គម្រោង Mekong Resilience បានរកឃើញក្រុមយុវជនឆ្នើមចំនួន ៣ ក្រុម ដែលបានជាប់ជ័យលាភី ក្នុងការបង្កើតគំនិតក្នុងការ​ដោះស្រាយបញ្ហា​ជាក់ស្តែងដើម្បីកាត់បន្ថយហានិភ័យគ្រោះមហន្តរាយ ក្នុងកម្មវិធី Youth Ideathon ក្រោមប្រធានបទ “ភាពធន់នឹងគ្រោះមហន្តរាយក្នុងសហគមន៍”។

ក្រុមយុវជនជ័យលាភីទាំង ៣ក្រុមរួមមាន ជ័យលាភីលេខ១ បានទៅលើ ក្រុម Wastelock ដែល​បានបង្កើតប្រព័ន្ធសន្សំពិន្ទុក្នុងសហគមន៍ ដើម្បីលើកកម្ពស់ការគ្រប់គ្រងសំណល់រឹង ពិសេសប្លាស្ទិច ដែលអាចធ្វើ​ឱ្យ​ស្ទះប្រព័ន្ធលូបណ្តាលឱ្យ​មានទឹកជំនន់។

ជ័យលាភីលេខ២ បានទៅលើ ក្រុម Blu Blu ដែល​បាន​បង្កើតឧបករណ៍ត្រួតពិនិត្យគុណភាពខ្យល់ខ្នាតតូច ដើម្បីឱ្យសហគមន៍អាចទទួលបានទិន្នន័យព័ត៌មាន និងអាចត្រៀមបង្ការចំពោះករណីគុណភាពខ្យល់មិនល្អ និងជ័យលាភីលេខ៣ បានទៅលើក្រុម Kaong Kang ដែល​បានបង្កើតគម្រោងយុទ្ធនាការស្តារ និងដាំដើមកោងកាងឡើងវិញ​នៅតំបន់ខេត្តជាប់មាត់សមុទ្រ ដើម្បីជារនាំងទឹកជំនន់ ជួយសហគមន៍មូលដ្ឋាន និងការពារជីវៈចម្រុះសមុទ្រ។

លោក លាន សុខលាភ ប្រធានគម្រោង Mekong Resilience មានប្រសាសន៍ថា​ ថាមពល និងភាពច្នៃប្រឌិតក្នុងបន្ទប់គឺពិតជាមានតម្លៃណាស់។ គំនិតរបស់បេក្ខជនជ័យលាភីទាំងនេះបង្ហាញថា យុវជនកម្ពុជាបានត្រៀមខ្លួនរួចជាស្រេច មិនត្រឹមតែចូលរួមក្នុងកិច្ចខិតខំប្រឹងប្រែងកសាងភាពធន់នឹងគ្រោះមហន្តរាយប៉ុណ្ណោះទេ ប៉ុន្តែពួកគេកំពុងស្វែងរកដំណោះស្រាយជាក់ស្តែង ផ្តោតលើសហគមន៍ និងយុវជន ដែលអាចបង្កើតភាពវិជ្ជមានពិតប្រាកដនៅក្នុងសហគមន៍របស់ពួកគេ។

កម្មវិធី Youth Ideathon ដែលរៀបចំដោយគម្រោង Mekong Resilience មានគោលបំណងបំពាក់ឱ្យយុវជនកម្ពុជានូវចំណេះដឹង ជំនាញ និងភាពជាអ្នកដឹកនាំ ដើម្បីពង្រឹងកិច្ចខិតខំប្រឹងប្រែងកសាងភាពធន់នឹងគ្រោះមហន្តរាយនៅក្នុងសហគមន៍។ អ្នកចូលរួម ដែលជានិស្សិតមកពីសាកលវិទ្យាល័យ និងមជ្ឈដ្ឋាននានា បានចំណាយពេលមួយសប្តាហ៍សិក្សាពីអ្នកជំនាញ និងធ្វើការជាក្រុមដើម្បីបង្កើតគំនិតដំណោះស្រាយដែលសមស្រប និងឆ្លើយតបទៅនឹងបញ្ហាប្រឈមនៃគ្រោះមហន្តរាយមួយចំនួនរបស់កម្ពុជា។

ពេញមួយកម្មវិធី អ្នកចូលរួមទទួលបានការបណ្តុះបណ្តាលនូវចំណេះដឹង ជំនាញ និងគំនិតច្នៃប្រឌិតជាបន្តបន្ទាប់ ដែលចែករំលែកដោយវាគ្មិនជំនាញចំនួនប្រាំមួយរូប មកពីវិស័យសាធារណៈ ឯកជន និងវិស័យអភិវឌ្ឍន៍។ ពួកគេបានសិក្សាលើប្រធានបទពាក់ព័ន្ធដូចជា ការគ្រប់គ្រងគ្រោះមហន្តរាយ នវានុវត្តន៍ និងបច្ចេកវិទ្យាក្នុងការឆ្លើយតបនឹងគ្រោះមហន្តរាយ ភាពធន់នឹងគ្រោះមហន្តរាយក្នុងសហគមន៍ ការកំណត់បញ្ហា និងដំណោះស្រាយ ការគ្រប់គ្រងគម្រោង ការបង្កើតទំនាក់ទំនង និងការរចនាគំនិត។ ការបណ្តុះបណ្តាលរួមបញ្ចូលគ្នានូវការណែនាំតម្រង់ទិស ជាមួយនឹងឧទាហរណ៍ជាក់ស្តែង ដោយជួយឱ្យយុវជនបានយល់ពីរបៀបដែលផែនការឆ្លើយតបនឹងគ្រោះមហន្តរាយអាចត្រូវបានប្រែក្លាយទៅជាសកម្មភាពក្នុងមូលដ្ឋាន។

លោក ហ៊ុន ពិសិដ្ឋ សាស្ត្រាចារ្យសាកលវិទ្យាល័យអន្តរជាតិផ៉ារ៉ាហ្គន និងជាគណៈកម្មការផ្តល់ពិន្ទុ មានប្រសាសន៍ថា ក្រុមយុវជនជ័យលាភីទាំងនេះ កំពុងផ្លាស់ប្តូរការរៀនសូត្រទៅជាភាពជាអ្នកដឹកនាំ, លោកថា ពួកគេកំពុងដោះស្រាយបញ្ហាដែលប៉ះពាល់ដល់យើងទាំងអស់គ្នា ហើយពួកគេកំពុងធ្វើវាដោយភាពច្នៃប្រឌិត និងជាក់ស្តែង។ នេះជាអ្វីដែលការកសាងភាពធន់នឹងគ្រោះមហន្តរាយសហគមន៍ត្រូវការ។

គម្រោង Mekong Resilience គឺជាគំនិតផ្តួចផ្តើមដែលដឹកនាំដោយយុវជន ដែលមានការជូនដំណឹង និងពង្រឹងសមត្ថភាពក្នុងការកាត់បន្ថយហានិភ័យគ្រោះមហន្តរាយ។ Mekong Resilience ត្រូវបានជ្រើសរើសជាគំនិតផ្តួចផ្តើមយុវជនឆ្នើមមួយក្នុងចំណោមគំនិតផ្តួចផ្តើមយុវជនឆ្នើមចំនួន ២២នៅអាស៊ីអាគ្នេយ៍ ដើម្បីទទួលបានជំនួយអនុវត្តគម្រោងពី YSEALI Seeds for the Future 2025 ដែលផ្តល់មូលនិធិដោយ US Mission to ASEAN៕