ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការបង្រៀនកូនអំពីផលិតភាព គឺជាកិច្ចការសំខាន់ ហើយក៏ជារឿងដែលម្ដាយឪពុកគ្រប់រូបអាចធ្វើបាន។ ផលិតភាព (Productivity) គឺជាជំនាញមួយ ដែលអាចបង្រៀន និងអនុវត្តតាំងពីវ័យក្មេង, ការបង្រៀនជំនាញនេះដល់កូន នឹងផ្ដល់ជាប្រយោជន៍ និងឥទ្ធិពលវិជ្ជមានសម្រាប់អនាគតកូនរបស់អ្នក។ ចំណុចនេះអាចបង្កើតឱកាសល្អៗសម្រាប់កុមារ នឹងធ្វើឱ្យពួកគេទទួលភាពជោគជ័យ ក្នុងការសិក្សា ការងារ និងជីវិតផ្ទាល់ខ្លួន។ ទន្ទឹមនឹងនេះ ឪពុកម្ដាយ និងគ្រូបង្រៀន ដើរតួនាទីយ៉ាងសំខាន់ ក្នុងការអភិវឌ្ឍផលិតភាពកុមារ។
យោងតាម verywell family មានគំនិតសំខាន់ៗ ចំនួន ៥ ដែលអ្នកអាចបង្រៀនកូន ឬសិស្សរបស់អ្នក អំពីការអភិវឌ្ឍផលិតភាព៖
១. សរសេរកិច្ចការដែលត្រូវធ្វើរាល់ថ្ងៃ ៖ ការសរសេរភារកិច្ច ឬកិច្ចការដែលត្រូវធ្វើចូលក្នុងក្រដាស មានប្រយោជន៍ខ្លាំងសម្រាប់កុមារ។ សម្រាប់កុមារ ដែលមិនទាន់ចេះអាន អ្នកអាចបង្កើតបញ្ជីកិច្ចការ ដែលគេត្រូវធ្វើ តាមរយៈការគូររូបភាព ឬរូបថត ដើម្បីឱ្យពួកគេអាចយល់បាន។
២. ប្រើប្រតិទិន ៖ ការប្រើប្រតិទិន ដើម្បីណែនាំកូន ឬកុមារ អំពីរបៀបគ្រប់គ្រងពេលវេលារយៈពេលវែង នឹងអនុញ្ញាតឱ្យពួកគេ រៀនអំពីរបៀបគ្រប់គ្រងពេលរយៈវែងទុកមុនបានល្អ។ នៅក្នុងប្រតិទិននោះ អ្នកអាចជួយពួកគេកំណត់អំពីសកម្មភាពសាមញ្ញ ដែលពួកគេឧស្សាហ៍ធ្វើដូចជា សម្អាតផ្ទះ ការលេងនៅខាងក្រៅ ការធ្វើលំហាត់ ឬក៏ចំណាយពេលជាមួយអេក្រង់ជាដើម។ ការកំណត់សកម្មភាពប្រចាំសប្ដាហ៍ ឬប្រចាំខែទុកមុន មិនត្រឹមតែធ្វើឱ្យកុមារមានផលិតភាពជាងមុននោះទេ ប៉ុន្តែក៏ធ្វើឱ្យពួកគេចេះកំណត់កិច្ចការអាទិភាពក្នុងការរស់នៅផងដែរ។
៣. គ្រប់គ្រងអារម្មណ៍ខកចិត្ត ៖ ក្នុងការរស់នៅ គឺមិនអាចជៀសផុតពីអារម្មណ៍ខកចិត្តនោះទេ។ ប្រសិនបើកូនរបស់អ្នកមិនចេះពីរបៀបគ្រប់គ្រងអារម្មណ៍មួយនេះ ច្បាស់ណាស់ បញ្ហា ឬការរំខានតិចតួច នឹងអាចរំខានដល់ផលិតភាពប្រចាំថ្ងៃរបស់គេ។ អនុញ្ញាតឱ្យកុមារប្រឈម ឬជួបនឹងអារម្មណ៍ខកចិត្ត គឺជាវិធីសាស្ត្រដ៏មានប្រសិទ្ធភាព ដែលអ្នកអាចជួយពួកគេឱ្យចេះទប់ទល់នឹងអារម្មណ៍នេះ។ ប៉ុន្តែ អ្នកជាម្ដាយឪពុក ត្រូវបង្កើតបរិយាកាសសុវត្ថិភាព និងគាំទ្រពួកគេ ហើយជួយឱ្យពួកគេ អាចគ្រប់គ្រងអារម្មណ៍ខ្លួនឯង និងមានចិត្តស្ងប់ នៅពេលគេជួបបញ្ហា។
៤. ពង្រឹងអារម្មណ៍យកចិត្តទុកដាក់ ៖ ការយកចិត្តទុកដាក់ (Mindfulness) មានន័យថា ការផ្ដោតអារម្មណ៍ធ្វើការតែមួយមុខ ក្នុងពេលតែមួយ ហើយអនុវត្តកិច្ចការសំខាន់នៅចំពោះមុខបានល្អ។ ការអនុវត្តនេះ មានសារៈសំខាន់សម្រាប់កុមារក្នុងការពង្រឹងផលិតភាព។ ការប្រើថាមពលដែលអ្នកមាន ផ្ដោត ១០០ភាគរយ ដើម្បីសម្រេចកិច្ចការតែមួយ ក្នុងពេលតែមួយ អាចជួយអ្នកឱ្យសម្រេចកិច្ចការងារបានលឿន និងមានគុណភាព។
៥. បង្កើតចន្លោះ ដើម្បីសម្រាក ៖ ទន្ទឹមនឹងវិធីសាស្ត្រផ្ដោតអារម្មណ៍ និងធ្វើការឱ្យមានផលិតភាព ការបង្កើតចន្លោះពេលវេលា ដើម្បីសម្រាកក៏មានសារៈសំខាន់ខ្លាំងសម្រាប់កុមារដូចគ្នា។ ការអភិវឌ្ឍទម្លាប់ដែលមានផលិតភាព និងរបៀបគិត ដែលយល់ថា ការសម្រាកមានសារៈសំខាន់សម្រាប់សុខភាព នឹងជួយកូនរបស់អ្នកឱ្យរស់នៅដោយរីករាយ និងជោគជ័យក្នុងជីវិត៕
