ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាកលវិទ្យាល័យភូមិន្ទភ្នំពេញ (RUPP) នឹងរៀបចំសិក្ខាសាលាដ៏សំខាន់មួយ ស្ដីពី «អភិបាលកិច្ច និងបរិវត្តកម្ម GenZ នៃអាជីវកម្ម» ចាប់ពីថ្ងៃទី២៨ ដល់ ថ្ងៃទី៣០ ខែវិច្ឆិកា ឆ្នាំ២០២៥ ចុងសប្តាហ៍នេះ ដោយរំពឹងថា នឹងរួមចំណែកពង្រឹងបំណិនសហគ្រិនភាពរបស់យុវជនកម្ពុជា។
លោកស្រី ដួង ច័ន្ទមេត្តាចំប៉ាវៀង គ្រូបង្រៀននៃមហាវិទ្យាល័យសិក្សាអភិវឌ្ឍន៍ និងជាអ្នកសម្របសម្រួលកម្មវិធីបរិញ្ញាបត្រជាន់ខ្ពស់ ជំនាញគ្រប់គ្រងអាជីវកម្មគ្រួសារ នៃសាកលវិទ្យាល័យភូមិន្ទភ្នំពេញ បានលើកឡើងថា សិក្ខាសាលានេះ គឺជាការបង្ហាញលទ្ធផលសិក្សា និងស្ថានភាពអនុវត្តជាក់ស្ដែងរបស់និស្សិតជំនាន់ទី១ ថ្នាក់បរិញ្ញាបត្រជាន់ខ្ពស់ ជំនាញគ្រប់គ្រងអាជីវកម្មគ្រួសារ។
បើតាមលោកស្រី ដួង ច័ន្ទមេត្តាចំប៉ាវៀង កម្មវិធីនេះ នឹងផ្តោតទៅលើភាពជាក់ស្ដែង និងការច្នៃប្រឌិត ជាមួយនឹងប្រធានបទដែលយុវជនចូលចិត្តដូចជា យុទ្ធសាស្រ្តឌីជីថល ការកសាងស្លាកយីហោក្នុងឧស្សាហកម្មច្នៃប្រឌិត។ ជាងនេះទៅទៀត វាគ្មិនដែលចូលរួម គឺជាអ្នកដឹកនាំ និងជាម្ចាស់អាជីវកម្មដែលមានបទពិសោធន៍ខ្ពស់។ ដូច្នេះ យុវជននឹងមានឱកាសរៀនសូត្រពីគំរូអាជីវកម្មពិតៗ និងភាពជោគជ័យទាំងនោះដោយផ្ទាល់។
លោកស្រី ដួង ច័ន្ទមេត្តាចំប៉ាវៀង រំពឹងថា យុវជននឹងទទួលបានអត្ថប្រយោជន៍ធំៗ ៤ ពីកម្មវិធីនេះ រួមមាន ទី១. ទទួលបាន ចំណេះដឹងថ្មី, ទី២. យល់ដឹងស៊ីជម្រៅពី គម្រោងគ្រប់គ្រងអាជីវកម្មគ្រួសារបែបទំនើប, ទី៣. កសាងបណ្ដាញទំនាក់ទំនង ជាមួយអ្នកជំនាញ និងម្ចាស់អាជីវកម្ម និងទី៤. អាចយកទៅអនុវត្ត ក្នុងការធ្វើអាជីវកម្មគ្រួសារផ្ទាល់ខ្លួន។
«ខ្ញុំជឿជាក់ថា យុវជននឹងទទួលបានគំនិតថ្មីៗពីគំរូអាជីវកម្ម ឬបទពិសោធន៍ដែលអ្នកជំនាញបានឆ្លងកាត់ ហើយយកទៅអនុវត្ត»។
លោកស្រី ដួង ច័ន្ទមេត្តាចំប៉ាវៀង រំពឹងថា សិក្ខាសាលានេះនឹងមានអ្នកចូលរួមច្រើន ដូចជាម្ចាស់អាជីវកម្ម សិស្ស និស្សិត និងយុវជនដែលមានបំណងចាប់ផ្តើមអាជីវកម្មថ្មី, អ្នកបន្តវេន ឬស្នងតំណែងអាជីវកម្មគ្រួសារ ក៏ដូចជាស្ថាប័នរដ្ឋ និងឯកជន ដោយក្នុងកម្មវិធីនោះ ក៏មានបន្ថែមការតាំងបង្ហាញផលិតផលខ្មែរ និងគម្រូអាជីវកម្មដែលជោគជ័យផងដែរ៕
