ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទិវាជាតិវិទ្យាសាស្រ្ត បច្ចេកវិទ្យា និងនវានុវត្តន៍ លើកទី២ កំពុងប្រារព្ធធ្វើឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ រយៈពេល៣ថ្ងៃ ដោយផ្តើមពីថ្ងៃទី២៤ ដល់ថ្ងៃទី២៦ ខែមីនា ឆ្នាំ២០២៤។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា ទិវានេះ គឺជាការបណ្តុះស្មារតីដល់ប្រជាពលរដ្ឋ ក៏ដូចជាអ្នកសិក្សាឱ្យស្រឡាញ់វិទ្យាសាស្រ្ត។
ឯកឧត្តម ហែម វណ្ណឌី មានប្រសាសន៍ថា ក្នុងឱកាសទិវាជាតិវិទ្យាសាស្រ្ត បច្ចេកវិទ្យា និងនាវានុវត្តន៍ លើកទី២ រយៈពេល៣ថ្ងៃនេះ គឺមានបំណងនាំយកនូវឧស្សាហកម្មខ្នាតតូច និងមធ្យមរបស់យើង ក៏ដូចជាសហគមន៍អ្នកវិទ្យាសាស្រ្ត និងអ្នកសិក្សាធិការ សិស្ស និស្សិត អ្នកស្រាវជ្រាវ លោកគ្រូអ្នកគ្រូ បង្រៀន សាស្រ្តាចារ្យទាំងអស់ ឱ្យមានការចាប់អារម្មណ៍កាន់តែខ្លាំងឡើងទៅលើវិស័យវិទ្យាសាស្រ្ត បច្ចេកវិទ្យា និងនវានុវត្តន៍របស់យើង។
ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ឆ្នាំនេះ ប្រារព្ធឡើងក្រោមប្រធានបទ «សហគ្រាសធុនតូច និងមធ្យម ឆ្ពោះទៅវិទ្យាសាស្ត្រ បច្ចេកវិទ្យា និងនវានុវត្តន៍» ក្នុងគោលបំណងជំរុញផលិតភាពរបស់សហគ្រាសឯកជន តាមរយៈការដាក់បញ្ចូលបច្ចេកវិទ្យា ក្នុងខ្សែច្រវ៉ាក់ផលិតកម្ម ដើម្បីបង្កើនប្រសិទ្ធភាព និងគុណតម្លៃបន្ថែម។
ក្នុងព្រឹត្តិការណ៍នេះ មានស្តង់ប្រមាណ ២៣៧ស្តង់ និងមានក្រុមហ៊ុន ១៣២ក្រុមហ៊ុនចូលរួមបង្ហាញពីបច្ចេកវិទ្យា ស្វ័យប្រវត្តិកម្ម ក៏ដូចជាមានពិពណ៌វិទ្យាសាស្រ្តសម្រាប់កុមារ សិស្សានុសិស្ស ដើម្បីបណ្តុះនូវស្មារតីស្រឡាញ់វិទ្យាសាស្រ្ត ។ ជាមួយគ្នា ទិវានេះ ក៏មាននូវកិច្ចពិភាក្សាស្តីពីបច្ចេកវិទ្យា នៅក្នុងវិស័យជាច្រើនដូចជា វិស័យចំណីអាហារ, វិស័យទឹកស្អាត, បច្ចេកវិទ្យាអប់រំ សុខភាព, បច្ចេកវិទ្យាថាមពលអគ្គិសនី អេឡិចត្រូនិច ក៏ដូចជាបច្ចេកវិទ្យាបៃតងជាដើម។
ក្នុងឱកាសអញ្ជើញជាអធិបតីបើក «ទិវាជាតិវិទ្យាសាស្រ្ត បច្ចេកវិទ្យា និងនវានុវត្តន៍» លើកទី២ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានផ្តល់អនុសាសន៍ណែនាំទៅដល់គ្រឹះស្ថានអប់រំ បណ្តុះបណ្តាលស្រាវជ្រាវ និងវិស័យឯកជន ជាពិសេសសហគ្រាសធុនតូច និងមធ្យម ត្រូវសហការគ្នាជាមួយក្រសួង-ស្ថាប័នរាជរដ្ឋាភិបាល ដើម្បីបង្កើតនូវ មូលដ្ឋានរឹងមាំផ្នែកវិទ្យាសាស្ត្រ បច្ចេកវិទ្យា និង នវានុវត្តន៍ លើគ្រប់វិស័យ។ សម្តេចក៏បានបញ្ជាក់ដែរថា គោលដៅនេះ អាចសម្រេចទៅបានអាស្រ័យលើការផ្លាស់ប្ដូរផ្នត់គំនិត, របៀបរបបចាត់ចែង, ការគ្រប់គ្រងការងារ និងធុរកិច្ច ជាមួយនឹងការវិយោគ ទាំងផ្នែកមូលធន និងការបណ្តុះធនធានមនុស្សផងដែរ៕
