​សុភមង្គល​ពិតប្រាកដ​មិន​មែន​មាន​ន័យ​ថា​ ​ជីវិត​ដែល​គ្មាន​បញ្ហា​នោះ​ទេ​។ ​យោង​តាម​អ្នក​ជំនាញ​ផ្នែក​សុខភាព​ ​និង​ចិត្តវិទ្យា ​សុភមង្គល​ដែល​ស្ថិតស្ថេរ​គឺ​កើត​ចេញពី​ការ​បង្កើត​ទម្លាប់​ល្អ​ៗ​ តុល្យភាព​ក្នុង​ចិត្ត​ ​និង​ការ​រស់នៅ​មាន​ន័យ​។ ​វិទ្យាសាស្ត្រ​បាន​បង្ហាញ​ថា​ ​យើង​អាច​សាង​សុភមង្គល​បាន​ដោយ​ខ្លួនឯង​ តាមរយៈ​ការ​អនុវត្ត​ទម្លាប់​សាមញ្ញ​ៗ​ទាំង ​៧​ ​នេះ​៖​

​១.​ ចង​មិត្តភាព​ និង​មើលថែ​គ្រួសារ​

​ការ​មាន​ទំនាក់ទំនង​ល្អ​ជាមួយ​មនុស្ស​ជុំវិញ​ខ្លួន​ ​គឺជា​កត្តា​សំខាន់​បំផុត​មួយ​ក្នុង​ការ​កំណត់​សុភមង្គល​រយៈពេល​វែង​។ ​តាម​បែប​ជីវសាស្ត្រ​ ​ការ​ជជែក​លេង​ ​ឬ​សួរសុខទុក្ខ​គ្នា​ដោយ​ចិត្ត​ចង់​ដឹង​ ​ចង់​ឮ​ពិតប្រាកដ​ ​នឹង​ជួយ​ឱ្យ​ខួរក្បាល​បញ្ចេញ​អម៉ូន​រីករាយ​ ​(​ដូចជា​ ​Oxytocin​ ​និង​ ​Dopamine​) ​ដែល​ជួយ​កាត់បន្ថយ​ស្ត្រេស​។ ​ដូច្នេះ​សូម​ចំណាយ​ពេល​សួរសុខទុក្ខ​ឪពុក​ម្តាយ​ ​បងប្អូន​ ​ឬ​មិត្តភក្តិ​ដោយ​ក្តីបារម្ភ​ពិតប្រាកដ​ ​ទោះបីជា​ការ​សន្ទនា​ខ្លី​ៗ​ក៏ដោយ​។​

​២. ​ចេះដឹង​គុណ​ ​និង​មើលឃើញ​តម្លៃ​នៃ​រឿង​ល្អ​ៗ​

​ការ​ដឹងគុណ​គឺជា​របាំង​ការពារ​ចិត្ត​ពី​អារម្មណ៍​អវិជ្ជមាន​។ ​អ្នកស្រាវជ្រាវ​រកឃើញ​ថា​ ​មនុស្ស​ដែល​ចូលចិត្ត​កត់​ចំណាំ​ ​ឬ​នឹកឃើញ​ដល់​រឿង​ល្អ​ៗ​ដែល​បាន​កើតឡើង​ក្នុង​ជីវិត​ ​ទោះជា​រឿង​តូចតាច​ក៏ដោយ​ ​តែងតែ​មាន​សុខភាព​ផ្លូវចិត្ត​ល្អ​ និង​មិន​សូវ​ស្ត្រេស​។ ​ដូច្នេះ​ ​នៅ​ពេលព្រឹក​ព្រលឹម​ ​ឬ​មុនពេល​ចូល​គេង ​ចូរ​ចំណាយ​ពេល​ ​១​ ​ទៅ​ ​២​ ​នាទី​ ​គិត​ដល់​រឿង​ល្អ​ៗ​ដែល​អ្នក​មាន​ ​ដូចជា​ ​មាន​អាហារ​បរិភោគ​គ្រប់គ្រាន់​ ​មាន​សុខភាព​ល្អ​អាច​ដកដង្ហើម​បាន​ស្រួល ​ឬ​បាន​ញ៉ាំ​កាហ្វេ​/​តែ​ដ៏​ឆ្ងាញ់​មួយ​កែវ​។​

​៣.​ ​ធ្វើ​អំពើ​ល្អ​ ​និង​ចិត្ត​សប្បុរស​

​ការ​ជួយជ្រោមជ្រែង​អ្នកដទៃ​មិន​ត្រឹមតែ​ធ្វើឱ្យ​អ្នក​ទទួលបាន​ផល​ល្អ​នោះ​ទេ​ ​តែ​វា​ក៏​ធ្វើឱ្យ​ខួរក្បាល​របស់​អ្នក​បញ្ចេញ​សារធាតុ​ដែល​ជួយ​សម្រួល​សម្ពាធ​ឈាម​ និង​កាត់បន្ថយ​ភាព​តានតឹង​ផងដែរ​។ ​ការ​ធ្វើ​អំពើ​ល្អ​ ធ្វើឱ្យ​យើង​មាន​អារម្មណ៍​ថា​ខ្លួនឯង​មាន​តម្លៃ​។ ​អ្នក​អាច​ចាប់ផ្តើម​ពី​ទម្លាប់​តូច​ៗ​ដូចជា​ ​ការ​ជួយ​កាន់​អីវ៉ាន់ធ្ងន់​ៗ​ឱ្យ​អ្នកដទៃ​ ​ការ​បើកបរ​ផ្តល់​អាទិភាព​ដល់​អ្នក​ថ្មើរជើង​ជាដើម​។

​៤.​ ​ធ្វើ​ចលនា​រាងកាយ​ ​(​ហាត់ប្រាណ​)

​ការ​ធ្វើ​ចលនា​រាងកាយ​គឺ​អាច​ជួយ​ឱ្យ​យើង​មាន​អារម្មណ៍​ល្អ​។ ​លំហាត់ប្រាណ​ជួយ​បង្កើន​សារធាតុ​ ​Serotonin​ ​និង​ ​Dopamine​ ​(​សារធាតុ​រីករាយ​) ​និង​ជួយ​កាត់បន្ថយ​ ​cortisol​ ​(​សារធាតុ​ស្ត្រេស)​។ ​អង្គការ​សុខភាព​ពិភពលោក​ ​និង​ ​CDC​ ​ណែនាំ​ឱ្យ​មនុស្ស​ពេញ​វ័យ​ធ្វើ​ចលនា​កម្រិត​បង្គួរ​ឱ្យ​បាន​ ​១៥០​ ​នាទី​ក្នុង​មួយ​សប្ដាហ៍​។ ​អ្នក​មិន​ចាំបាច់​រត់​ទៅ​រក​ក្លឹប​ហាត់ប្រាណ​ទំនើប​ក៏​បាន​ដែរ​ ការ​ដើរ​ហាត់ប្រាណ​នៅ​តាម​សួនច្បារ​សាធារណៈ​នា​ពេលព្រឹក​ព្រលឹម​ ការ​ជិះ​កង់ ​ឬ​ការ​រាំ​កម្សាន្ត​សុទ្ធតែ​ជា​ការ​ហាត់ប្រាណ​ដ៏​ប្រសើរ​។​

​៥. ​ចេះ​រីករាយ​ក្នុង​បច្ចុប្បន្នភាព​

​ជារឿយ​ៗ​នៅពេល​មាន​រឿង​រីករាយ​កើតឡើង​ ​យើង​តែងតែ​រំលង​វា​ទៅ​វិញ​យ៉ាង​លឿន​។ ​ការ​ចេះ​ទម្លាក់​អារម្មណ៍​យឺត​ៗ ​ដើម្បី​សម្លឹង​មើល​ និង​ទទួលយក​ភាព​ស្រស់ស្អាត​នៅ​ចំពោះមុខ​ ​នឹង​ជួយ​បង្ហាត់​ខួរក្បាល​ឱ្យ​ចងចាំ​ ​និង​បង្កើត​ផ្លូវ​ដើរ​នៃ​ក្តីសុខ​បាន​កាន់តែ​ងាយស្រួល​។​

​ការ​អនុវត្ត​ ​៖ ​នៅពេល​អ្នក​ឃើញ​ផ្កា​រីក​ស្អាត ​ពេល​បាន​ឮ​សំឡេង​សើច​របស់​កូន​ៗ​ ​ឬ​ពេល​បាន​សម្រាក​ក្រោម​ម្លប់​ឈើ​ត្រជាក់ ​ចូរ​ឈប់​មួយ​ខណៈ​ ​ហើយ​ស្រូបយក​អារម្មណ៍​រីករាយ​នោះ​ឱ្យ​បាន​ពេញលេញ​ ​មុននឹង​បន្ត​ទៅ​ធ្វើ​ការងារ​ផ្សេង​ទៀត​។​

​៦. ​ធ្វើ​ការងារ​ដែល​មាន​ន័យ​ និង​គុណ​តម្លៃ​

​សុភមង្គល​មិន​មែន​មាន​តែ​រឿង​សប្បាយ​ហ៊ឺហា​នោះ​ទេ​ ​តែ​វា​ក៏​ត្រូវការ​ «​គោលបំណង​ជីវិត​» ​ផងដែរ​។ ​ការ​ធ្វើ​អ្វី​មួយ​ដែល​ស្រប​នឹង​គុណ​តម្លៃ​ផ្ទាល់ខ្លួន​ (​ដូចជា​ ​ការ​ចង់​ចេះដឹង​ ​ការ​សម្រេច​ជោគជ័យ​ ​ឬ​ការ​លះបង់​) ​ជួយ​ឱ្យ​យើង​មាន​ភាព​ធន់​នឹង​ឧបសគ្គ​ជីវិត​។ ​ចូរ​ស្វែងរក​សកម្មភាព​ដែល​អ្នក​ស្រឡាញ់​ ​និង​មាន​ប្រយោជន៍​ ​ដូចជា​ ​ការ​រៀន​ជំនាញ​ថ្មី​ៗ​ ​(​ភាសា ​បច្ចេកវិទ្យា​) ​ឬ​ការ​ចូលរួម​ការងារ​ស្ម័គ្រចិត្ត​ជួយ​សង្គម​ ​និង​សហគមន៍​របស់​អ្នក​។​

​៧. ​ធ្វើ​សមាធិ​ចម្រើន​មេត្តា​ធម៌​

​ការ​អង្គុយ​ស្ងៀមស្ងាត់​ ដកដង្ហើម​វែង​ៗ​ ​និង​ផ្សាយ​មេត្តា​ធម៌​នា​ឱ្យ​អ្នកដទៃ​ជួប​តែ​សេចក្តីសុខ ​(​ស្រប​តាម​ប្រពៃណី​ព្រះពុទ្ធ​សាសនា​) ​គឺជា​វិធីសាស្ត្រ​ដ៏​មាន​ឥទ្ធិពល​បំផុត​ ​ក្នុង​ការ​ជម្រុះ​ភាព​ហ្មងសៅ ​និង​បង្កើត​សន្តិភាព​ក្នុង​ចិត្ត​។​

​សរុប​មកវិញ​ ​សុភមង្គល​ពិតប្រាកដ​មិន​មែន​រត់​តាម​រក​យើង​នោះ​ទេ ​គឺ​យើង​ជា​អ្នកបង្កើត​វា​ដោយ​ខ្លួនឯង​ជារៀងរាល់​ថ្ងៃ​ តាមរយៈ​សកម្មភាព​តូច​ៗ​ ​ការ​មើល​ថែ​មនុស្ស​ជុំវិញ​ខ្លួន​ និង​ការ​រក្សា​ចិត្ត​ឱ្យ​ស្ងប់​៕