ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងកម្មវិធីផ្ដល់ឈាមសង្គ្រោះជីវិត រៀបចំដោយសហភាពសហព័ន្ធយុវជនកម្ពុជា រាជធានីភ្នំពេញ សហការជាមួយសមាគមមីក្រូហិរញ្ញវត្ថុកម្ពុជា សមាគមធនាគារកម្ពុជា ធនាគារជាតិនៃកម្ពុជា នាព្រឹកថ្ងៃទី១៦ ខែកក្កដា ឆ្នាំ២០២៤ លោកវេជ្ជបណ្ឌិត ខៃ សុខហេង អនុប្រធានការិយាល័យបច្ចេកទេសនៃមជ្ឈមណ្ឌលជាតិផ្ដល់ឈាម មានប្រសាសន៍ថា ការបរិច្ចាគឈាមនេះ ពិតជាមានសារៈសំខាន់ខ្លាំងណាស់សម្រាប់អ្នកជំងឺដែលត្រូវការចាក់បញ្ចូលឈាមជាចាំបាច់។ លោកថា បើគ្មានការបរិច្ចាគឈាមទេ នឹងមិនអាចសង្គ្រោះអ្នកដែលបាត់បង់ឈាមលើសពី៣០ភាគរយទាន់ពេលវេលានោះឡើយ។
លោកវេជ្ជបណ្ឌិត ខៃ សុខហេង មានប្រសាសន៍ថា លក្ខខណ្ឌអ្នកដែលអាចបរិច្ចាគឈាមបាន គឺត្រូវមានសុខភាពល្អ គីឡូគ្រប់គ្រាន់ (អាចចាប់ពី៤៥គីឡូឡើង) មិនប្រឈមនឹងមេរោគឆ្លងគ្រប់ប្រភេទ និងមានអាយុចាប់ពី ១៨-៦០ឆ្នាំ។ ចំណែក អ្នកដែលមិនអាចបរិច្ចាគឈាមបាន គឺអ្នកដែលមានសម្ពាធឈាមទាបពេក គេងមិនគ្រប់គ្រាន់ មានជំងឺមេរោគថ្លើម B មេរោគថ្លើម C មេរោគស្វាយ គឺមិនអាចបរិច្ចាគឈាមបានទេ។
អនុប្រធានការិយាល័យបច្ចេកទេសនៃមជ្ឈមណ្ឌលជាតិផ្ដល់ឈាម បន្ថែមថា ការដកឈាម ៣៥០មីលីលីត្រចេញពីរាងកាយ គឺស្មើ៦ភាគរយនៃចំណុះឈាមប៉ុណ្ណោះ គឺមិនទាមទារឱ្យអ្នកបរិច្ចាគឈាមត្រូវតមកម្លាំងនោះឡើយ ដោយពួកគេអាចហាត់កីឡាបន្តិចបន្តួច ហូបអាហារឱ្យបានគ្រប់គ្រាន់ នោះឈាមនឹងកើតឡើងវិញ។ ម៉្យាងវិញទៀត បើទោះជាមិនបរិច្ចាគ ក៏ឈាមនឹងងាប់ទៅវិញដោយឯកឯងក្នុងមួយថ្ងៃចាប់ពី ២០ទៅ២៥មីលីលីត្រ។
បើតាមលោកវេជ្ជបណ្ឌិត ខៃ សុខហេង ការរៀបចំកម្មវិធីបរិច្ចាគឈាមដែលមានក្រុមហ៊ុន សិស្ស និស្សិត មន្រ្តីរាជការចូលរួម គឺពិតជាបានជួយទៅដល់អ្នករងគ្រោះដែលត្រូវការឈាមជាចាំបាច់។ អំពើល្អនេះ ជាសកម្មភាពសប្បុរសធម៌មួយដែលមិនអាចកាត់ថ្លៃបាននូវទឹកចិត្តដ៏ប្រពៃក្នុងការចូលរួមផ្ដល់ឈាម។
ជាមួយគ្នានេះ លោកវេជ្ជបណ្ឌិត ខៃ សុខហេង ក៏បានសំណូមពរឱ្យប្រជាពលរដ្ឋខ្មែរដែលមានអាយុចន្លោះពី ១៨-៦០ឆ្នាំ ទម្ងន់ពី៤៥គីឡូឡើងទៅ មានសុខភាពល្អ អាចចូលរួមបរិច្ចាគឈាម ដើម្បីរួមចំណែកជួយដល់អ្នកដែលត្រូវការឈាម។ ទន្ទឹមគ្នានេះ ការចូលរួមបរិច្ចាគឈាមនៅមានកម្រិត ហើយអ្នកស្ម័គ្រចិត្តចូលរួមបរិច្ចាកឈាមមានស្ទើ ២០ភាគរយនៃចំណុះឈាមដែលមាន និងតម្រូវការឈាមដែលត្រូវការ។
គួរជម្រាបជូនថា ការបរិច្ចាគឈាមឱ្យបានទៀងទាត់ អាចធ្វើឱ្យរាងកាយមានសុខភាពល្អ កាត់បន្ថយជំងឺមហារីក ជួយដល់ប្រព័ន្ធសរសៃឈាមបេះដូង និងកាត់បន្ថយការធាត់លើសទម្ងន់ជាដើម។ ក្នុងនោះ បុរសអាចបរិច្ចាគឈាមរៀងរាល់ ៣ខែម្ដង រីឯស្រ្តីអាចបរិច្ចាគឈាម រៀងរាល់ ៤ខែម្ដង៕
