សិស្សមកពីតំបន់ B-S-J-Z របស់ចិន និងសិង្ហបុរី បានឈរនៅកំពូលតារាងពិភពលោកក្នុងលទ្ធផល PISA ឆ្នាំ២០២៥ លើមុខវិជ្ជាគណិតវិទ្យា និងវិទ្យាសាស្ត្រ ខណៈសិង្ហបុរីឈរនៅចំណាត់ថ្នាក់លេខ១ក្នុងការអាន។

យោងតាមសារព័ត៌មាន​ VN Express របាយការណ៍ PISA 2025 របស់អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ដែលចេញផ្សាយនៅថ្ងៃទី៨ ខែកញ្ញា ឆ្នាំ២០២៦ សិស្សអាយុ១៥ឆ្នាំមកពីតំបន់ B-S-J-Z (ប៉េកាំង-សៀងហៃ-ជាំងស៊ូ-ជឺជាំង) របស់ចិន ទទួលបានលទ្ធផលខ្ពស់បំផុតក្នុងវិស័យគណិតវិទ្យា និងវិទ្យាសាស្ត្រ។
ក្នុងវិស័យគណិតវិទ្យា សិស្សតំបន់ B-S-J-Z ទទួលបានពិន្ទុជាមធ្យម ៦១២ពិន្ទុ ខ្ពស់បំផុតក្នុងចំណោមប្រព័ន្ធអប់រំដែលបានចូលរួម ខណៈសិង្ហបុរីឈរនៅលេខ២ ដោយទទួលបាន ៥៦៣ពិន្ទុ។ ពិន្ទុមធ្យមរបស់ប្រទេស និងតំបន់ក្នុង OECD មាន ៤៦៣ពិន្ទុ។

ចំពោះវិទ្យាសាស្ត្រ B-S-J-Z ក៏ឈរនៅចំណាត់ថ្នាក់លេខ១ ដោយទទួលបាន ៥៩៧ពិន្ទុ ខណៈសិង្ហបុរីឈរនៅលេខ២ ដោយទទួលបាន ៥៦០ពិន្ទុ។ បន្ទាប់មកមានម៉ាកាវ ចិនតៃវ៉ាន់ ជប៉ុន អេស្តូនី និងកូរ៉េខាងត្បូង។

សម្រាប់ការអាន សិង្ហបុរីឈរនៅចំណាត់ថ្នាក់លេខ១ ខណៈប្រទេស និងតំបន់នៅអាស៊ីបូព៌ាមួយចំនួនទៀត ក៏ស្ថិតក្នុងចំណោមប្រព័ន្ធអប់រំដែលមានលទ្ធផលខ្ពស់ក្នុងមុខវិជ្ជាសំខាន់ៗរបស់ PISA។

ជាមួយគ្នានេះ សិស្សសិង្ហបុរីក៏មានលទ្ធផលខ្ពស់ក្នុងការដោះស្រាយបញ្ហាដោយប្រើវិធីសាស្ត្រគណនា (computational problem-solving) ដោយក្រសួងអប់រំសិង្ហបុរីបញ្ជាក់ថា សិស្សជាងពាក់កណ្តាលស្ថិតក្នុងក្រុមអ្នកសម្រេចបានលទ្ធផលខ្ពស់បំផុតក្នុងផ្នែកនេះ បើធៀបនឹងប្រហែលមួយភាគបួនជាមធ្យមក្នុងប្រទេស OECD។ សិស្សទាំងនេះមានសមត្ថភាពក្នុងការធ្វើពិសោធន៍ វិភាគទិន្នន័យ និងបង្កើត ព្រមទាំងកែសម្រួលឧបករណ៍គណនា ដើម្បីដោះស្រាយបញ្ហាស្មុគស្មាញក្នុងជីវិតពិត។

PISA ឆ្នាំ២០២៥ បានវាយតម្លៃសិស្សអាយុ១៥ឆ្នាំប្រមាណ ៧៦០,០០០នាក់ មកពី ៩១ប្រទេស និងតំបន់សេដ្ឋកិច្ច ដែលជាការវាយតម្លៃធំបំផុតរបស់ PISA រហូតមកដល់ពេលនេះ។ ការវាយតម្លៃនេះគ្របដណ្តប់លើវិទ្យាសាស្ត្រ ការអាន គណិតវិទ្យា និងការដោះស្រាយបញ្ហាដោយប្រើវិធីសាស្ត្រគណនា។

តាម OECD PISA ឆ្នាំ២០២៥ ផ្តោតសំខាន់លើវិទ្យាសាស្ត្រ ខណៈគណិតវិទ្យា និងការអានជាមុខវិជ្ជារង ហើយបានបញ្ចូលវិស័យថ្មីស្តីពី ការរៀនក្នុងពិភពឌីជីថល (Learning in the Digital World) ដែលវាស់សមត្ថភាពសិស្សក្នុងការប្រើឧបករណ៍គណនា ដើម្បីកសាងចំណេះដឹង និងដោះស្រាយបញ្ហា៕