ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា នៅព្រឹកថ្ងៃនេះ (៧ តុលា) បានណែនាំឱ្យបេក្ខជនទាំងអស់ដែលត្រូវប្រឡងសញ្ញាបត្រមធ្យមសិក្សាទុតិយភូមិ នាថ្ងៃទី០៨-០៩ ខែតុលា ឆ្នាំ២០២៤ ត្រៀមឆ័ត្រ អាវភ្លៀង និងថង់សម្រាប់ការពារសម្ភារៈនានាក្នុងដំណើរការសំណេរ ក្រោយពីមានការជូនដំណឹងរបស់ក្រសួងធនធានទឹក និងឧតុនិយមថា ចាប់ពីថ្ងៃទី០៧ ដល់ថ្ងៃទី០៩ តុលា ឆ្នាំ២០២៤ រាជធានីភ្នំពេញ និងបណ្តាខេត្តស្ទើរទូទាំងប្រទេសកម្ពុជា នឹងបន្តមានភ្លៀងធ្លាក់ជាមួយផ្គរ រន្ទះ និងខ្យល់កន្រ្តាក់។
បើតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយកាលពីថ្ងៃអាទិត្យ បច្ចុប្បន្ន ខ្យល់មូសុងនិរតីដែលបក់លើសមុទ្រ អានដាមម៉ែន (Andaman Sea) ឈូងសមុទ្រថៃបានថយឥទ្ធិពល ហើយខ្យល់មូសុងឦសានចាប់ផ្តើមមានឥទ្ធិពល ខណៈសម្ពាធទាប នៅបន្តគ្របដណ្ដប់លើភាគខាងក្រោមនៃអាងទន្លេមេគង្គ និងលើប្រទេសកម្ពុជា។ ស្ថានភាពបែបនេះ នឹងធ្វើឱ្យតំបន់វាលទំនាបរបស់ប្រទេសកម្ពុជា មានខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងរាជធានីភ្នំពេញ អាចមានភ្លៀងធ្លាក់ជាមួយផ្គររន្ទៈ និងខ្យល់កន្រ្តាក់គ្របដណ្តប់លើផ្ទៃដី ៦០%។
សម្រាប់តំបន់ខ្ពង់រាប ដែលមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងធ្លាក់ជាមួយផ្គរ រន្ទះ និងខ្យល់កន្រ្តាក់គ្របដណ្តប់លើផ្ទៃដី ៥០%។ ដោយឡែកតំបន់មាត់សមុទ្រដែលមានខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គរ រន្ទៈ និងខ្យល់កន្រ្តាក់ គ្របដណ្តប់លើផ្ទៃដី ៣៥%។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ដោយសារបញ្ហាអាកាសធាតុភ្លៀងធ្លាក់ប៉ុន្មានថ្ងៃមកនេះ បច្ចុប្បន្នមានសាលា ដែលជាមណ្ឌលប្រឡងចំនួន៤ បានរងការលិចលង់ទឹកភ្លៀងតិចតួច ដោយក្នុងនោះសាលារៀនមួយបានស្រកទាំងស្រុងហើយ រីឯសាលា៣ទៀតស្ថិតក្នុងស្ថានភាពអាចគ្រប់គ្រងបាន។ យ៉ាងណាក៏ដោយ បច្ចុប្បន្នក្រសួងកំពុងបន្តធ្វើការងារជិតស្និទ្ធជាមួយអាជ្ញាធរដែនដី ដើម្បីតាមដាន និងដោះស្រាយបញ្ហាឱ្យបានទាន់ពេលវេលា។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំ២០២៤ នឹងប្រព្រឹត្តទៅនៅថ្ងៃទី៨ និងថ្ងៃទី៩ ខែតុលា ដោយមានមណ្ឌលប្រឡងសរុបចំនួន ២៣០មណ្ឌល ដោយបែងចែកជា ៥៥៣៤បន្ទប់ ក្នុងនោះមណ្ឌលប្រឡងសម្រាប់ថ្នាក់វិទ្យាសាស្រ្តមានចំនួន ៧៣មណ្ឌល ត្រូវជា ១៦០៣ បន្ទប់ និងមណ្ឌលសម្រាប់ថ្នាក់វិទ្យាសាស្រ្តសង្គមចំនួន ១៥៧មណ្ឌល ត្រូវជា ៣៩៣១បន្ទប់៕
