នៅថ្ងៃប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប រយៈពេល២ថ្ងៃខាងមុខនេះ សម្រាប់បេក្ខជននៅខេត្តស្វាយរៀងអស់បារម្ភហើយ ព្រោះមានភោជនីយដ្ឋាន និងវត្តអារាមនានា បានប្រកាស​ផ្ដល់អាហារ ទឹក ភេសជ្ជៈ និងកន្លែងស្នាក់នៅសម្រាប់បេក្ខជនដែលឡើងមកពីបណ្តាស្រុក​ដោយ​ឥតគិតថ្លៃ។

បើតាមរដ្ឋបាលខេត្តស្វាយរៀង មានវត្តចំនួន​៥ស្ថិត​នៅក្រុងស្វាយរៀង និងស្រុកស្វាយជ្រុំ នឹងរៀបចំកន្លែងស្នាក់ជូនប្អូនៗជាបេក្ខជន និងអ្នក​អាណាព្យាបាល ដែលមកពីស្រុកឆ្ងាយៗ និងពុំមានកន្លែងស្នាក់អាស្រ័យ បានស្នាក់នៅដោយពុំគិតថ្លៃ រួមមាន ១. វត្តព្រៃឆ្លាក់ ស្ថិត​ក្នុង​ក្រុងស្វាយរៀង, ២. វត្តឧប្បលរតនារាម ក្រុងស្វាយរៀង, ៣. វត្តសាមគ្គីឧត្តម (វត្តធ្មល់) ក្រុងស្វាយរៀង, ៤. វត្តចំបក់បិទមាស ក្រុងស្វាយរៀង និង៥. វត្តស្វាយជ្រុំ ស្ថិត​ក្នុង​ស្រុកស្វាយជ្រំ។

ព្រះសច្ចកល្យាណ យ៉ន សុខសាន្ត ព្រះគ្រូចៅអធិការវត្តព្រៃឆ្លាក់ ក្រុងស្វាយរៀង មានសង្ឃដីកាថា វត្តព្រៃឆ្លាក់បានត្រៀមរៀបចំកន្លែងស្នាក់នៅ ម្ហូបអាហារ ក៏​ដូចចាទឹកភេសជ្ជៈ សម្រាប់សិស្សានុសិស្សមកប្រឡងបាក់ឌុបរួចហើយ។ ការ​រៀបចំ​នេះ គឺដោយសារមើលឃើញពីស្ថានភាពលំបាករបស់សិស្សានុស្សនាពេលកន្លងមក ដោយសិស្សខ្លះត្រូវ​ធ្វើដំណើរឆ្ងាយ និងខ្វះខាតថវិកាទៀតផង។

ព្រះគ្រូចៅអធិការវត្តព្រៃឆ្លាក់ មានសង្ឃដីកាបន្ថែមថា គិតមកដល់ពេលនេះ  វត្តព្រៃឆ្លាក់ បានរៀបចំកន្លែងស្នាក់នៅ ម្ហូបអាហារ ជូនសិស្សប្រឡងបាក់ឌុប ដោយធ្វើឡើង៩ឆ្នាំជាប់ៗគ្នា ដោយនេះ​ក៏​ដើម្បីជាការធ្វើទានចំពោះអ្នកដែលអត់ មានន័យថា អ្នកទទួលក៏ត្រេកអរ អ្នកផ្ដល់ជូនក៏ត្រេកអរ។

«កាលណាសិស្សចេញមកពីប្រឡង ឃើញមានបាយទឹករៀបចំត្រៀមរួចជាស្រេច ពួកគេនឹងមានអារម្មណ៍ត្រេកអរ ហើយអ្នកធ្វើទានក៏ត្រេកអរដែរ»

ដោយ​ឡែកភោជនីយដ្ឋានមួយ​ដែលមានយីហោ ដក់ចិត្ត ស្ថិត​នៅ​ក្រុង​ស្វាយរៀង ក៏​បានប្រកាសផ្តល់អាហារ​ដល់បេក្ខជន​ប្រឡង​បាក់ឌុប​ដោយ​ឥតគិតថ្លៃផងដែរ។ លោក តាំង គីមឡេង ម្ចាស់ហាង ដក់ចិត្ត បានប្រាប់ឱ្យដឹងថា ហាងរបស់លោក នឹងរៀបចំអាហារថ្ងៃត្រង់ជាប្រអប់ត្រៀមទុក រួមមាន អាហារក្រៀម​ បាយម្ហូប (សម្លរ)​ ទឹកបរិសុទ្ធ ភេសជ្ជៈ សម្រាប់បេក្ខជន ក៏ដូចជាអាណាព្យាបាលសិស្សទាំងអស់ចូលអង្គុយហូប និងសម្រាកក្នុងហាងបាន នៅ​ថ្ងៃប្រឡង​បាក់ឌុប។

ម្ចាស់ហាងដក់ចិត្ត ប្រចាំខេត្តស្វាយរៀង បញ្ជាក់បន្ថែមថា ការផ្ដល់ជូននេះ គឺដោយសារមានបងប្អូនប្រជាពលរដ្ឋជួយគាំទ្រហាងតាំងពីដើមមក ហើយសម្រាប់អ្វីដែលជាប្រយោជន៍រួមសម្រាប់សង្គម គឺលោកតែងតែជួយ។ ជាពិសេសប្អូនៗថ្នាក់ទី១២ ដែលមានការខ្វះខាត ដោយសារការធ្វើដំណើរផ្លូវឆ្ងាយ ត្រូវជួលកន្លែងស្នាក់នៅ ការហូបចុក ដើម្បីមកប្រឡងបាក់ឌុប។

លោក តាំង គីមឡេង ក៏បានជូនពរសិស្សានុសិស្សប្រឡងថ្នាក់ទី១២ខាងមុខនេះ ឱ្យទទួលបាននិទ្ទេសល្អ ហើយត្រូវតាំងចិត្តប្រឡងឱ្យជាប់ និងលើកទឹកចិត្តខ្លួនឯងជានិច្ច កុំបាក់ស្មារតី និងកុំភ័យខ្លាច។ លោក តាំង គីមឡេង ក៏បានសំណូមពរដល់ម្ចាស់ហាង សណ្ឋាគារ ឬកន្លែងណាដែលមានទីតាំងធំទូលាយជិតមណ្ឌលប្រឡង អាចរួមចំណែកជួយសង្គមតាមរយៈការបញ្ចុះតម្លៃជូនសិស្សានុសិស្សដែលមកប្រឡងបាក់ឌុប ក្នុងកម្រិត ១០ភាគរយទៅ៥០ភាគរយ ឬកុំឡើងថ្លៃ ព្រោះសិស្សានុសិស្សមកពីតំបន់ឆ្ងាយ និងគ្រួសារមានជីវភាពខ្វះខាត។

ស្របជាមួយគ្នានេះ ក្រសួងទេសចរណ៍ ក៏បានចេញសេចក្តីអំពាវនាវចំពោះប្រតិបត្តិករទេសចរណ៍ទាំងអស់ ពិសេស អាជីវកម្មសេវាកម្មស្នាក់នៅទេសចរណ៍ សេវាកម្មម្ហូបអាហារ និងសេវាកម្មដឹកជញ្ជូនអ្នកដំណើរ មេត្តាបង្កលក្ខណៈងាយស្រួល និងសម្រួលថ្លៃសេវាកម្ម ឬកុំដំឡើងថ្លៃសេវាកម្មចំពោះអនុរក្ស និងសិស្សានុសិស្ស ក្នុងអំឡុងពេលដំណើរការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខនេះ៕