សៀវភៅ «កុមារីវីរៈណារី» កម្រាស់៤៤ទំព័រ ដែល​បង្ហាញពីខ្សែជីវិតពិតរបស់ក្មេងស្រីម្នាក់ ក្នុង​ការ​តស៊ូ ទោះបីជាត្រូវឆ្លងកាត់សង្គ្រាម ឬ ព្យុះបក់បោកយ៉ាងណាក៏ដោយ តែនាងនៅតែឱបក្រសោបក្តីស្រមៃជាប់ជានិច្ច រហូត​ក្លាយ​ជាអ្នកវិទ្យាសាស្រ្ត និង​អត្តពលិកាអូឡាំពិក ត្រូវ​បាន​សម្ពោធ​ជាផ្លូវ​ការ​នៅព្រឹកថ្ងៃអង្គារ ទី១០ កុម្ភៈ ដោយ​អង្គការ​ស៊ីប៉ា។

លោកស្រី លី ណារី បានរួចពីស្លាប់ក្នុងសង្គ្រាម ហើយជម្នះមិនឱ្យរបួសផ្លូវចិត្តកំណត់អនាគតរបស់លោកស្រីឡើយ។ តាមរយៈភាពអត់ធន់ ការតាំងចិត្ត និងជំនឿដ៏មុតមាំលើការអប់រំ លោកស្រីបានក្លាយជាអ្នកវិទ្យាសាស្ត្រ ជាអត្តពលិកាអូឡាំពិករបស់កម្ពុជា និងជាគំរូសម្រាប់កុមារ និងយុវជនខ្មែរជំនាន់ក្រោយៗទៀត។ រឿងរ៉ាវរបស់លោកស្រីរំឭកថា សូម្បីតែនៅក្នុងបរិបទដ៏ផុយស្រួយបំផុតក៏ដោយ ក៏ក្តីស្រមៃអាចចាក់ឫស និងរីកចម្រើនបានដែរ។ ដូច្នេះ រឿងនេះបានផ្តល់សារដ៏មានអត្ថន័យថា ជីវិតអាចជួបនឹងទុក្ខលំបាក ប៉ុន្តែការតស៊ូ ការអត់ធ្មត់ និងការមិនបោះបង់ក្តីស្រមៃ គឺជាកូនសោដែលជួយឱ្យយើងអាចឆ្លងផុតឧបសគ្គជីវិតទាំងនោះ។

លោក ហុក សុទ្ធិ ប្រធានអង្គការស៊ីប៉ា មានប្រសាសន៍ថា ដំបូងឡើយសៀវភៅមួយនេះ ត្រូវបានលោកស្រី លី ណារី សរសេរដោយខ្លួនឯងជាភាសាបារាំង និងអង់គ្លេស។ បន្ទាប់មក សៀវភៅ កុមារី វីរៈណារី ត្រូវបានកែសម្រួល និងបោះពុម្ពផ្សាយជាភាសាខ្មែរដោយអង្គការស៊ីប៉ា ដោយធានាថា រឿងរ៉ាវរបស់លោកស្រីអាចឱ្យកុមារក្នុងប្រទេសកម្ពុជាអានបានជាភាសាខ្មែរ។

បើតាម​លោក សុទ្ធិ សៀវភៅនេះសរសេរឡើងដើម្បីឱ្យ​អ្នកអានដែលមានអាយុ១០ឆ្នាំឡើងទៅ អាចស្វែងយល់ពីប្រធានបទ នៃការតស៊ូ ការចងចាំ សេចក្តីស្រឡាញ់ និងភាពក្លាហានក្នុងការមានក្តីស្រមៃ។

សៀវភៅ «កុមារីវីរៈណារី» ជាភាសាខ្មែរនេះ ត្រូវ​បានអមដោយគំនូររបស់វិចិត្រករខ្មែរឈ្មោះ សៀត សុភាព ជាអ្នកគំនូរឯករាជ្យ ដែលបានសហការជាមួយអង្គការស៊ីប៉ាចាប់តាំងពីឆ្នាំ២០១៥ និងបោះពុម្ពផ្សាយដោយគ្រឹះស្ថានបោះពុម្ពផ្សាយខ្មែរ ដែលប្តេជ្ញាចិត្តធ្វើឱ្យរឿងរ៉ាវ ដែលមានអត្ថន័យនេះ អាចអានបានសម្រាប់កុមារគ្រប់រូប។ “ការរួមបញ្ចូលគ្នានេះធ្វើឱ្យសៀវភៅ កុមារី វីរៈណារី មិនត្រឹមតែជារឿងអំពីប្រទេសកម្ពុជាប៉ុណ្ណោះទេ ប៉ុន្តែវាជារឿងដែលបង្កើតឡើងនៅក្នុងប្រទេសកម្ពុជា សម្រាប់កុមារខ្មែរ”៕

ដោយ៖ ង៉ាន់ ទិត្យ