ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដោយមើលឃើញអំពីការខ្វះខាតទឹកស្អាត និងបន្ទប់ទឹករបស់សាលារៀននៅទីជនបទ ក្នុងស្រុកស្ទោង នៃខេត្តកំពង់ធំ យុវជនមួយក្រុម នៃគម្រោងអនាម័យខ្ញុំ២.០ បានផ្តើមនូវយុទ្ធនាការ «បរិច្ចាគម្នាក់១ដុល្លារ ដើម្បីស្នាមញញឹមកុមារស្រុកស្ទោង» ដើម្បីរៃអង្គាសថវិកា ជួយសាងសង់អណ្តូងទឹក ក៏ដូចជាជួសជុលបន្ទប់ទឹក និងផ្តល់សម្ភារៈសិក្សាមួយចំនួនដល់សិស្សដែលជួបការខ្វះខាត។
លោក កែរ វណ្ណវិបុល ប្រធានផ្នែកទំនាក់ទំនងសាធារណៈ នៃគម្រោងអនាម័យខ្ញុំ២.០ បានឱ្យដឹងថា ឆ្នាំ២០២៣នេះ គឺជាឆ្នាំទី២ហើយ ដែលក្រុមការងារស្នូល នៃក្លឹបយុវជនផារ៉ាហ្គន បន្តអនុវត្តនូវគម្រោង «អនាម័យខ្ញុំ២.០» ដោយបានជ្រើសរើសសាលាចំនួន៣ ស្ថិតនៅក្នុងស្រុកស្ទោង ខេត្តកំពង់ធំ រួមមាន សាលាបឋមសិក្សាត្រាច់ជ្រុំ សម្រាប់ការសាងសង់អណ្តូងទឹកដំណើរការដោយម៉ូទ័រចំនួន១ និងសាលាបឋមសិក្សាបេង និងអនុវិទ្យាល័យបេង សម្រាប់ការសាងសង់កន្លែងលាងដៃ រួមជាមួយនឹងធុងចម្រោះទឹកស្អាត ក៏ដូចជាភ្ជាប់នូវការបង្រៀនអំពីអនាម័យផ្ទាល់ខ្លួន គុណប្រយោជន៍នៃទឹកស្អាត ការទុកដាក់សំរាមឱ្យបានត្រឹមត្រូវ ដល់សិស្សនៅទីនោះផងដែរ ដើម្បីរួមចំណែកក្នុងការផ្តល់នូវបរិស្ថានសិក្សាមួយប្រកបដោយសុខុមាលភាព ដែលញ៉ាំងឱ្យការសិក្សាកាន់តែប្រសើរឡើង។
ជាមួយគ្នានេះ ថវិកាដែលបានមកពីយុទ្ធនាការ «បរិច្ចាគម្នាក់១ដុល្លារ ដើម្បីស្នាមញញឹមកុមារស្រុកស្ទោង» ក៏ត្រូវបានប្រើដើម្បីទិញនូវសម្ភារសិក្សា រួមមានប៊ិច សៀវភៅ ខ្មៅដៃ បន្ទាត់ ជ័រលុប រួមជាមួយនឹងសម្ភារអនាម័យរួមមាន សាប៊ូ ច្រាសដុសធ្មេញ ថ្នាំដុសធ្មេញ ជាដើម។
បើតាមលោក វណ្ណវិបុល កម្មវិធីសម្ពោធអណ្ដូងទឹក និងកន្លែងលាងដៃ រួមជាមួយនឹងការប្រគល់សម្ភារសិក្សា ដល់សិស្សានុសិស្សនឹងប្រព្រឹត្តទៅនៅថ្ងៃទី២៤ ខែមិថុនា ឆ្នាំ២០២៣ ដូច្នេះ សម្រាប់សាធារណជនដែលមានបំណងចង់ចូលរួមបរិច្ចាគជាថវិកា ក៏ដូចជាសម្ភារជាមួយយុទ្ធនាការ «បរិច្ចាគម្នាក់១ដុល្លារ ដើម្បីស្នាមញញឹមកុមារស្រុកស្ទោង» អាចទាក់ទងទៅកាន់ទំព័រ facebook : ParagonYouthClub ។
សូមបញ្ជាក់ដែរថា គម្រោង «អនាម័យខ្ញុំ២.០» គឺជាគម្រោងមួយក្នុងចំណោមសកម្មភាពរបស់ក្លិបយុវជនផារ៉ាហ្គន ក្រោមរូបភាពជាសកម្មភាពសប្បុរសធម៌ ដើម្បីពាំនាំនូវសម្ភារសិក្សា សម្ភារអនាម័យ ជាពិសេសសាងសង់អណ្តូងទឹក កន្លែងលាងដៃ ជួសជុលបន្ទប់ទឹក ព្រមទាំងដាំកូនឈើ ជូនដល់សាលានានាដែលកំពុងជួបប្រទះភាពខ្វះខាតនៅតាមទីជនបទ៕
