ភ្នំពេញ – គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ ត្រូវបានជ្រើសរើសជាដៃគូក្នុងក្របខណ្ឌអាស៊ាន-កូរ៉េ ក្នុងការបណ្តុះបណ្តាលសិស្ស សិក្ខាកាមមកពីបណ្តាប្រទេសអាស៊ាន។

គម្រោងនេះ ត្រូវបានចុះកិច្ចព្រមព្រៀងដោយក្រសួងការងារ និងបណ្តុះបណ្តាលវិជ្ជាជីវៈ ជាមួយនឹង សភាពាណិជ្ជកម្ម និងឧស្សាហកម្មកូរ៉េ (The Korea Chamer of Commerce and Industry) នៃសាធារណរដ្ឋកូរ៉េ និងវិទ្យាស្ថានពហុបច្ចេកទេសព្រះកុសុមៈ នៃក្រសួងការងារ និងបណ្តុះបណ្តាលវិជ្ជាជីវៈ ជាអ្នកអនុវត្តគម្រោង។

ឯកឧត្តមបណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងពិធីបើកវគ្គបណ្តុះបណ្តាលស្តីពី “ប្រព័ន្ធបញ្ជាសៀគ្វីដោយ ភី អិល ស៊ី-PLC Sequence Control” ក្រោមកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈចល័តអាស៊ាន-កូរ៉េ (ASEAN-ROK TVET Mobility Programme) កាលពីចុងសប្តាហ៍នេះមានប្រសាសន៍ថា គោលបំណងនៃវគ្គបណ្តុះបណ្តាល ធ្វើឡើងដើម្បីផ្តល់ចំណេះដឹង និងជំនាញនៅក្នុងការសរសេរកម្មវិធី PLC Programe ដើម្បីធ្វើឱ្យប្រព័ន្ធប្រតិបត្តិការ នៃប្រព័ន្ធគ្រប់គ្រងប្រព័ន្ធស្វ័យប្រវត្តិកម្មនៅក្នុងគម្រោងឧស្សាហកម្ម ឬក៏ខ្សែសង្វាក់ផលិតកម្មប្រកបដោយប្រសិទ្ធភាព ចំណេញពេលវេលា និងសន្សំសំចៃ ជាពិសេសដើម្បីលើកកម្ពស់ជំនាញបច្ចេកទេសឱ្យដើរទាន់សម័យឧស្សាហកម្ម៤.០ ។

ឯកឧត្តមបន្តថា វគ្គបណ្តុះបណ្តាលនេះមានរយៈពេល៣ខែ ចាប់ពីថ្ងៃទី១១ ខែកក្កដា ឆ្នាំ២០២៣ ដល់ថ្ងៃទី៨ ខែតុលា ឆ្នាំ២០២៣ ដោយមានសិក្ខាកាមចូលរួមចំនួន២៥នាក់ នៅក្នុងនោះសិក្ខាកាមជាគ្រូគឺមានចំនួន៧នាក់ និងសិស្សចំនួន១៨នាក់ មកពី៥ប្រទេសផ្សេងគ្នា នៅក្នុងនោះ ៧នាក់មកពីប្រទេសកម្ពុជា ២នាក់មកពីប្រ៊ុយណេ ៥នាក់មកពីប្រទេសឥណ្ឌូនេស៊ី ៦នាក់មកពីភូមា និង ៥នាក់មកពីហ្វីលីពីន ។ វគ្គបណ្តុះបណ្តាលនេះ គឺមានសិក្សាទ្រឹស្តី និងអនុវត្តនៅវិទ្យាស្ថានពហុបច្ចេកទេសព្រះកុសុមៈរយៈពេល២ខែ និងចុះហាត់ការនៅក្រុមហ៊ុនចំនួន១ខែផងដែរ។

សូមបញ្ជាក់ដែរថា តាមរយៈគម្រោងនេះដែរ វិទ្យាស្ថានពហុបច្ចេកទេសព្រះកុសុមៈនឹងត្រូវរៀបចំវគ្គបណ្តុះបណ្តាលមួយទៀតនៅដើមឆ្នាំ២០២៤ ដែលមានរយៈពេល ៣ខែ ដូចគ្នា (រយៈពេល ២ខែសិក្សានៅវិទ្យាស្ថានពហុបច្ចេកទេសព្រះកុសុមៈ និងរយៈពេល ១ខែ ត្រូវអនុវត្តការងារជាក់ស្តែងនៅតាមរោងចក្រ សហគ្រាស)៕