ក្រសួងអប់រំ យុវជន និងកីឡា បានដាក់ឱ្យប្រើប្រាស់កញ្ចប់អំណានដំបូងថ្នាក់ទី៣ នៅគ្រប់សាលាបឋមសិក្សាទាំងអស់នៅក្នុងខេត្តកំពង់ឆ្នាំង ក្នុងគោលបំណងលើកកម្ពស់គុណភាពនៃការអប់រំតាមរយៈការបង្កើនលទ្ធផលការសិក្សារបស់សិស្សធ្វើយ៉ាងណាឱ្យកុមារកម្ពុជាចេះអាន និងសរសេរបានស្ទាត់គ្រប់ៗគ្នា។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា នៅក្នុងទិសដៅបង្រៀនភាសាខ្មែរដើម្បីឱ្យសិស្សានុសិស្សអាចអាន និងសរសេរបានស្ទាត់ កន្លងមកក្រសួងអប់រំ យុវជន និងកីឡា បានរៀបចំជាកញ្ចប់អំណានដំបូងដែលនៅក្នុងនោះរួមមាន កញ្ចប់អំណានដំបូងថ្នាក់ទី១ កំពុងអនុវត្តនៅក្នុងរាជធានី និងខេត្តចំនួន២២មកដល់ពេលបច្ចុប្បន្ន និងកញ្ចប់អំណានដំបូងថ្នាក់ទី២ កំពុងតែអនុវត្តនៅខេត្ត/ក្រុងចំនួន១៩។ លោកស្រីបណ្ឌិត ឃួន វិច្ឆិកា បន្តថា ដោយសារឃើញអំពីលទ្ធផលល្អប្រសើរ នៃការប្រើប្រាស់កញ្ចប់អំណានដំបូងក្នុងការលើកកម្ពស់ការរៀន និងបង្រៀននេះ ទើបក្រសួងអប់រំ យុវជន និងកីឡា បានដាក់ឱ្យប្រើប្រាស់នូវកញ្ចប់អំណានដំបូងថ្នាក់ទី៣ នៅគ្រប់សាលាបឋមសិក្សាទាំងអស់នៅក្នុងខេត្តកំពង់ឆ្នាំងនាពេលបច្ចុប្បន្ននេះ។

លោកស្រីបណ្ឌិត ឃួន វិច្ឆិកា បន្ថែមថា កញ្ចប់អំណានដំបូងនេះ រួមមាន ទី១. សៀវភៅជំនួយសិស្ស ទី២. សៀវភៅហ្វឹកហាត់អាន ទី៣. សៀវភៅហ្វឹកហាត់សរសេរ ទី៣. សៀវភៅណែនាំហ្វឹកហាត់កិច្ចការផ្ទះ ទី៥. សៀវភៅរឿងខ្លីៗឆ្លើយតបកម្រិតថ្នាក់នីមួយៗ ៦. សៀវភៅណែនាំសម្រាប់គ្រូបង្រៀន ទី៧. បណ្ណអក្សររូបភាពដែលគ្រូបង្រៀនអាចយកទៅប្រើប្រាស់ជាសម្ភារៈឧបទេសក្នុងការបង្រៀននៅក្នុងថ្នាក់ដើម្បីធ្វើឱ្យសិស្សរៀនភាសាខ្មែរឆាប់រហ័ស។

ជាមួយគ្នានេះ នៅក្នុងទស្សនកិច្ចស្តីពីការដាក់ឱ្យអនុវត្តកញ្ចប់សម្ភារៈអំណានថ្នាក់ទី៣ នៅសាលាបឋមសិក្សាច្រេស ស្រុកកំពង់ត្រឡាច ខេត្តកំពង់ឆ្នាំង កាលពីថ្ងៃទី១៧ ខែឧសភា ២០២៤ កន្លងទៅ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា កញ្ចប់សម្ភារៈអំណានថ្មីនេះ រៀបចំឡើងដោយមានសៀវភៅណែនាំគ្រូ សៀវភៅជំនួយសិស្ស សៀវភៅរឿងខ្លីៗ ជាជំនួយដល់ការដឹកនាំការបង្រៀនរបស់គ្រូ និងការរៀនរបស់សិស្ស។ ដោយឡែក វិធីសាស្ត្របង្រៀនវិញ មានលក្ខណៈសកម្ម អន្តរកម្មរវាងសិស្សគ្រូ និងជួយឱ្យសិស្សមានភាពក្លាហាន ចូលរួមគ្រប់សកម្មភាពរៀន និងបង្រៀន។ ទន្ទឹមនឹងការអភិវឌ្ឍកញ្ចប់សម្ភារៈអំណាន ក្រសួងអប់រំ យុវជន និងកីឡា និងអង្គការដៃគូពាក់ព័ន្ធ បានធ្វើការបណ្ដុះបណ្ដាលគ្រូបង្រៀន និងអ្នកពាក់ព័ន្ធស្ដីពីការអនុវត្តកញ្ចប់សម្ភារៈអំណានថ្នាក់ដំបូង និងវិធីសាស្ត្របង្រៀន។

ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បន្ថែមថា អ្វីដែលជាការកត់សម្គាល់ឃើញ គ្រូបង្រៀនអនុវត្តតាមលំនាំបង្រៀនដែលបានណែនាំ សិស្សមានសៀវភៅជំនួយសម្រាប់អានបន្ថែម សាលារៀនមានបណ្ណាល័យស្តង់ដា ទីប្រឹក្សាគរុកោសល្យចុះជួយគ្រូជាប្រចាំ មាតាបិតា អ្នកអាណាព្យាបាលជំរុញកូនចៅអានបន្ថែមនៅផ្ទះ នោះលទ្ធផលនៃការសិក្សារបស់សិស្សនឹងប្រសើរឡើង ពោលគឺសិស្សរៀនចេះអាន សរសេរ នៅកម្រិតថ្នាក់ដំបូង។

លោកស្រី Kerry Pelzman នាយិកាបេសកកម្មនៃទីភ្នាក់ងារជំនួយអាមេរិក USAID មានប្រសាសន៍ថា ការប្រកាសដាក់ឱ្យអនុវត្តជាផ្លូវការនូវកញ្ចប់អំណានថ្នាក់ទី៣ គឺជាសក្ខីភាពមួយបង្ហាញពីកិច្ចខិតខំប្រឹងប្រែងសហការរវាងគម្រោងអប់រំបរិយាបន្ននៅបឋមសិក្សានៃទីភ្នាក់ងារជំនួយអាមេរិក USAID និង ក្រសួងអប់រំ យុវជន និងកីឡា។ ព្រឹត្តិការណ៍សំខាន់នេះ គូសបញ្ជាក់ពីការប្ដេជ្ញាចិត្តរបស់យើងទាំងអស់គ្នាក្នុងការធ្វើឱ្យប្រសើរឡើងការអប់រំកម្រិតថ្នាក់ដំបូងនៅកម្ពុជា និងផ្ដល់នូវជំនាញសំខាន់ៗឈានទៅរកភាពជោគជ័យក្នុងការសិក្សារបស់សិស្សថ្នាក់ទី៣។

គួរជម្រាបជូនថា ក្រសួងអប់រំ យុវជន និងកីឡា បានលើកទឹកចិត្តដល់គណៈគ្រប់គ្រងសាលារៀន ឱ្យអនុវត្តសកម្មភាពក្រៅម៉ោងសិក្សាយ៉ាងតិច២ម៉ោងមួយថ្ងៃ អនុវត្តវិធីសាស្ត្រអំណានក្នុងបណ្ណាល័យ បន្តលើកទឹកចិត្តគ្រូបង្រៀនឱ្យអនុវត្តកញ្ចប់សម្ភារៈអំណានជាប្រចាំ ពិសេសគ្រូបង្រៀនល្អភាសាខ្មែរថ្នាក់ទី១ ទី២ និងទី៣ ដែលជាសកម្មភាពសំខាន់ៗនៃការអនុវត្តស្តង់ដាសាលាបឋមសិក្សាគំរូ៕