រដ្ឋមន្ត្រីក្រសួងកិច្ចការនារី លោកជំទាវ អ៊ឹង កន្ថាផាវី មានប្រសាសន៍ថា ប្រទេសកម្ពុជា បានមើលឃើញពីវឌ្ឍនភាពគួរឱ្យកត់សម្គាល់ក្នុងវិស័យអប់រំស្ត្រី ការពង្រឹងសេដ្ឋកិច្ច សុខភាព ការទប់ស្កាត់អំពើហិង្សាផ្អែកលើយេនឌ័រ (GBV) និងការដឹកនាំក្នុងរយៈពេល ៣០ឆ្នាំកន្លងមកនេះ។

លោកជំទាវមានប្រសាសន៍ថា កម្ពុជាបានបោះជំហានគួរឱ្យកត់សម្គាល់ក្នុងការជំរុញសមភាពយេនឌ័រ ដោយឈរលើឆន្ទៈនយោបាយដ៏រឹងមាំពីកម្រិតខ្ពស់បំផុត នៃការដឹកនាំ វិធីសាស្ត្ររដ្ឋាភិបាលទាំងមូល និងភាពជាដៃគូរួមបញ្ចូលនៅក្នុងសង្គមស៊ីវិល វិស័យឯកជន និងដៃគូអភិវឌ្ឍន៍។

ក្នុងកិច្ចសម្ភាសន៍ជាមួយកាសែតចិន ស៊ីនហួរ លោកជំទាវ បានមានប្រសាសន៍ថា «ស្ដ្រី និងក្រុមគ្រួសាររបស់ពួកគេបានទទួលអត្ថប្រយោជន៍ពី សន្តិភាពប្រកបដោយចីរភាព ការកាត់បន្ថយភាពក្រីក្រ ការងារសមរម្យ និងកំណើនសេដ្ឋកិច្ចខ្ពស់។»

លោកជំទាវមានប្រសាសន៍បន្ថែមទៀតថា សមភាពយេនឌ័រត្រូវបានកំណត់ជាស្នូលនៃយុទ្ធសាស្ត្រចតុកោណទាំង ៤ដំណាក់កាលរបស់រាជរដ្ឋាភិបាលកម្ពុជា ដោយទទួលស្គាល់ថា «ស្ត្រីគឺជាឆ្អឹងខ្នងនៃសេដ្ឋកិច្ច និងសង្គមកម្ពុជា។»

លោកជំទាវបានបន្ថែមថា រដ្ឋាភិបាលបច្ចុប្បន្នបានបន្តប្តេជ្ញាចិត្តចំពោះកេរ្តិ៍ដំណែលនេះ តាមរយៈយុទ្ធសាស្ត្របញ្ចកោណ ដែលសង្កត់ធ្ងន់លើការវិនិយោគបន្តលើសមភាពយេនឌ័រ និងការកសាងសង្គមស៊ីវិល័យកម្រិតខ្ពស់ ទាំងសីលធម៌ សមធម៌ និងបរិយាប័ន្ន ដែលមាន «ស្ត្រីជាស្នូល» ។

លោកជំទាវរដ្ឋមន្ត្រីក៏បានលើកឡើងពីវឌ្ឍនភាពសំខាន់ៗរបស់កម្ពុជា ក្នុងការអភិវឌ្ឍស្ត្រីផងដែរ។ ដោយលោកជំទាវសង្កត់ធ្ងន់ថា ក្នុងវិស័យអប់រំ ប្រទេសកម្ពុជាស្ទើរតែសម្រេចបានសមភាពយេនឌ័រ នៅកម្រិតអប់រំបឋមសិក្សា (មានសិស្សស្រី ៤៨ភាគរយ សម្រាប់ឆ្នាំាសិក្សា ២០២៤-២០២៥) និងមធ្យមសិក្សា (មានសិស្សស្រី កម្រិតបឋមភូមិ៥២,១ភាគរយ និងទុតិយភូមិ ៥៥,៦ភាគរយ) ដោយមានការពង្រឹងជាបន្តបន្ទាប់នៅថ្នាក់ឧត្តមសិក្សា និងការសិក្សាក្រោយឧត្តមសិក្សា។

លោកជំទាវបន្តថា បច្ចុប្បន្ននិស្សិតស្រីមានចំនួន ៥២,៥១ភាគរយ នៃចំនួនសិស្សថ្នាក់ឧត្តមសិក្សាទូទាំងប្រទេស។ នៅកម្រិតបណ្ឌិត តួលេខស្ត្រីមានចំនួន ១០,៣២ ភាគរយ នៃបេក្ខជនបណ្ឌិតសរុប ១៤៥នាក់ ក្នុងចំណោម ១,៤០៤ នាក់។

ក្នុងការពង្រឹងអំណាចសេដ្ឋកិច្ច លោកជំទាវមានប្រសាសន៍ថា ស្ត្រីដើរតួនាទីយ៉ាងសំខាន់ ក្នុងនាមជាអ្នករកប្រាក់ចំណូលចិញ្ចឹមគ្រួសារ។

លោកជំទាវមានប្រសាសន៍ថា ប្រទេសកម្ពុជា ជាប្រទេសដែលមានអត្រាចូលរួមកម្លាំងពលកម្មពីសំណាក់ស្រ្តីខ្ពស់បំផុតមួយនៅអាស៊ាន ដែលត្រូវបានគាំទ្រដោយកំណើនសេដ្ឋកិច្ច និងការផ្ដល់ប្រព័ន្ធអេកូឡូស៊ីសម្រាប់ការងារសមរម្យ ភាពជាសហគ្រិន និងសេវាថែទាំ (កម្មវិធីគាំពារសង្គម និងកន្លែងថែទាំងកុមារ)។

ក្នុងវិស័យសុខាភិបាល លោកជំទាវលើកឡើងថា អត្រាមរណភាព មាតាបានធ្លាក់ចុះពី ៤៣៧នាក់ ក្នុងចំណោម ២,០០០នាក់ មក ១៥៤នាក់ ក្នុងចំណោម ១០ម៉ីននាក់ នៅក្នុងឆ្នាំ២០២២ ដោយសារលទ្ធភាពទទួលបានសេវាសុខភាពមាតា និងបន្តពូជកាន់តែប្រសើរឡើង។

នៅក្នុងការទប់ស្កាត់ GBV លោកស្រីបាននិយាយថា អត្រាប្រេវ៉ាឡង់អំពើហិង្សារក្នុងគ្រួសារបានធ្លាក់ចុះពី ២៩ភាគរយ ក្នុងឆ្នាំ២០១៤ មកនៅត្រឹម ២១ភាគរយ នៅឆ្នាំ២០២១ តាមរយៈការពង្រឹងការឆ្លើយតបពហុវិស័យ និងសេវាដែលផ្ដោតលើជនរងគ្រោះនៅថ្នាក់ជាតិ និងថ្នាក់ក្រោមជាតិ។

នៅក្នុងភាពជាអ្នកដឹកនាំ លោកជំទាវ បានថ្លែងថា ស្រ្តីមានចំនួន ៤២ភាគរយ ក្នុងការងារជាមន្ត្រីរាជការស៊ីវិល និងកាន់កាប់ ២៧ភាគរយនៃតួនាទីជាអ្នកសម្រេចចិត្ត។ ស្ត្រីមិនមែនគ្រាន់តែជាអ្នកផលិតប៉ុណ្ណោះទេ ពួកគេក៏ជាអ្នកជំរុញការផ្លាស់ប្ដូរ ការបង្កើតថ្មី និងភាពធន់នៃសង្គមផងដែរ៕