សហគមន៍​ខ្មែរ​រស់​នៅ​ប្រទេស​ជប៉ុន ក៏​ដូចជា​នៅ​ប្រទេស​កូរ៉េ កាលពីថ្ងៃទី១៤ កញ្ញា បានរៀបចំធ្វើពិធីកាន់បិណ្ឌវេនទី៧ ព្រមគ្នា ដើម្បីឧទ្ទិសកុសលជូនដល់បុព្វការីជន​ដែលបានលាចាកលោក ក៏​ដូចជា​ឧទ្ទិសកុសល​ជូន​ដល់វីរកងទ័ពខ្មែរ ដែលសបញ្ជាក់ឱ្យឃើញយ៉ាងច្បាស់ថា ជនជាតិខ្មែរទៅដល់ទីណា ក៏មិនភ្លេចប្រពៃណី វប្បធម៌ដើមកំណើតរបស់ខ្លួនឡើយ។

យោង​តាម​ក្រសួងការងារ និង​បណ្តុះបណ្តាលវិជ្ជាជីវៈ ពិធីកាន់បិណ្ឌ​នៅប្រទេស​ជប៉ុន បានធ្វើ​ឡើង​នៅទីតាំង​ចំនួន៤ រួមមាននៅខេត្តស៊ីហ្គា ខេត្តហ្វូគូអូកា ខេត្តហ៊ីរ៉ូស៊ីម៉ា និងខេត្តកាណាហ្គាវ៉ា ដោយមានការចូលរួមពីបងប្អូនសហគមន៍ និស្សិត និងពលករខ្មែរ ដែលកំពុងស្នាក់នៅ និងធ្វើការនៅប្រទេសជប៉ុនចំនួនប្រមាណជិត ១ ០០០នាក់ ដោយមានរៀបចំពិធីសូត្រមន្ត ប្រគេនចង្ហាន់ព្រះសង្ឃទៅតាមប្រពៃណីទំនៀមទម្លាប់ខ្មែរដើម្បីឧទ្ទិសកុសលជូនដល់បុព្វការីជនដែលបានលាចាកលោកនេះ ទៅកាន់លោកខាងមុខ។ ឆ្លៀតក្នុងឱកាសនោះ នៅទីតាំងទាំង ៤ ក៏មានរៀបចំកម្មវិធីឧទ្ទិសកុសលជូនដល់ វីរកងទ័ពខ្មែរដែលបានពលីជីវិតក្នុងបុព្វហេតុការពារជាតិ បូរណភាពទឹកដីខ្មែរ ក្នុងអំឡុងការប៉ះទង្គិចរវាងកម្ពុជានិងថៃផងដែរ។

ដោយឡែកនៅប្រទេស​កូរ៉េ ការរៀបចំពិធីកាន់បិណ្ឌ ត្រូវ​បានរៀបចំ​ឡើង​ដោយក្រសួងការងារ និងបណ្តុះបណ្តាលវិជ្ជាជីវៈ ស្ថានទូតកម្ពុជាប្រចាំសាធារណរដ្ឋកូរ៉េ ដោយ​មានការ​ចូលរួម​ពី​បងប្អូនសហគមន៍ខ្មែររស់នៅសាធារណរដ្ឋកូរ៉េប្រមាណ ២ ៥០០នាក់។ ពិធីកាន់បិណ្ឌរបស់បងប្អូនសហគមន៍ខ្មែរនៅសាធារណរដ្ឋកូរ៉េ រួមមាន កម្មវិធីសាសនា ការសម្ដែងសិល្បៈ ការលក់ដូរម្ហូបខ្មែរ និងការសំណេះសំណាលជាមួយក្រុមការងារយ៉ាងជិតស្និទ្ធបំផុត។

សហគមន៍ខ្មែរនៅសាធារណរដ្ឋកូរ៉េ ដែលបានចូលរួមពិធីកាន់បិណ្ឌ បានលើកទឹកចិត្ត ដល់បងប្អូនប្រជាពលរដ្ឋខ្មែរផ្សេងៗទៀត ចូលរួមឱ្យបានច្រើនកុះករ ក្នុងពិធីកាន់បិណ្ឌ និងភ្ជុំបិណ្ឌ ដើម្បីចូលរួមចំណែកក្នុងការថែរក្សា ផ្សព្វផ្សាយ និងលើកកម្ពស់វប្បធម៌ខ្មែរនៅលើឆាកអន្តរជាតិ ជាពិសេស ដើម្បីឧទ្ទិសកុសលដល់វិញ្ញាណក្ខន្ធរបស់វីរកងទ័ព ដែលបានពលីជីវិតក្នុងជម្លោះព្រំដែនកម្ពុជា-ថៃនាពេលកន្លងមកដូចគ្នា។

ឯកឧត្តម ស៊ុន មេសា អ្នកនាំពាក្យ​ក្រសួងការងារ និង​បណ្តុះបណ្តាល វិជ្ជាជីវៈ មាន​ប្រសាសន៍ថា ការរៀបចំកម្មវិធីកាន់បិណ្ឌ កាលពីចុងសប្តាហ៍​កន្លងទៅនេះ គឺជា​ការ​រៀបចំ​ឡើងដោយផ្ទាល់របស់បងប្អូនសហគមន៍​ខ្មែរ​នៅ​ប្រទេស​កូរ៉េ និង​ជប៉ុន ដោយមា​នការ​ចូលរួមពីមន្រ្តីក្រសួងការងារ ក៏​ដូចជា​មន្រ្តីស្ថានទូត​ប្រចាំកូរ៉េ និងជប៉ុន ដើម្បីធ្វើបុណ្យ​រួមគ្នា​ក្នុងខែមន្តសន្តរដូវ ក៏​ដូចជា​រួមគ្នា​ឧទ្ទិសកោសល​ជូនដល់​វីរកងទ័ព​ដែលបាន​បូជាជីវិត​ក្នុងបុព្វហេតុ​ការពារ​អធិបតេយ្យភាពរបស់ព្រះរាជាណាចក្រ​កម្ពុជា ពីការ​ឈ្លានពានរបស់ប្រទេសថៃ។

ឯកឧត្តម ស៊ុន មេសា មើលឃើញថា ទោះបីបងប្អូនប្រជាពលរដ្ឋ​ខ្មែរ​ទៅដល់ទីណា ប្រទេស​ណាក៏ដោយ ពួកគាត់នៅតែប្រកាន់ភ្ជាប់នូវការ​ប្រតិបត្តិ​តាម​ប្រពៃណី វ​ប្បធម៌របស់ខ្មែរ ដោយ​ឯកឧត្តមចូលរួម​​អបអរសាទរ ហើយ​ក៏​ជំរុញ​ឱ្យ​បងប្អូន នៅក្រៅប្រទេសផ្សេងទៀត​ បន្តចូលរួម​សកម្មភាពប្រពៃណីរបស់យើងឱ្យ​បានច្រើន ដើម្បីបង្ហាញវប្បធម៌ ប្រពៃណីរបស់ខ្មែរទៅកាន់បណ្តាប្រទេស​នានានៅលើពិភពលោក ឱ្យគេបានឃើញ ឱ្យគេបានដឹង ពីវប្បធម៌ដ៏ផូផង់របស់ប្រទេស​កម្ពុជា៕