បរទេស ៖ ​គ្រោះថ្នាក់ផ្សេងៗនៅ​លើ​អ៊ីនធឺណិតគឺជា​បញ្ហា​ស្មុគស្មាញមួយ ដែលបញ្ហាប្រឈមជាច្រើនកំពុងបន្តមាននៅលើបណ្តាញសង្គមដូចជា ការរំលោភបំពាន ការកេងប្រវ័ញ្ចផ្លូវភេទលើកុមារ ការនិយាយស្អប់ខ្ពើម ព័ត៌មានមិនពិត ការធ្វើអត្តឃាត និងខ្លឹមសារទាក់ទងនឹងការធ្វើបាបខ្លួនឯងជាដើម កំពុង​ត្រូវ​បានផ្សព្វផ្សាយ​នៅ​លើ​ប្រព័ន្ធអ៊ីនធឺណេត ដែល​វាកំពុង​ក្លាយ​ជា​បញ្ហា​ដ៏​ស្មុគស្មាញ និង​ព្រួយ​បារម្ភ។

យោង​តាម​ការ​ចុះផ្សាយ​របស់ WeForum បច្ចុប្បន្ន​មានមនុស្ស​ជាង៥ពាន់លាននាក់បានប្រើប្រាស់​អ៊ីនធឺណេត ក្នុងនោះ​ជាធម្មតា​ពួក​គេ​ចំណាយ​ច្រើន​ជាង​៤០ភាគរយ នៃជីវិត​ប្រចាំថ្ងៃរបស់ពួកគេ និង​ច្រើនជាង​២ម៉ោង​ក្នុង​មួយ​ថ្ងៃលើ​បណ្តាញ​សង្គម។ គេ​ក៏​បានប៉ាន់​ប្រមាណដែរថា អ្នក​ប្រើប្រាស់​អ៊ិនធឺណេត​ម្នាក់ក្នុង​ចំណោម​៣នាក់ គឺជា​កុមារ​ដែលមាន​អាយុក្រោម​១៨ឆ្នាំ ហើយ​កុមារ​ប្រហែល ៨០ភាគរយបានរាយការណ៍ពីអារម្មណ៍គ្រោះថ្នាក់ នៃការរំលោភបំពានផ្លូវភេទ ឬការកេងប្រវ័ញ្ចលើអ៊ីនធឺណិត។

ប្រឈមនឹង​បញ្ហា​នេះ សម្ព័ន្ធវេទិកាសេដ្ឋកិច្ចពិភពលោកសម្រាប់សុវត្ថិភាពឌីជីថល ដែល​ប្រមូលផ្តុំដោយក្រុមការងារចម្រុះរួមមានក្រុមហ៊ុនបច្ចេកវិទ្យា និង​អង្គការ​ពិភពលោក​នានា ដូចជា Microsoft, WeProtect Global Alliance, Meta, Amazon, Google, OHCHR, Ofcom UK, Global Partners Digital បានចេញ​គោលការណ៍ណែនាំមួយ​ចំនួន​ដើម្បីជំរុញសុវត្ថិភាពឌីជីថលនៅ​ក្នុង​ឧស្សាហកម្ម និងសង្គម។ គោល​ការណ៍​ទាំងនោះ​រួមមាន ៖

ទីមួយ ៖ អ្នកប្រើប្រាស់​ប្រព័ន្ធអ៊ីនធឺណេត ឬបណ្តាញ​សង្គម​ទាំងអស់គួរតែសហការគ្នាដើម្បីបង្កើតបរិយាកាសអនឡាញដែលមានសុវត្ថិភាព ជឿជាក់ និងរួមបញ្ចូលគ្នា ។ ការសម្រេចចិត្តណាមួយ​ គឺគួរតែត្រូវបានធ្វើឡើងដោយផ្អែកលើភស្តុតាង ការយល់ដឹង និងទស្សនៈចម្រុះ ។ តម្លាភាពគឺមានសារៈសំខាន់ ហើយការច្នៃប្រឌិតគួរតែត្រូវបានជំរុញ។

ទីពីរ ៖ រដ្ឋាភិបាលគួរបែងចែករវាងខ្លឹមសារខុសច្បាប់ និងខ្លឹមសារដែលស្របច្បាប់។ ចំពោះខ្លឹមសារបង្ហោះណាដែលអាចបង្កគ្រោះថ្នាក់ គឺគួរមានវិធានការណ៍ណាមួយស្របតាមផ្លូវច្បាប់ ដើម្បីធានាការគោរពច្បាប់ គោលនយោបាយ និងការពារសិទ្ធិអ្នកប្រើប្រាស់ទាំងអស់ ។

ទីបី ៖ អ្នកផ្តល់សេវាកម្មអនឡាញគួរប្តេជ្ញាគោរពសិទ្ធិមនុស្ស និងបង្កើតគោលនយោបាយដើម្បីធានាសុវត្ថិភាព ហើយវាត្រូវបញ្ចូលជាស្តង់ដារ និងសហការជាមួយអ្នកផ្តល់សេវាកម្មអនឡាញផ្សេងៗទៀត។

មិនត្រឹមតែប៉ុណ្ណោះ ក្រុមសង្គមស៊ីវិល និងអង្គការមិនមែនរដ្ឋាភិបាលក៏ដើរតួនាទីយ៉ាងសំខាន់ក្នុងការជំរុញសុវត្ថិភាពឌីជីថល និងការលើកកម្ពស់សិទ្ធិមនុស្សផងដែរ ដោយពួកគេគួរ​ផ្តល់នូវការយល់ដឹងចំពោះផលប៉ះពាល់នៃសុវត្ថិភាពអនឡាញ និងសេរីភាពនៅលើបណ្តាញអនឡាញ ដើម្បីប្រឆាំងនឹងការរំលោភបំពាន និងការកេងប្រវ័ញ្ចផ្លូវភេទលើកុមារតាមអ៊ីនធឺណិត ភាពជ្រុលនិយមជាដើម៕