ភ្នំពេញ – សិស្សានុសិស្សកម្រិតមធ្យមសិក្សាចំនួន១២០នាក់ដែលកំពុងសិក្សានៅតាមវិទ្យាល័យនានាក្រោមការជួយឧបត្ថម្ភពីអង្គការដើម្បីភាពញញឹមនៃកុមារ (PSE) នឹងទទួលបានការបណ្តុះបណ្តាលភាសាអង់គ្លេសតាមបែបសតវត្សទី២១ ដែលមានការបង្ហាត់បង្រៀនដោយលោកគ្រូ អ្នកគ្រូជនជាតិខ្មែរ និងបរទេស តាមរយៈសៀវភៅសិក្សាសម្បូរបែប ពីវិទ្យាស្ថានអភិវឌ្ឍវិស័យអប់រំ (EDI)។

ការផ្តល់ជូននេះ គឺធ្វើឡើងក្រោមកិច្ចសហប្រតិបត្តិការរវាងវិទ្យាស្ថានអភិវឌ្ឍវិស័យអប់រំ (EDI) និងអង្គការដើម្បីភាពញញឹមនៃកុមារ (PSE) ក្នុងការបង្កើនចំណេះដឹងភាសាអង់គ្លេសដល់យុវជន ដែលបានចុះហត្ថលេខាកាលពីថ្ងៃទី១២ ខែមិថុនា ឆ្នាំ២០២៣។

លោក គុជ សាវ៉ាត នាយកវិទ្យាស្ថានអភិវឌ្ឍវិស័យអប់រំ (EDI) បានមានប្រសាសន៍ថា

“ការបណ្តុះបណ្តាលភាសាអង់គ្លេសសម្រាប់សិស្សដែលស្ថិតនៅក្រោមការឧបត្ថម្ភពីអង្គការដើម្បីភាពញញឹមនៃកុមារ(PSE) នេះ មានលក្ខណល្អប្លែកដោយសារកម្មវិធីរៀបចំឡើងដោយបញ្ចូលជំនាញបែបសតវត្សទី២១ ដែលសិស្សទទួលបានចំណេះដឹង ព្រមទាំងប្រើប្រាស់ភាសាអង់គ្លេសសម្រាប់ការទំនាក់ទំនងឱ្យកាន់តែប្រសើរ។ វិទ្យាស្ថាន ក៏នឹងផ្តល់ជូនវគ្គសិក្សាទម្លាប់ល្អទាំង៧សម្រាប់បុគ្គលឆ្នើម ដោយជំរុញជំនាញទន់ ភាពជាអ្នកដឹកនាំដល់បុគ្គលិក នៃអង្គការដើម្បីភាពញញឹមនៃកុមារ (PSE) ផងដែរ ដោយវគ្គសិក្សានេះផ្តល់ការអប់រំផ្នែកផ្នត់គំនិត និងបណ្តុះបណ្តាលឱ្យបុគ្គលិកចេះប្រើប្រាស់ឥរិយាបថល្អ ចេះធ្វើការជាក្រុម  ចេះគិតបែបឈ្នះ-ឈ្នះ និងដើម្បីឆ្លើយតបនឹងតម្រូវការបរិបទទីផ្សារការងារ ក៏ដូចជាក្លាយអ្នកដឹកនាំឆ្នើមនៅពេលអនាគត”។

លោកបានបន្តថា  វិទ្យាស្ថាននឹងផ្តល់ការគាំទ្របន្ថែម ជាការលើកទឹកចិត្តដល់សិស្សឆ្នើម PSE នូវតម្លៃសិក្សា ពិសេសណាមួយ  ព្រមទាំងវគ្គសិក្សាអប់រំនានាដែលជាការជួយលើកកំពស់ផ្នែកអប់រំ  និងជំនាញទន់ជាច្រើនទៀត។

លោកស្រី  Leakhena des Pallieres នាយិកាគ្រប់គ្រងទូទៅនៃអង្គការដើម្បីភាពញញឹម នៃកុមារ (PSE) បានលើកឡើងថា

“ដោយមើលឃើញពីតម្រូវការជាក់ស្តែងក្នុងការពង្រឹងជំនាញភាសាអង់គ្លេសសំរាប់សិស្សានុសិស្ស និងភាពជាដៃគូរដ៏ល្អរវាងវិទ្យាស្ថានកន្លងមកនោះ អង្គការដើម្បីភាពញញឹមនៃកុមារ (PSE) បន្តចាប់ដៃគូជាមួយវិទ្យាស្ថានអភិវឌ្ឍវិស័យអប់រំ ក្នុងការបណ្តុះបណ្តាលជំនាញភាសាអង់គ្លេស និងពិចារណាក្នុងការសហការលើផ្នែកអប់រំនានាជាច្រើនទៀត។ មិនត្រឹមតែប៉ុណ្ណោះ PSE នឹងផ្តល់ជូននូវការប្រើប្រាស់កម្មវិធីសិក្សាបន្ថែមដែលរួមមានថ្នាក់តន្ត្រី តារាងបាល់ទាត់  និងវេទិកាចែករំលែកចំណេះដឹងផ្សេងៗទៀត ជាមួយបណ្តាញសាលារៀនវ៉េស្ទឡាញន៍”។

សូមជម្រាបថា វិទ្យាស្ថានអភិវឌ្ឍវិស័យអប់រំ ចាប់ដំណើរការតាំងពីឆ្នាំ២០០៨ ក្នុងការផ្តល់នូវសេវាកម្មអប់រំ សេវាកម្មប្រឹក្សាយោបល់ សេវាកម្មបណ្តុះបណ្តាលផ្នែកជំនួញ និងសេវាស្រាវជ្រាវ ក្នុងគោលបំណងអភិវឌ្ឍសមត្ថភាពរបស់បុគ្គលិក អ្នកគ្រប់គ្រង និងអ្នកជំនួញនៅក្នុងប្រទេសកម្ពុជា វិទ្យាស្ថានបានទទួលនូវសិទ្ធផ្តាច់មុខក្នុងការប្រើប្រាស់ និង ចែកចាយនូវកម្មវិធីអប់រំ “ទម្លាប់ទាំង៧ របស់បុគ្គលឆ្នើម” សម្រាប់អ្នកសិក្សា និងស្ថាប័នអប់រំ” ពីក្រុមហ៊ុន Franklin Covey Education ផងដែរ៕