សមាគមយុវជនជនជាតិដើមភាគតិចកម្ពុជា កំពុងប្រកាសផ្ដល់កន្លែងស្នាក់នៅសម្រាប់បេក្ខជនចំនួន២០រូប ដែលមិនមានលទ្ធភាពក្នុងអំឡុងពេលបន្តការសិក្សានៅទីក្រុងភ្នំពេញ តាមបណ្ដាវិទ្យាស្ថាន និងសាកលវិទ្យាល័យនានា សម្រាប់ឆ្នាំសិក្សា២០២៥-២០២៦។

លក្ខខណ្ឌនៃបេក្ខជន ៖​ ជាជនជាតិដើមភាគតិច មានសញ្ជាតិខ្មែរ មានទីលំនៅក្នុងព្រះរាជាណាចក្រកម្ពុជា ដែលកំពុងសិក្សាថ្នាក់ទី១២ ឬមានសញ្ញាបត្រមធ្យមសិក្សាទុតិយភូមិ (មានសុពលភាព៣ឆ្នាំចុះក្រោម គិតចាប់ពីថ្ងៃផ្សាយដំណឹងតទៅ) ហើយមិនទាន់បានបន្តការសិក្សាថ្នាក់បរិញ្ញាបត្រ។ មានអាយុមិនលើស២៥ឆ្នាំ (គិតត្រឹមថ្ងៃផុតកំណត់ដាក់ពាក្យ) មានប្រវត្តិល្អ មានការតស៊ូរៀនសូត្រ មានឆន្ទៈខ្ពស់ក្នុងការចូលរួមអភិវឌ្ឍសហគមន៍ជនជាតិដើមភាគតិច និងប្រទេសជាតិ មកពីគ្រួសារដែលមានជីវភាពលំបាក ខ្វះលទ្ធភាពក្នុងការបង់ថ្លៃស្នាក់នៅដើម្បីបន្តការសិក្សានៅភ្នំពេញ។ លើសពីនេះ បេក្ខជន ជាបុគ្គលដែលមានសមត្ថភាពប្រឡងចូលតាមសាកលវិទ្យាល័យដោយខ្លួនឯង (ក្នុងករណីជ្រើសរើសសាកលវិទ្យាល័យដែលតម្រូវឱ្យមានការប្រឡងចូល)។ អាហារូបករណ៍ ផ្ដល់អាទិភាពដល់យុវជន ដែលធ្លាប់ចូលរួមការងារសង្គម ជាពិសេសអ្នកធ្លាប់ចូលរួមការងារជួយសហគមន៍ជនជាតិដើមភាគតិច និងលើកទឹកចិត្តស្ត្រី និងក្មេងស្រីជនជាតិដើមភាគតិចដែលមានឆន្ទៈបន្តការសិក្សាថ្នាក់ឧត្ដមសិក្សា។

បេក្ខជននឹងទទួលបាន កន្លែងស្នាក់នៅរហូតបញ្ចប់ការសិក្សាថ្នាក់បរិញ្ញាបត្រ និងវគ្គបណ្ដុះបណ្ដាលពង្រឹងសមត្ថភាពជាប្រចាំរាល់ខែ។ ផ្ដល់អាហារូបករណ៍សិក្សាថ្នាក់បរិញ្ញាបត្រដោយឥតគិតថ្លៃនៅតាមបណ្ដាសាកលវិទ្យាល័យ និងវិទ្យាស្ថានដៃគូរបស់សមាគម មានឱកាសហាត់ការការងារជាមួយសមាគម និងស្ថាប័នដៃគូរបស់សមាគម ការផ្លាស់ប្ដូរការសិក្សានៅសមាគមន៍ជនជាតិដើមភាគតិចក្នុង និងក្រៅប្រទេស វគ្គបំប៉នភាសាអង់គ្លេស និងកុំព្យូទ័រក្រៅម៉ោង (បន្ថែមដល់យុវជនស្នាក់នៅផ្ទះសមាគមដោយឥតគិតថ្លៃ) និងវគ្គចែករំលែក ផ្លាស់ប្ដូរបទពិសោធន៍ជាប្រចាំពីរៀមច្បងអតីតនិស្សិតឆ្នើមៗជាប្រចាំ។

គួរជម្រាបថា ការចំណាយថ្លៃធ្វើដំណើរទៅដាក់ពាក្យ និងចូលរួមសម្ភាសន៍ជាបន្ទុករបស់បេក្ខជន។ បេក្ខជនអាចជ្រើសរើសវិទ្យាស្ថាន ឬសាកលវិទ្យាល័យដៃគូសមាគម ដើម្បីសិក្សាដោយឥតគិតថ្លៃ ប៉ុន្តែបេក្ខជនក៏អាចជ្រើសរើសសិក្សានៅសាកលវិទ្យាល័យក្រៅពីដៃគូសមាគម ក្នុងករណីបេក្ខជនទទួលបានអាហារូបករណ៍ដោយខ្លួនឯង ឬមានបន្ទុកបង់ថ្លៃសិក្សាដោយខ្លួនឯង។ សមាគមនឹងផ្ដល់អាទិភាពដល់បេក្ខជនមកពីគ្រួសារដែលមានជីវភាពខ្វះខាត និងមិនមានសមាជិកគ្រួសារធ្លាប់ទទួលអាហារូបករណ៍ពីសមាគមពីមុនមក។

ដើម្បីដាក់ពាក្យ បេក្ខជនអាចដាក់ពាក្យស្នើសុំអាហារូបករណ៍ទៅកាន់សមាគមវិធីសាស្ត្រខាងក្រោម៖

១. បេក្ខជអាចមកសុំដាក់ពាក្យ និងដាក់ពាក្យ ដោយផ្ទាល់នៅទីស្នាក់ការសមាគមយុវជនជនជាតិដើមភាគតិចកម្ពុជា ដែលមានអាសយដ្ឋាននៅ ផ្ទះលេខ៣៩២ ផ្លូវលេខ១០M ភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ឬទំនាក់ទំនងទៅកាន់ ០១២ ៨២៩ ៧១៧។

២. អាចទាញយកពាក្យតាមរយៈ Cambodia Indigenous Youth Association-CIYA ។

៣. ទាញយកពាក្យទៅបំពេញ និងផ្ញើពាក្យមកសមាគមវិញតាមរយៈ ៖ scholarshipinfo@ciyanet.org ឬ sochhatroeut@ciyanet.org ។

ចាប់ទទួលការចុះឈ្មោះពីថ្ងៃផ្សាយដំណឹងរហូតដល់ថ្ងៃទី១៥ ខែសីហា ឆ្នាំ២០២៥៕