គុណភាពរស់នៅ សំដៅលើការប្រើប្រាស់ជីវិតផ្ទាល់ខ្លួនដោយមានអត្ថន័យ តាមរយៈការរស់នៅមានផាសុកភាព មានសកម្មភាពផ្លូវកាយជាប្រចាំ និងការជៀសចាកពីជំងឺនានា, គុណភាពរស់នៅទៀតសោតគឺមិនមែនផ្តោតតែលើចំនួននៃអាយុដែលចង់រស់នៅនោះទេ ប៉ុន្តែចង់ផ្តោតលើការប្រើប្រាស់ពេលវេលារស់នៅដែលអាចសម្រេចក្ដីប្រាថ្នា ជារួមគឺផ្តោតលើគុណភាព ជាជាងបរិមាណ។ តាមរយៈគេហទំព័រ Mindbodygreen បានបង្ហាញគន្លឹះ៣ចំណុច ដើម្បីផ្តោតលើគុណភាពរស់នៅមិនត្រឹមតែរំពឹងអាយុវែង។

១. ទម្លាប់សកម្មភាពផ្លូវកាយប្រចាំថ្ងៃ​ឱ្យក្លាយជាការពិត ៖ មានសកម្មភាពមួយចំនួន ដែលគួរតែរាប់បញ្ចូលទៅក្នុងទម្លាប់ប្រចាំថ្ងៃ ដើម្បីផ្តោតលើគុណភាពជីវិតដូចជា ការសាកល្បងសកម្មភាព ដែលតម្រូវឱ្យបញ្ចេញកម្លាំងកាយ ទៅទីតាំងហាត់ប្រាណ និងជ្រើសរើសវិធីដែលមានភាពប្រកួតប្រជែងជាមួយនឹងខ្លួនឯង។ ​

បន្ថែមពីនោះ ក៏មានរួមបញ្ចូល សកម្មភាពលោតហក់ដូចជា លោតខ្សែពួរ ជិះកង់ រត់ ដើរដំណើរស្វាហាប់ ជិះកង់ ឡើងភ្នំ និងសកម្មភាពដែលត្រូវប្រើកម្លាំងខ្លាំងៗមួយចំនួនទៀត។ ក្រៅតែពីហ្វឹកហាត់ឱ្យមានភាពរស់រវើក  ការអនុញ្ញាតឱ្យរាងកាយមានភាពបត់បែនយឺតៗ តាមរយៈការហាត់យូហ្កា និងការដកដង្ហើម​មួយៗ ក៏ជាចំណុចមិនគួរមើលរំលង។ បន្ទាប់ពីអនុវត្តន៍រាល់សកម្មភាពចម្រុះដែលបានរៀបរាប់ខាងលើហើយ ការបែងចែកពេលធ្វើដោយមានតុល្យភាពសុទ្ធសឹងតែជាកិច្ចដែលមិនអាចមើលរំលង។

២. ចាប់ផ្តើមមានទម្លាប់សមាធិ ៖ សកម្មភាព សមាធិ បានរួមចំណែក គាំទ្រទៅកាន់សុខភាពផ្លូវចិត្តនិងកាយ រួមទាំងសុខភាពខួរក្បាល។ បន្ថែមពីនោះ សុខភាពខួរក្បាលបានរួមចំណែកទៅកាន់សុខភាពរាងកាយ និងកាត់បន្ថយអាការស្រ្តេស។

៣. បង្កើតទំនាក់ទំនងនិងដាក់គោលដៅ ៖ ជាទូទៅ ពេលដែលនិយាយដល់គោលដៅ គេតែងរម្លឹកគិតទៅដល់ការបង្កើតអាជីវកម្ម ការធ្វើដំណើរឆ្ងាយៗ និងការផ្លាស់ប្តូរ សកម្មភាពធំៗណាមួយ។ តែយ៉ាងណាមិញ ការចំណាយពេលឱ្យបានច្រើនជាមួយគ្រួសារ និងមិត្ត​ភក្តិ​ និងបង្ហាញក្ដីស្រឡាញ់ជាមួយសត្វ សុទ្ធសឹងតែជាចំណែកសំខាន់ៗក្នុងការរក្សាគុណភាពជីវិត៕