អាហារ ដែលយើងទទួលទាន មានឥទ្ធិពលយ៉ាងខ្លាំងទៅលើសុខភាពខួរក្បាល រួមទាំងហានិភ័យ នៃការវិវត្តទៅរកជំងឺវង្វេង ។ លោកស្រី Lisa Genova ជាអ្នកវិទ្យសាស្ត្រផ្នែកប្រសាទ ដែលទទួលបានការបណ្ដុះបណ្ដាលពីសាកលវិទ្យាល័យហាវឺត បានណែនាំរបបអាហារ MIND (Mediterranean-DASH Intervention for Neurodegenerative Delay) ៤ ដែលត្រូវបានបង្កើតឡើង ដើម្បីកាត់បន្ថយហានិភ័យ នៃការថយចុះសមត្ថភាពយល់ដឹងរបស់មនុស្សនៅវ័យចំណាស់។

ជាទូទៅរបបអាហារ MIND មានដូចជា ផ្លែបឹរី បន្លែបៃតង គ្រាប់ធញ្ញជាតិ គ្រាប់ផ្លែឈើ ត្រី និងសាច់បក្សី។ ប៉ុន្តែ អ្នកជំនាញបានលើកឡើងថា យើងមិនចាំបាច់អនុវត្តការទទួលទានរបបអាហារនេះឱ្យបានត្រឹមត្រូវល្អឥតខ្ចោះនោះទេ។ ការសិក្សាមួយបានបង្ហាញថា អ្នកដែលអនុវត្តបានត្រឹមកម្រិតមធ្យម អ្នកអាចកាត់បន្ថយហានិភ័យ នៃជំងឺវង្វេងបានរហូតដល់ ៣៧ភាគរយ។ អាហារសំខាន់ៗ ក្នុងចំណោមអាហារទាំងនោះមានដូចជា៖

១. ប្រូតេអ៊ីនគ្មានខ្លាញ់ ៖ ការទទួលទានអាហារ ដែលមានជាតិខ្លាញ់ឆ្អែត អាចរួមចំណែកធ្វើឱ្យមានការកើនឡើង កូលេស្ដូរ៉ុល សម្ពាធឈាម ជំងឺទឹកនោមផ្អែម ជំងឺធាត់ ហើយកត្តាទាំងនេះ ក៏ជាចំណែកនៃការវិវត្តនៃជំងឺវង្វេងដែរ។ ការសិក្សាបានបង្ហាញថា ការទទួលទានសាច់ក្រហមជាប្រចាំ នាំឱ្យចុះខ្សោយមុខងារយល់ដឹងរបស់ខួរក្បាល។ ដូច្នេះ ហើយអ្នកជំនាញបានណែនាំឱ្យទទួលទានប្រូតេអ៊ីនគ្មានខ្លាញ់ ឱ្យបានច្រើនប្រភេទជារៀងរាល់ថ្ងៃ ជាពិសេសគឺ ត្រីសាម៉ុន ត្រីធូណា ស៊ុត និងតៅហ៊ូ ។ អាហារទាំងនេះ គឺជាប្រភពនៃវីតាមីន B និង វីតាមីន D ដែលជាសារធាតុចិញ្ចឹមដ៏សំខាន់ ដើម្បីប្រឆាំង នឹងជំងឺវង្វេង។

២. គ្រាប់ធញ្ញជាតិ ៖ ជំនួសឱ្យការញ៉ាំនំប៉័ង និងបាយ អ្នកជំនាញបានណែនាំឱ្យញ៉ាំនំប៉័ងដែលធ្វើមកពីគ្រាប់ធញ្ញជាតិ អង្ករសម្រូប និង quinoa ដែលជាប្រភពនៃវីតាមីន B ។ ការសិក្សាថ្មីមួយបានរកឃើញថា អ្នកដែលញ៉ាំគ្រាប់ធញ្ញជាតិ ពីរដងក្នុងមួយថ្ងៃ អាចកាត់បន្ថយហានិភ័យនៃការវិវត្តទៅរកជំងឺ វង្វេងរហូតដល់ ៤០ភាគរយ។

៣. បន្លែបៃតង ៖ អ្នកជំនាញលើកឡើងថា បន្លែបៃតងគ្រប់ប្រភេទ មានសារធាតុចិញ្ចឹមខ្ពស់សម្រាប់ខួរក្បាល, បន្លែទាំងនោះមានធាតុសំខាន់ៗដូចជា លូទីន បេតាការរ៉ូទីន និងហ្វូឡែត។ សារធាតុទាំងនេះ ដើរតួនាទីយ៉ាងសំខាន់ ក្នុងការប្រយុទ្ធប្រឆាំងការវិវត្តនៃជំងឺវង្វេង។

៤. គ្រាប់ផ្លែឈើ ៖ គ្រាប់រុក្ខជាតិ និងផ្លែឈើ គឺជាប្រភពដ៏ល្អឥតខ្ចោះ នៃអាស៊ីតខ្លាញ់អូមេហ្គា ៣ ដែលជួយរក្សាកោសិកាខួរក្បាល ឱ្យមានសុខភាពល្អ និងកាត់បន្ថយការរលាក។ អាស៊ីតខ្លាញ់ មានសារៈសំខាន់ខ្លាំងសម្រាប់ខួរក្បាល ប៉ុន្តែរាងកាយរបស់យើង មិនអាចផលិតវាដោយខ្លួនឯងនោះទេ៕