ភ្នំពេញ – កម្មវិធីទូរស័ព្ទដៃកំណត់ត្រាទឹកនោមផ្អែម CarnetDia ដែលបង្កើតឡើងដោយលោកវេជ្ជបណ្ឌិត ស៊ុំ សត្ថា ទីប្រឹក្សាមជ្ឈមណ្ឌលកម្ពុជា ៤.០ បានឈ្នះពានរង្វាន់បច្ចេកវិទ្យានវានុវត្តន៍សង្គមល្អបំផុតឆ្នាំ២០២២ ។ កម្មវិធីបច្ចេកវិទ្យានេះ រួមចំណែកផ្សព្វផ្សាយអំពីអត្ថប្រយោជន៍ និងគុណសម្បត្តិនៃកម្មវិធីទៅកាន់បណ្តាអ្នកពាក់ព័ន្ធរួមមានវេជ្ជបណ្ឌិតឯកទេស គិលានុបដ្ឋាក ឱសថការី និងសាធារណជនទូទៅ ។

ឯកឧត្តម ហ៊ុន ម៉ានី ប្រធានក្រុមប្រឹក្សាភិបាលនៃមជ្ឈមណ្ឌលកម្ពុជា ៤.០ មានប្រសាសន៍នៅក្នុងពិធីអបអរសាទរកម្មវិធីទូរស័ព្ទដៃ កំណត់ត្រាទឹកនោមផ្អែម CarnetDia ថា ស្របពេលដែលប្រទេសជាតិមានការរីកចម្រើនលើគ្រប់វិស័យ ការប្រឈមនឹងជំងឺកាចសាហាវផ្សេងៗក៏កើតមានឡើងកាន់តែច្រើនផងដែរ ដូចជាជំងឺបេះដូង សសៃឈាម និងជំងឺទឹកនោមផ្អែមជាដើម ដែលទាមទារឱ្យវិស័យសុខាភិបាលត្រូវបង្កើនការយកចិត្តទុកដាក់កាន់តែខ្ពស់ជាងមុន ។ ការអភិវឌ្ឍបច្ចេកវិទ្យាក្នុងវិស័យសុខាភិបាល ពិតជាបានផ្តល់ភាពងាយស្រួលទាំងសម្រាប់អ្នកជំងឺ និងវេជ្ជបណ្ឌិតក្នុងការលើកកម្ពស់គុណភាពនៃការតាមដាន ព្យាបាលជំងឺ ។

ឯកឧត្តមប្រធានក្រុមប្រឹក្សាភិបាលបានបញ្ជាក់បន្ថែមថា ជាក់ស្តែង ការរៀបចំបង្កើតកម្មវិធីទូរស័ព្ទនេះ កើតចេញពីទស្សនវិស័យមួយដែលក្រុមការងារបានចាប់ផ្តើមសិក្សា និងធ្វើការលើគម្រោងនេះតាំងពីឆ្នាំ២០១៨ ។ មជ្ឈមណ្ឌលកម្ពុជា ៤.០ ថ្លែងអំណរគុណយ៉ាងជ្រាលជ្រៅចំពោះលោកវេជ្ជបណ្ឌិត ស៊ុំ សត្ថា ជាស្ថាបនិកគម្រោង ដែលបានខិតខំប្រឹងប្រែងអស់កម្លាំងកាយ ចិត្ត ក្នុងការអភិវឌ្ឍកម្មវិធីនេះឡើងដើម្បីជាអត្ថប្រយោជន៍ដល់ប្រជាពលរដ្ឋទូទៅ ដែលអាចទាញយកទៅប្រើប្រាស់ដោយឥតគិតថ្លៃ។ មជ្ឈមណ្ឌលប្តេជ្ញាចិត្តក្នុងការបន្តអភិវឌ្ឍកម្មវិធីឱ្យកាន់តែមានភាពងាយស្រួល និងទំនើបស្របតាមការវិវឌ្ឍនៃបច្ចេកវិទ្យា ។

សូមជម្រាបដែរថា ពិធីអបអរសាទរកម្មវិធីទូរស័ព្ទដៃ កំណត់ត្រាទឹកនោមផ្អែម CarnetDia បានរៀបចំឡើងដោយមជ្ឈមណ្ឌលកម្ពុជា ៤.០ កាលពីល្ងាចថ្ងៃទី១៣ ខែមករា ឆ្នាំ២០២៣ កន្លងទៅ ។ កម្មវិធីទូរស័ព្ទនេះ បានផ្តួចផ្តើមបង្កើតឡើងដោយមានការគាំទ្រពីមជ្ឈមណ្ឌលកម្ពុជា ៤.០ និងសមាគមបច្ចេកវិទ្យាទឹកនោមផ្អែម និងក្រពេញកម្ពុជា ក្នុងបុព្វហេតុបម្រើផលប្រយោជន៍សង្គមជាតិ ដើម្បីលើកកម្ពស់បញ្ជ្រាបការយល់ដឹងដល់អ្នកជំងឺទឹកនោមផ្អែម និងសាធារណជន ដោយប្រើប្រាស់បច្ចេកវិទ្យាឌីជីថលជាឧបករណ៍ជំនួយ ៕