មនុស្ស Introvert ឬ Extrovert សុទ្ធតែមានអត្តសញ្ញាណ លក្ខណៈពិសេស និងចំណុចទាក់ទាញរៀងៗខ្លួន។ ប៉ុន្តែប្រសិនបើអ្នកចូលចិត្តធ្វើការតែម្នាក់មិនចង់ឱ្យមានការចូលរួមពីអ្នកដទៃ ប្រភេទការងារសម្រាប់មនុស្សចរិតលក្ខណៈ Introvert គឺស័ក្តិសមនឹងអ្នកបំផុត។ បរិយាកាសការងារបែប Introvert ផ្ដល់ឱ្យអ្នកនូវទំនួលខុសត្រូវបែបឯករាជ្យ មានគម្លាត និងការចូលរួមពីមនុស្សតិចតួច អនុញ្ញាតឱ្យអ្នកមានពេលឆ្លុះបញ្ចាំង និងស្វែងយល់ពីខ្លួនឯង។

តើអ្វីជា Introvert?

Introvert គឺជាចរិតលក្ខណៈរបស់មនុស្សដែលចូលចិត្តនៅម្នាក់ឯង ហើយការទំនាក់ទំនងជាមួយមនុស្សក្នុងសង្គម ធ្វើឱ្យពួកគេមានអារម្មណ៍ថា នឿយហត់ និងអស់កម្លាំង។ ជាធម្មតា បុគ្គល Introvert ទទួលបានថាមពលពីការនៅម្នាក់​ឯង ជំនួសឱ្យការចូលរួមក្នុងសង្គម ប៉ុន្តែមិនមែនមានន័យថា ពួកគេមិនសប្បាយចិត្តពេលមានមនុស្សនៅក្បែរនោះទេ។ គ្រាន់តែពួកគេត្រូវការពេលវេលាច្រើន ដើម្បីនៅម្នាក់ឯង។ មនុស្សដែលមានចរិតលក្ខណៈ Introvert ខ្លះទៀត ចូលចិត្តបង្កើតទំនាក់ទំនងជាមួយមនុស្សក្នុងក្រុមតូច។ យ៉ាងណាមិញ ពួកគេនៅតែមានភាពក្លាហាន និងអាចទំនាក់ទំនងជាមួយអ្នកដទៃបានធម្មតា។

ចរិតលក្ខណៈទូទៅរបស់មនុស្ស Introvert

Introvert មានលក្ខណៈពីធម្មជាតិចូលចិត្តរស់នៅក្នុងពិភពផ្ទាល់ខ្លួនរបស់គេ ដែលមានន័យថា ពួកគេតែងតែគិត និងស្គាល់ខ្លួនឯងច្បាស់។ នេះគឺជាចរិតលក្ខណៈទូទៅមួយចំនួនរបស់មនុស្ស Introvert ភាគច្រើន៖

• ចូលចិត្តនៅម្នាក់ឯង
• ចូលចិត្តទំនាក់ទំនងតាមរយៈការសរសេរ
• ចូលចិត្តឯករាជ្យភាព
• មានអារម្មណ៍នឿយហត់ បន្ទាប់ពីទំនាក់ទំនងក្នុងសង្គម
• មានទំនាក់ទំនងជាមួយអារម្មណ៍ខ្លួនឯង
• មិនមានទំនោរធ្វើការជាក្រុម
• មិនចូលចិត្តការយកចិត្តទុកដាក់ពីអ្នកដទៃ
• មានមិត្តភក្តិតិច។

ជំនាញពីធម្មជាតិរបស់មនុស្ស Introvert

ដោយសារតែមនុស្ស Introvert មានទំនោរក្នុងការចំណាយពេលច្រើន ដើម្បីគិត ធ្វើឱ្យគេពួកគេពូកែខាងផ្នែក Emotional Intelligence និង Critical Thinking ដែលជំនាញទាំងនោះមានដូចជា៖

• ការយល់ចិត្តអ្នកដទៃ (Empathy)
• ការគិតបែបវិភាគ (Analytical thinking)
• ការស្ដាប់ដោយយកចិត្តទុកដាក់ (Active Listening)
• ការដោះស្រាយបញ្ហា
• ការរៀបចំគម្រោង
• ការច្នៃប្រឌិត (Creativity)

ប្រភេទអាជីពដែលល្អសម្រាប់មនុស្ស Introvert

ការងារដែលផ្ដល់ភាពងាយស្រួលដល់មនុស្ស Introvert ជាទូទៅ ជាប្រភេទការងារដែលអនុញ្ញាតឱ្យពួកគេបំពេញតែម្នាក់ឯង។ ប្រសិនបើអ្នកជាមនុស្ស Introvert អ្នកទំនងជាមានទំនោរ ចង់ធ្វើការងារដែលមានលក្ខណៈដូចជា៖

ជំនាញឯកទេស ៖ មនុស្ស Introvert ភាគច្រើនចូលចិត្តធ្វើកិច្ចការ ដោយមុជជ្រៅទៅក្នុងចំណូចចិត្តពួកគេ ដែលធ្វើឱ្យគេមានជំនាញ និងចំណេះដឹងជាក់លាក់ទៅលើផ្នែកណាមួយ។ ប្រសិនបើអ្នកជាមនុស្ស Introvert អ្នកទំនងជាមានទំនោរក្នុងការបំពេញការងារឯកទេស ជាងការងារប្រភេទ generalist ។

ការងារដែលមានការរំខានតិច៖ ពេលខ្លះមនុស្ស Introvert ទាមទារនូវអារម្មណ៍ផ្ដោតខ្លាំង​ ខណៈពេលធ្វើការ។ ដូច្នេះ ពួកគេប្រហែលជាទទួលនូវអារម្មណ៍ផាសុកភាពនៅពេលធ្វើការក្នុង ការិយាល័យនៅផ្ទះ តុធ្វើការដែលមានឯកជនភាព ឬកន្លែងធ្វើការដែលមានភាពស្ងប់ស្ងាត់។

ទំនាក់ទំនងមួយទល់មួយ៖ មនុស្ស Introvert មានទំនោរគិតស៊ីជម្រៅទៅបញ្ហាមួយ មុនពេលសម្រេចចិត្តចែករំលែកមតិយោបល់ទៅកាន់នរណាម្នាក់។ ចំណុចនេះ ធ្វើឱ្យពួកគេពូកែទំនាក់ទំនង ជាលក្ខណៈមួយទល់មួយ ព្រោះទំនាក់ទំនងប្រភេទនេះ ផ្ដល់នូវគម្លាតសម្រាប់គិតបានល្អដល់ពួកគេ៕