សុខភាពខួរក្បាលដើរតួនាទីសំខាន់ក្នុងការចងចាំកិច្ចការសំខាន់ៗ និងការអភិវឌ្ឍបញ្ញាស្មារតី ហើយដើម្បីបំពេញចំណុចសំខាន់ៗទាំងនេះបាន ការសង្កេត និងអនុវត្តន៍ទម្លាប់ប្រចាំថ្ងៃអាចជួយបំពេញថាមពលខួរក្បាលឱ្យកាន់តែមានភាពប្រសើរឡើងតាមរយៈសកម្មភាពសាមញ្ញដូចជា ជ្រើសរើសវិតាមីនមកទទួលទាន, យកចិត្តទុកដាក់លើគុណភាពដំណេក, ការសិក្សារៀនសូត្របន្ថែម, ធ្វើលំហាត់ប្រាណ, ការអាន និងការទទួលទានអាហារឱ្យបានត្រឹមត្រូវ។ តាមរយៈគេហទំព័រ  INC បានលម្អិតបញ្ជាក់បន្ថែមដូចខាងក្រោម។

១. ការប្រើប្រាស់វិតាមីន ៖ ឱសថមានវិតាមីន ចាត់ជាសកម្មភាពមួយដែលងាយស្រួល ក្នុងការរក្សាទម្លាប់ជាងគេ និងពង្រឹងទៅកាន់សុខភាពដែលចុះថមថយ ជាពិសេសក្រុមមនុស្សដែលមានវ័យចំណាស់ ព្រោះពួកគាត់ត្រូវការវិតាមីន ដែលមានជីវជាតិចម្រុះជាច្រើនក្នុងការស្រូបយកថាមពលទៅកាន់រាងកាយ បង្កើនការចងចាំ ជាពិសេសជំនួយទៅផ្នែកខួរក្បាល។

២. ការគេងមានគុណភាព ៖ គេងឱ្យបានគ្រប់គ្រាន់មានសារៈសំខាន់ ប៉ុន្តែការទទួលទានដំណេកឱ្យមានគុណភាពរឹងរឹតតែសំខាន់ ដោយហេតុថា គុណភាពដំណេក អាចពង្រឹងទាំងសុខភាពផ្លូវកាយ និងសុខភាពចិត្ត ដូចជា បង្កើនអារម្មណ៍ស្រស់ស្រាយ កាត់បន្ថយស្រ្តេស រក្សាសាច់ដុំឱ្យមានតុល្យភាព និងរក្សាបាននូវគុណភាពជីវិត។

៣. ការរៀនភាសាទីពីរ ៖​ ការសិក្សាភាសាបន្ថែម ឬពង្រឹងភាសាទីពីរ ឱ្យទៅភាសាផ្លូវការដែលអាចប្រើប្រាស់បាន មានតួនាទីជួយឱ្យខួរក្បាលកាន់តែមានឥទ្ធិពល ដោយហេតុថា សកម្មភាពនៃការរៀនភាសាបន្ថែមបានជំរុញជំនាញនៃការដោះស្រាយបញ្ហា ការឆ្លាស់គ្នាពីភាសាមួយទៅភាសាមួយ បង្កើនភាពបត់បែន និងភាពច្នៃប្រតិដ្ឋ។

៤. មានសកម្មភាពមុនពេលអង្គុយរៀន ៖ ការបង្កើតជាហ្គេមសម្រាប់ធ្វើឱ្យរាងកាយ និងខួរក្បាលមានភាពសកម្ម មុនពេលចាប់ផ្តើមអង្គុយស្មឹងស្មាធិ៍ថ្នាក់រៀន បានរួមចំណែកឱ្យស្មារតីប្រាជ្ញាមានកម្លាំង សម្ពាធឈាមដើរស្រួល និងកាត់បន្ថយស្រ្តេស។

៥. អានជាការកម្សាន្ត ៖ អានមានច្រើនទម្រង់ ដោយឡែកការអាន ដោយមិនដាក់សម្ពាធ គឺជាការជ្រើសរើសប្រភេទសៀវភៅ ឬសម្ភារៈណាដែលផ្តល់នូវភាពរីករាយ ជំនួស​​​​​ឱ្យការអានសៀវភៅដែលគ្រូដាក់ឱ្យធ្វើលំហាត់ ឬក៏អត្ថបទស្រាយជ្រាវដែលត្រូវការគិតច្រើន។ គួរជម្រាបជូនថាសៀវភៅកម្សាន្តគឺជាសាច់រឿងដែលផ្តល់នូវភាពរីករាយ រំភើប និងហេតុការណ៍ចម្លែកដែលនឹកស្មានមិនដល់, កត្តាទាំងនេះបានរួមចំណែកដល់ការអភិវឌ្ឍសមត្ថភាខួរក្បាល៕