ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងកម្មវិធីបរិច្ចាគឈាម «រួមគ្នាសង្រ្គោះជីវិត» រៀបចំឡើងដោយសហភាពសហព័ន្ធយុវជនកម្ពុជារាជធានីភ្នំពេញ សហការជាមួយសមាគមមីក្រូហិរញ្ញវត្ថុកម្ពុជា សមាគមធនាគារកម្ពុជា ធនាគារជាតិនៃកម្ពុជា និងមជ្ឈមណ្ឌលជាតិផ្ដល់ឈាម នាព្រឹកថ្ងៃទី១៦ កក្កដា លោកជំទាវ តិមា វិច្ឆិកាល អនុប្រធានសហភាពសហព័ន្ធយុវជនកម្ពុជាមានប្រសាសន៍ថា ការបរិច្ចាគឈាម គឺជាកាយវិកាដ៏ប្រពៃ និងថ្លៃថ្នូរបំផុត។
លោកជំទាវមានប្រសាសន៍ថា ការបរិច្ចាគឈាមមួយប្លោក មិនមែនត្រឹមសង្រ្គោះជីវិតមនុស្សដែលត្រូវការឈាមតែម្នាក់នោះទេ តែអាចជួយជីវិតមនុស្សដល់ទៅ៣នាក់ ខណៈបច្ចុប្បន្នមិនទាន់មានអ្នកវិទ្យាសាស្រ្តណាម្នាក់អាចរកឃើញសាធាតុគីមីដែលអាចផ្សំចេញជាឈាមបាននៅឡើយ ។ ដូច្នេះ ការបរិច្ចាគឈាមមួយប្លោក គឺអាចជួយសង្រ្គោះជីវិតមនុស្សដល់ទៅ៣នាក់ ដែលនេះ គឺជាកាយវិកាដ៏ប្រពៃ និងថ្លៃថ្នូរ។
“សាកស្រមៃមើល យើងផ្តល់ឈាម យើងជួយសង្រ្គោះជីវិតមនុស្សដល់៣នាក់ ផ្តល់ក្តីសង្ឃឹមដល់ក្រុមគ្រួសារ៣គ្រួសារ នេះជាកាយវិកាដ៏ល្អ”
លោកជំទាវ តិមា វិច្ឆិកាល អនុប្រធានសហភាពសហព័ន្ធយុវជនកម្ពុជារាជធានីភ្នំពេញ
ជាមួយគ្នានេះលោកជំទាវ តិមា វិច្ឆិកាល ក៏បានលើកទឹកចិត្តទៅដល់យុវជនខ្មែរគ្រប់រូប ដែលចង់ចូលរួមផ្តល់ត្រឡប់មកវិញដល់សង្គមជាតិ សូមចូលរួមការងារស្ម័គ្រចិត្ត ឬអាចចាប់ផ្តើមពីសកម្មភាពផ្តល់ឈាមនេះ។ បើតាមការបញ្ជាក់របស់លោកជំទាវ « គុណតម្លៃរបស់ ស.ស.យ.ក. នៅក្នុងចំណោមគុណតម្លៃទាំង១៥ គឺរួមមាន ការងារស្ម័គ្រចិត្ត ឆន្ទៈតែមួយ និងស្មារតីជាក្រុម ហើយអ្វីដែលអ្នកទាំងអស់គ្នាបានធ្វើនៅថ្ងៃនេះ គឺជាការចូលរួមក្នុងឆន្ទៈ តែមួយ បានន័យថា ខ្មែរតែមួយ»។
ឆ្លៀតក្នុងឱកាសនោះដែរ លោកជំទាវ ក៏បានអំពាវនាវដល់យុវជនទាំងអស់ បន្តនូវសកម្មភាពបរិច្ចាគឈាម ហើយនឹងចូលរួមបំផុសស្មារតីរួមគ្នាសង្រ្គោះជីវិតនេះឱ្យកាន់តែសុះសាយគ្រប់ទីកន្លែង និងកាន់តែទូលំទូលាយថែមទៀត៕
