នៅថ្ងៃទី១៦ កក្កដា នេះ សហភាពសហព័ន្ធយុវជនកម្ពុជារាជធានីភ្នំពេញ សមាគមមីក្រូហិរញ្ញវត្ថុកម្ពុជា សមាគមធនាគារកម្ពុជា ធនាគារជាតិនៃកម្ពុជា និងមជ្ឈមណ្ឌលជាតិផ្ដល់ឈាម បានរៀបចំកម្មវិធីបរិច្ចាគឈាម ក្រោមប្រធានបទ «រួមគ្នា សង្គ្រោះជីវិត» ដែលកំពុងតែប្រព្រឹត្តិទៅអគារខេមរានី ក្នុងសង្កាត់ព្រែកលាភ រាជធានីភ្នំពេញ។ អ្នកចូលរួមបរិច្ចាគបានបង្ហាញអារម្មណ៍រីករាយ និងថា ការបរិច្ចាគឈាមនេះ មិនត្រឹមតែជួយដល់សុខភាពខ្លួនឯង តែក៏បានជួយដល់សង្គមជាតិផងដែរ។

លោកស្រី យឿន បុប្ផា ជាបុគ្គលិក នៃសម្បត្តិហ្វានែន បានលើកឡើងថា ការបរិច្ចាគឈាមមានសារៈសំខាន់ខ្លាំងណាស់សម្រាប់ខ្លួនឯង និងសង្គមជាតិរបស់យើងព្រោះថា សង្គមជាតិយើងបច្ចុប្បន្នកំពុងត្រូវការចាំបាច់ឈាមសម្រាប់ជួយសង្រ្គោះដល់អ្នកងាយរងគ្រោះដូចជា មាតាដែលសម្រាលកូន អ្នកលាងឈាម អ្នកមានជំងឺខ្វះឈាម អ្នករបួសដោយគ្រោះថ្នាក់ផ្សេងៗជាដើម។ លោកស្រី បន្ថែមថា ដូចនេះអ្នកដែលមានសុខភាពល្អសូមកុំមានការភ័យខ្លាច និងគួរតែចូលរួមបរិច្ចាគឈាមឱ្យបានទៀងទាត់ ដែលមានរយៈពេល៦ខែ ឬមួយឆ្នាំម្ដងព្រោះអាចជួយខ្លួនឯង និងជួយដល់សង្គមជាតិខាងក្រៅផងដែរ។

ជាមួយគ្នានេះ លោក សុខ ប៊ុនធា ជាបុគ្គលិក នៃគ្រឹះស្ថានមីក្រូហិរញ្ញវត្ថុខេមា ដែលបានមកបរិច្ចាគឈាមដែរបានមានប្រសាសន៍ថា បុគ្គលគ្រប់រូប និងស្ថាបនផ្សេងៗគួរមានការចូលរួមចំណែកក្នុងការបរិច្ចាគឈាមឱ្យបានច្រើនព្រោះអាចជួយដល់សុខភាពរបស់ខ្លួនឯងផ្ទាល់ដោយសារតែបើយើងមិនបរិច្ចាគឈាមទេនោះកោសិកាចាស់ៗរបស់យើងនឹងត្រូវខូចហើយកើតឡើងមកថ្មីដដែលដូចនេះគួរតែបរិច្ចាគ។ លើសពីនេះ ការបរិច្ចាគឈាមក៏អាចជួយដល់សង្គមជាតិយ៉ាងច្រើនជាពិសេសអាចជួយដល់អ្នកដែលកំពុងត្រូវការឈាមជាចាំបាច់។

«ការបរិច្ចាគឈាមលើកទី៥របស់ខ្ញុំនេះ ធ្វើឱ្យខ្ញុំកាន់តែសប្បាយចិត្តព្រោះអាចជួយឱ្យអ្នកដទៃទទួលបានឈាម និងអាចជួយសង្គ្រោះជីវិតអ្នកដទៃផងដែរ»

លោក សុខ ប៊ុនធា

ទាំងលោកស្រី យឿន បុប្ផា និង លោក សុខ ប៊ុនធា បានលើកទឹកចិត្តដល់យុវជន យុវនារីទាំងអស់ និងអ្នកដែលមានសុខភាពល្អ សូមចូលរួមបរិច្ចាគឈាមឱ្យបានទៀងទាត់ និងច្រើនដងព្រោះការបរិច្ចាគឈាមនេះអាចជួយសង្រ្គោះជីវិតដល់មនុស្សបានជាច្រើននាក់។

សូមបញ្ជាក់ដែរថា បើយោងតាមវេជ្ជសាស្រ្ត ការបរិច្ចាគឈាមទៀងទាត់ជាប្រចាំ គឺអាចជួយកាត់បន្ថយហានិភ័យការគាំងបេះដូង បង្ហាញពីបញ្ហាសុខភាពដែលអាចកើតមាន រក្សាតុល្យភាពជាតិដែក កាត់បន្ថយហានិភ័យជំងឺមហារីក និងជួយសង្គ្រោះជីវិតផងដែរ៕