ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលាមធ្យមវិចិត្រសិល្បៈ ដែលជាគ្រឹះស្ថានសិក្សាអប់រំចំណេះទូទៅ និងបច្ចេកទេសជំនាញវិជ្ជាជីវៈសិល្បៈ ស្ថិតក្រោមឱវាទក្រសួងវប្បធម៌ និងវិចិត្រសិល្បៈ នឹងរៀបចំការប្រឡងជ្រើសរើសសិស្សានុសិស្សទាំងពីរភេទ ឱ្យចូលរៀនលើមុខជំនាញសិល្បៈវប្បធម៌ខ្មែរជាច្រើនទម្រង់ ដោយពុំគិតថ្លៃសិក្សាឡើយ សម្រាប់ឆ្នាំសិក្សា ២០២៦-២០២៧ ខាងមុខនេះ។
ផ្អែកតាមសេចក្តីជូនដំណឹងលេខ ០២/២៦ ស.ជ.ណ ចុះថ្ងៃទី២០ ខែសីហា ឆ្នាំ២០២៦ សាលាបានកំណត់លក្ខខណ្ឌ កាលបរិច្ឆេទ និងជំនាញអាទិភាពដូចខាងក្រោម៖
១. មុខជំនាញ និងកម្រិតវប្បធម៌កំណត់
សាលាបែងចែកការបណ្តុះបណ្តាលទៅតាម ៥ សាលាជំនាញឯកទេស រួមមាន៖
សាលាតូរ្យតន្ត្រី
ជំនាញ៖ វីយូឡុង, វីយូឡា, ទ្រអ៊ូ, ទ្រសោ, តាខេ, ឃឹម, គងធំ, គងតូច, រនាតឯក, រនាតធុង។ លក្ខខណ្ឌជ្រើសរើស បញ្ចប់ថ្នាក់ទី៣ ពីសាលាខាងក្រៅ។
ជំនាញ៖ ស្រឡៃ, ប៉ីអ, ប៉ីពក, ខ្លុយ, ទ្រខ្មែរ, ខ្សែដៀវ, ក្លារីណែត, ត្រុំប៉ែត, ត្រុំប៊ិន, សាក់សូ, សែលឡូ, ហ្លុត, ហ្គីតា, កុងត្រឺបាស, ចម្រៀងបុរាណ ។ លក្ខខណ្ឌជ្រើសរើស បញ្ចប់ថ្នាក់ទី៥ ពីសាលាខាងក្រៅ។
ជំនាញ៖ ចម្រៀងជាពួក, អាយ៉ៃ, ចាប៉ីដងវែង ។ លក្ខខណ្ឌជ្រើសរើស បញ្ចប់ថ្នាក់ទី៧ ពីសាលាខាងក្រៅ។
សាលាសិល្បៈសូនរូប
ជំនាញ៖ គំនូរ, វិចិត្រកម្ម, គំនូរបុរាណ, គំនូរផ្សាយ, លម្អក្រណាត់, ចម្លាក់ពុម្ព, ចម្លាក់ប្រាក់, ចម្លាក់ស្ពាន់, ចម្លាក់ឈើ, កុលាលភាជន៍, ខ្នាតតូច ។ លក្ខខណ្ឌជ្រើសរើស បញ្ចប់ថ្នាក់ទី៧ ពីសាលាខាងក្រៅ។
សាលារបាំ
ជំនាញ៖ របាំបុរាណ ឬល្ខោនខោល ។ លក្ខខណ្ឌជ្រើសរើស បញ្ចប់ថ្នាក់ទី៣ ពីសាលាខាងក្រៅ។
ជំនាញ៖ របាំប្រពៃណី លក្ខខណ្ឌជ្រើសរើស បញ្ចប់ថ្នាក់ទី៥ ពីសាលាខាងក្រៅ។
សាលាល្ខោន
ជំនាញ៖ ល្ខោនបាសាក់ ឬល្ខោនយីកេ ។ លក្ខខណ្ឌជ្រើសរើស បញ្ចប់ថ្នាក់ទី៥ ពីសាលាខាងក្រៅ។
ជំនាញ៖ ល្ខោននិយាយ លក្ខខណ្ឌជ្រើសរើស បញ្ចប់ថ្នាក់ទី៧ ពីសាលាខាងក្រៅ។
សាលាសៀក
ជំនាញ៖ លំនឹង, ទន់ភ្លន់, បាល្លេ, ត្រែះ, អាក្រូបាត ។ លក្ខខណ្ឌជ្រើសរើស បញ្ចប់ថ្នាក់ទី៣ ឬថ្នាក់ទី៥ ពីសាលាខាងក្រៅ។
២. វិញ្ញាសាប្រឡង
ការប្រឡងនឹងត្រូវឆ្លងកាត់ពីរដំណាក់កាល រួមមាន៖
1. វិញ្ញាសាប្រឡងចំណេះទូទៅ៖ សិស្សរៀនចប់ថ្នាក់ទី៣, ទី៥ ឬទី៧ ពីសាលាខាងក្រៅ និងបានជ្រើសរើសមុខជំនាញសិល្បៈណាមួយ ត្រូវប្រឡងតាមកម្រិតថ្នាក់ និងឧបនិស្ស័យរបស់ខ្លួន៖
ភាសាខ្មែរ (រយៈពេល ២ម៉ោង០០នាទី តាមកម្មវិធីសិក្សាក្រសួងអប់រំ យុវជន និងកីឡា)
គណិតវិទ្យា (រយៈពេល ២ម៉ោង០០នាទី តាមកម្មវិធីសិក្សាក្រសួងអប់រំ យុវជន និងកីឡា)
2. វិញ្ញាសាប្រឡងបច្ចេកទេសជំនាញ៖
សាលាតូរ្យតន្ត្រី៖ វិញ្ញាសារួមមានស្រែកតាមសំឡេងព្យាណូ, ទះដៃតាមចង្វាក់, ច្រៀង១បទ និងពិនិត្យម្រាមដៃ (រយៈពេល ១០ ទៅ ១៥នាទី)។
សាលាសិល្បៈសូនរូប៖ វិញ្ញាសាគូរគំនូរមើលឃើញដោយប្រើខ្មៅដៃ (គូរវត្ថុមូល ឬវត្ថុទ្រវែង) (រយៈពេល ៣ម៉ោង០០នាទី)។
សាលារបាំ៖ វិញ្ញាសារួមមានពិនិត្យកាយសម្បទា, ទះដៃតាមចង្វាក់, ទេពកោសល្យរាំច្រៀង, សម្ផស្ស និងសុខភាព (រយៈពេល ១០ ទៅ ១៥នាទី)។
សាលាល្ខោន៖ វិញ្ញាសារួមមានពិនិត្យមើលសម្លេង (ច្បាស់ៗលះៗ), នាដកម្ម (សម្តែងឈុតខ្មៅ), ដងខ្លួន (ដំណើរល្អ កាយសម្បទា រូបសម្បត្តិ) (រយៈពេល ១០ ទៅ ១៥នាទី)។
សាលាសៀក៖ វិញ្ញាសាកាយសម្បទា (មិនធ្លាប់បាក់ឆ្អឹង ឬគ្រេចដៃជើង), ភាពទន់ភ្លន់នៃរាងកាយ, រាំងតាមស្នូរទះដៃ ឬចង្វាក់ និងភាពវាងវៃ (រយៈពេល ១០ ទៅ ១៥នាទី)។
៣. សំណុំឯកសារចុះឈ្មោះ
- ពាក្យសុំចុះឈ្មោះប្រឡង (០១ច្បាប់)
- ជីវប្រវត្តិសង្ខេប (០១ច្បាប់)
- សលាកបត្រឯកត្តជន (០១ច្បាប់)
- កាតសិស្ស ឬលិខិតបញ្ជាក់ការសិក្សាពីសាលាដើម (០១ច្បាប់)
- សំបុត្រកំណើតថតចម្លង (០១ច្បាប់)
- រូបថតថ្មី ៤x៦ ថតចំពីមុខ (០៣សន្លឹក)
៤. កាលបរិច្ឆេទ និងទីកន្លែងទទួលពាក្យ
ការចែក និងទទួលពាក្យ៖ ចាប់ផ្តើមទទួលពាក្យពីថ្ងៃជូនដំណឹង រហូតដល់ ថ្ងៃទី២៤ ខែកញ្ញា ឆ្នាំ២០២៦។
កាលបរិច្ឆេទប្រឡង៖ នឹងប្រព្រឹត្តទៅនៅ ថ្ងៃទី២ ខែតុលា ឆ្នាំ២០២៦ (ប្រឡងទាំងវិញ្ញាសាចំណេះទូទៅ និងបច្ចេកទេស)។
ទីកន្លែងផ្ដល់ និងទទួលពាក្យ៖ ការិយាល័យសិក្សានៃសាលាមធ្យមវិចិត្រសិល្បៈ ដែលមានទីតាំងស្ថិតនៅ ផ្លូវឧកញ៉ាម៉ុងឬទ្ធី ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សម្រាប់ព័ត៌មានបន្ថែម សិស្សានុសិស្ស មាតាបិតា និងអាណាព្យាបាល អាចទំនាក់ទំនងសាកសួរផ្ទាល់តាមរយៈលេខទូរស័ព្ទ៖ ០៨៩ ២៥៥ ៣៨៨៕
