កុមារជាច្រើនបានបាត់បង់ឱកាសសិក្សាបន្ទាប់ពីមានការផ្ទុះអាវុធ ក្នុង​ជម្លោះព្រំដែនកម្ពុជា-ថៃ ដែលតម្រូវឱ្យពួកគេ និងក្រុមគ្រួសារត្រូវជម្លៀសមករស់នៅតាមជំរំជនភៀសសឹក។ ដើម្បីដោះស្រាយបញ្ហានេះ មូលនិធិម៉ានី (The Many Foundation) បានផ្តួចផ្តើមគម្រោង “បណ្ណាល័យប៉ាម៉ានី” ដែលជាបណ្ណាល័យចល័ត ដើម្បីនាំយកការអប់រំ ភាពច្នៃប្រឌិត និងក្ដីសង្ឃឹមថ្មីទៅដល់កុមារទាំងនោះឡើងវិញ។

លោក ជា សុខហ៊ី នាយកគ្រប់គ្រងគម្រោងបណ្ណាល័យប៉ាម៉ានី មានប្រសាសន៍ថា បណ្ណាល័យចល័តនេះមានគោលបំណងចង់ផ្ដល់ឱកាសឱ្យកុមារទទួលបានការអប់រំ បង្កើតទីកន្លែងសុវត្ថិភាពសម្រាប់សិក្សារៀនសូត្រ ក៏ដូចជាទទួលបានសេវាកម្មជំនួយផ្លូវចិត្ត ដើម្បីអភិវឌ្ឍសមត្ថភាព និងក្ដីសង្ឃឹម ខណៈពេលមានវិបត្តិដោយសារបញ្ហាព្រំដែន។

“យើងចង់ផ្ដល់ឱកាសក្រៅពីថ្នាក់រៀន ឱ្យគាត់បានមកធ្វើការជាក្រុម លេងល្បែងកម្សាន្តបែបល្បងបញ្ញា និងស្គាល់មិត្តភក្ដិដទៃទៀត។ តាមរយៈសកម្មភាពទាំងនេះ អាចផ្ដល់ជាក្ដីសង្ឃឹមឱ្យកុមារគិតបានវែងឆ្ងាយ ជាជាងស្ថានភាពជីវភាពបច្ចុប្បន្នដែលពួកគាត់មាន”។

បើតាម​លោក ជា សុខហ៊ី គម្រោងបណ្ណាល័យប៉ាម៉ានី បានបង្កើតឡើងនៅខែសីហា ឆ្នាំ២០២៥ បន្ទាប់ពីមានការផ្ទុះអាវុធក្នុង​ជម្លោះព្រំដែនកម្ពុជា-ថៃ ហើយបច្ចុប្បន្នបានដាក់ឱ្យដំណើរការនៅ ៣ទីតាំង ក្នុងខេត្តបន្ទាយមានជ័យ រួមមាន សាលាបឋមសិក្សាព្រៃចាន់ សាលាបឋមសិក្សាជោគជ័យ និងជំរំជនភៀសសឹកស្រុកអូរជ្រៅ។

នាយកគ្រប់គ្រងគម្រោងបណ្ណាល័យប៉ាម៉ានី បន្ថែមថា បណ្ណាល័យចល័តនេះ ធ្វើអំពីដែកប្រក់ស័ង្កសីទំហំប្រវែង ៦ម៉ែត្រគុណ៣ម៉ែត្រ ដែលអាចផ្លាស់ទីបាន។ គម្រោងនេះបានរួមចំណែកយ៉ាងសំខាន់ក្នុងការគាំទ្រដល់ការសិក្សារៀនសូត្ររបស់កុមារដូចជា ទី១. ផ្ដល់សម្ភារៈសិក្សា ៖ ផ្ដល់សៀវភៅរឿងនិទាន សៀវភៅអាន និងសៀវភៅសរសេរ, ទី២. ថ្នាក់បង្រៀនខ្លីៗ ៖ បង្រៀនអាន សរសេរ គណិតវិទ្យា និងបំណិនជីវិត ដូចជា ការរក្សាអនាម័យ ការគូរគំនូរ លេងល្បែងល្បងប្រាជ្ញា និងសកម្មភាពរាំបែបអប់រំ។ ក្នុងនោះ ក៏មានក្រុមយុវជនស្ម័គ្រចិត្តប្រមាណ ៥០នាក់ ចុះទៅបង្រៀនកុមារដោយផ្លាស់វេនគ្នា ព្រមទាំងមានបណ្ណារក្សប្រចាំបណ្ណាល័យ ជួយមើលការខុសត្រូវនៅតាមសាលាបឋមសិក្សាដែលបានដាក់ឱ្យដំណើរការបណ្ណាល័យចល័តទាំងនេះ។

ជាការកត់សម្គាល់របស់លោក ជា សុខហ៊ី កុមារដែលចូលរួមក្នុងបណ្ណាល័យចល័តប៉ាម៉ានី ពួកគេបានបង្កើនគំនិតច្នៃប្រឌិត និងភាពរីករាយក្រៅពីថ្នាក់រៀន។ ពួកគេមានក្ដីស្រមៃចង់ធ្វើជាគ្រូពេទ្យ វិស្វករ ឬចង់មានជីវភាពប្រសើរជាងមុន។ កុមារខ្លះបានបង្ហាញពីក្ដីស្រមៃចង់ត្រឡប់ទៅផ្ទះវិញ និងមិនចង់រស់នៅក្នុងជំរំជនភៀសសឹក ដោយបង្ហាញតាមរយៈគំនូររបស់ពួកគេ។

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ដោយ​គាំទ្រ​ចំពោះគម្រោងមួយនេះ ដោយថា គម្រោងបណ្ណាល័យចល័តនេះពិតជាមានសារៈសំខាន់ ព្រោះវាជាការលើកទឹកចិត្ត និងជំរុញឱ្យកុមារមានឱកាសអាន ទទួលបានព័ត៌មាន ចំណេះដឹង បទពិសោធន៍ ជួយបំបាត់ភាពភ័យខ្លាច និងបណ្ដុះទម្លាប់អាន។

មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បន្ថែមថា ដើម្បីឱ្យកុមារមានឱកាសអានច្រើនជាងនេះ គួរមានគោលការណ៍ខ្ចីសង និងពង្រីកបណ្ណាល័យនេះ ឱ្យមាននៅគ្រប់តំបន់ដែលមានកុមារភៀសសឹក។ ជាពិសេស គួរមានសៀវភៅចំណេះដឹងទូទៅ ប្រលោមលោក រឿងព្រេង ណែនាំពីអនាម័យ ការបង្ការហានិភ័យគ្រោះទឹកជំនន់ ការប្រុងប្រយ័ត្នគ្រាប់មីន ការប្រុងប្រយ័ត្នពេលធ្លាក់គ្រាប់ផ្លោង គឺកាន់តែល្អ ដើម្បីកុមារអាចយកទៅអនុវត្តពាក់ព័ន្ធសភាពការភៀសខ្លួននៅតាមតំបន់ព្រំដែន។

យ៉ាងណាក៏ដោយ បើតាម លោក ជា សុខហ៊ី សម្រាប់គម្រោងបណ្ណាល័យចល័តប៉ាម៉ានី គម្រោងនឹងពង្រីកទៅតាមខេត្តនៅតាមបណ្ដោយព្រំដែនទូទាំងប្រទេសកម្ពុជា ហើយ​ជាមួយ​គ្នា​នៅពេល​ខាងមុខដ៏ខ្លីនេះ នឹងត្រៀមតម្លើង ៣ទីតាំងបន្ថែម​ទៀតនៅសាលាបឋមសិក្សាខ្វះខាតក្នុងខេត្តព្រះវិហារ ដោយ​លោកសង្ឃឹមថា នឹងមានការចូលរួមគាំទ្រពីអាជ្ញាធរ ក្រសួងអប់រំ និងអង្គការពាក់ព័ន្ធនានា។

គួរជំរាបជូនថា មូនិធិប៉ាម៉ានី ត្រូវ​បង្កើតឡើងដំបូងនៅឆ្នាំ២០១៩ ហើយ​មក​ដល់បច្ចុប្បន្ន​មូលនិធិមួយ​នេះ​បាន​ចូលរួមអនុវត្តគម្រោងជាច្រើនសម្រាប់យុវជន និងកុមារ​កម្ពុជា ដូចជា គម្រោងសំណេរអង្គរ, គម្រោងប៉ារ៉ាឡាំពិក, គម្រោងអូឡាំព្យាដកុមារ, គម្រោងផ្ទះបាយកុមារ និងគម្រោងជួយកុមារមានជំងឺមហារីក ជាដើម៕