​ជំងឺ​វង្វេង​។​

​បង្កើន​ភាព​ស៊ាំ​នឹង​អាំងស៊ុយលីន ​៖​ របប​អាហារ​ដែល​មាន​សារធាតុ​សរសៃ​ខ្ពស់​ ​ជួយ​ពន្យារ​ការ​ស្រូបយក​ជាតិ​ស្ករ​ពី​ពោះវៀន​ ​ដែល​ជួយ​គ្រប់គ្រង​ជាតិ​ស្ករ​ក្នុង​ឈាម​ និង​កាត់បន្ថយ​ហានិភ័យ​នៃ​ជំងឺ​ទឹកនោម​ផ្អែម​។ ​ការ​សិក្សា​បាន​បង្ហាញ​ថា​ ​អ្នកជំងឺ​ទឹកនោម​ផ្អែម​មាន​ហានិភ័យ​កើត​ជំងឺ​វង្វេង​ខ្ពស់​ជាង​អ្នក​ធម្មតា​រហូតដល់​ ​៥៩​%​។​

​ការពារ​សរសៃ​ឈាម​ខួរក្បាល​ ​៖ ​សារធាតុ​សរសៃ​ជួយ​គាំទ្រ​ដល់​សុខភាព​សរសៃ​ឈាម​ ​ជួយ​កាត់បន្ថយ​ការ​ខូចខាត​សរសៃ​ឈាម​ដែល​អាច​នាំឱ្យ​មាន​បញ្ហា​ខួរក្បាល​ ​ឬ​ជំងឺ​ដាច់​សរសៃ​ឈាម​ខួរក្បាល​ ​(​Stroke​)​។​

​វិធីសាស្ត្រ​ងាយ​ៗ​ ​៣​ ​យ៉ាង​ ​ដើម្បី​បង្កើន​សារធាតុ​សរសៃ​ក្នុង​របប​អាហារ​

​បន្ថែម​គ្រឿងផ្សំ​ក្នុង​ញាំ ​ឬ​សាឡាដ ​៖​ ​រាល់​ពេល​ញ៉ាំ​សាឡាដ ​ឬ​បន្លែ​ចំហុយ ​គួរ​រោយ​បន្ថែម​នូវ​គ្រាប់​សណ្តែក​ដី​ ​ឬ​សណ្តែក​សៀង​។​

​ជ្រើសរើស​អាហារ​សម្រន់​ដែល​មាន​សារធាតុ​សរសៃ ​៖​ ញ៉ាំ​ផ្លែ​ឈើ​ស្រស់​បន្ថែម​ពី​កន្លះ​ទៅ​មួយ​ចាន​ចង្កឹះ ​ជំនួស​ឱ្យ​នំ​ផ្អែម​ៗ​។ ​ជម្រើស​ល្អ​ៗ​មាន​ដូចជា​ ​បន្លែ​ស្រស់ ​គ្រាប់​ធញ្ញជាតិ​ ​និង​ផ្លែ​ឈើ​ក្រៀម​។​

​ប្រើប្រាស់​សារធាតុ​ជំនួយ​ ​(​Fiber​ ​Boosters​)​៖​ ​បន្ថែម​គ្រាប់​ធញ្ញជាតិ​ ​ទៅក្នុង​ទឹក​ក្រឡុក ​(​Smoothies​) ​យ៉ា​អួ ​ឬ​បបរ​ស្រូវ​សាលី​។​

​ចំណាំ​៖ ​គួរ​បង្កើន​ការ​ញ៉ាំ​សារធាតុ​សរសៃ​បន្តិច​ម្តង​ៗ​ ​(​ប្រហែល​ ​៥​ក្រាម ​រាល់​ ​៣​ ​ទៅ​ ​៥​ថ្ងៃ​ម្តង​) ​ដើម្បី​ជៀសវាង​ការ​ហើម​ពោះ ​ឬ​ឈឺ​ពោះ​ ​ព្រមទាំង​ត្រូវ​ញ៉ាំ​ទឹក​ឱ្យ​បាន​ច្រើន​៕