ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – កម្មវិធីសិក្សា និងសៀវភៅសិក្សាគោលភាសាអង់គ្លេសថ្មី ពីថ្នាក់ទី១០-១២ ដែលផលិតដោយ ESC-Kizuna និងមូលនិធិនីបប៉ុន របស់ជប៉ុន ត្រូវបានប្រកាសឱ្យប្រើប្រាស់ជាផ្លូវការ ដោយគេរំពឹងថា សៀវភៅថ្មីនេះ នឹងធ្វើឱ្យសិស្សងាយយល់ និងបង្កើនគុណភាពភាសាអង់គ្លេសរបស់សិស្សានុសិស្ស។
លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា កាលពីមុន អង្គការគីហ្សូណា បានអភិវឌ្ឍកម្មវិធីសិក្សាភាសាអង់គ្លេសកម្រិតមធ្យមសិក្សាទុតិយភូមិ សៀវភៅសិក្សាគោលថ្មី និងសោតុបករណ៍បង្រៀនភាសាអង់គ្លេស “English is Fun” ដែលឥឡូវនេះត្រូវបានប្រើប្រាស់នៅសាលាមធ្យមសិក្សាទុតិយភូមិទូទាំងប្រទេស។ សៀវភៅសិក្សាគោលថ្មីនេះ ងាយស្រួលយល់ និងងាយអនុវត្តជាងសៀវភៅមុនៗ ហើយសង្កេតឃើញថាចំនួនសិស្សដែលចូលចិត្តភាសាអង់គ្លេសបានកើនឡើង។
លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា
“យើងសង្ឃឹមថា ការរៀនភាសាអង់គ្លេសមិនផ្តោតសំខាន់តែនៅក្នុងតំបន់ទេសចរណ៍ និងទីក្រុងប៉ុណ្ណោះទេ។ ថែមទាំងសង្ឃឹមថា ចំនួនអ្នកនិយាយភាសាអង់គ្លេសនឹងមានការកើនឡើងច្រើនទូទាំងប្រទេសកម្ពុជា”
លោក អ៊ូអិណុ អាត់ស៊ូស៊ី ឯកអគ្គរដ្ឋទូតជប៉ុនប្រចាំកម្ពុជា បានសំដែងការពេញចិត្តដែលមូលនិធិនីបប៉ុនសហការជាមួយអង្គការគីហ្សូណា ក្នុងការអភិវឌ្ឍភាសាអង់គ្លេសនៅក្នុងវិស័យអប់រំនៅប្រទេសកម្ពុជា។ លោកឯកអគ្គរដ្ឋទូត ជឿជាក់ថា ភាសាអង់គ្លេស គឺមានសារៈសំខាន់យ៉ាងខ្លាំង សម្រាប់ក្មេងៗជំនាន់ក្រោយ ពីព្រោះជំនាញមួយនេះ ផ្តល់នូវផលជះវិជ្ជមានដល់អនាគតប្រទេសជាតិរបស់ពួកគេ។
ជាមួយគ្នានេះ លោក ម៉ូរី យឺជិ នាយកប្រតិបត្តិមូលនិធិនីបប៉ុន បានបញ្ជាក់ថា សៀវភៅសិក្សាភាសាអង់គ្លេសសម្រាប់មធ្យមសិក្សាទុតិយភូមិដែលត្រូវបានអនុម័តដោយជាតិ ផលិតឡើងតាមរយៈការសហការរបស់មូលនិធិនីបប៉ុន និងអង្គការមណ្ឌលគាំទ្រការអប់រំ “គីហ្សូណា” ត្រូវបានបញ្ចប់ និងប្រគល់ជូនក្រសួងអប់រំយុវជន និងកីឡានៅកម្ពុជា។ លោកនាយកប្រតិបត្តិ បន្ថែមថា នៅថ្ងៃអនាគតនឹងបន្តខិតខំប្រឹងប្រែងដើម្បីអភិវឌ្ឍប្រទេសកម្ពុជាឱ្យកាន់តែរីកចម្រើនទៅមុខ និងស្នើសុំការគាំទ្រ និងកិច្ចសហប្រតិបត្តិការបន្តទៀត។
គួរជម្រាបជូនថា ក្រសួងអប់រំ និងអង្គការគីហ្សូណា ដាក់ឱ្យប្រើប្រាស់កម្មវិធីសិក្សា និងសៀវភៅសិក្សាគោលភាសាអង់គ្លេសថ្នាក់ទី១០ដល់ទី១២ នៅសាលាមធ្យមសិក្សាទុតិយភូមិទូទាំងប្រទេស ដើម្បីបង្កើនគុណភាពភាសាអង់គ្លេសរបស់សិស្សានុសិស្សទូទាំងប្រទេសកម្ពុជា៕
