ការថែទាំខ្លួនឯងមិនមែនជាជម្រើសទេ វាជារឿងមួយចាំបាច់ ដែលមនុស្សគ្រប់គ្នាត្រូវតែធ្វើ ហើយវាក៏​មិន​មែនជា​រឿងអាត្មានិយមនោះដែរ ព្រោះយើងមិនអាចទៅគាំទ្រអ្នកដទៃ ទាំងដែលខ្លួនឯង​កំពុងឈឺចាប់ ឬសុខភាពមិនល្អឡើយ។ នេះជាការលើកឡើងរបស់លោកស្រី ឆន រ៉ាដា អ្នកចិត្តសាស្ត្រជាន់ខ្ពស់ នៃសំបុកចិត្តសាស្ត្រ។ 

លោកស្រី រ៉ាដា បន្តថា សុខុមាលភាពរបស់បុគ្គលម្នាក់ៗ មាន ៨សំខាន់ៗ ក្នុងនោះរួមមាន បញ្ហាបញ្ញាស្មារតី គឺទាក់ទងនឹងការគិត, សុខភាពរាងកាយ, សុខុមាលភាពអារម្មណ៍ ដែលជាផ្នែកមួយនៃសុខភាពផ្លូវចិត្ត, ទំនាក់ទំនងសង្គម, វិជ្ជាជីវៈ ការសិក្សារៀនសូត្រ និងការងារ, បរិស្ថាន និងបរិយាកាសសង្គម, ជំនឿ ដែលរាប់បញ្ចូលទាំងសាសនា និងការជឿទៅលើផ្នែកផ្សេងៗទៀត និងស្ថានភាពសុខុមាលភាពហិរញ្ញវត្ថុ។

បើតាមអ្នកជំនាញរូបនេះ សុខុមាលភាព គឺជាបទពិសោធន៍សុខភាពរបស់បុគ្គល ហើយសុខភាពរបស់បុគ្គលម្នាក់ៗ រួមបញ្ចូលនូវការលូតលាស់រីកចម្រើន និងសុភមង្គលក្នុងជីវិត។ លោកស្រីបន្តថា ក្នុងសុខុមាលភាព ក៏មានរួមបញ្ចូលដែរនូវសុខភាពផ្លូវចិត្តល្អ ការពេញចិត្តក្នុងជីវិតខ្លួនឯង ការបានគោលបំណងជីវិតច្បាស់លាស់ និងសមត្ថភាពគ្រប់គ្រងភាពតានតឹងផ្លូវចិត្ត។ 

លោកស្រីបានបញ្ជាក់បន្ថែមទៀតថា ភាពតានតឹង ឬស្ត្រេសមិនមែនសុទ្ធតែមិនល្អនោះទេ មានស្ត្រេសមួយចំនួន ជំរុញឱ្យយើងព្យាយាមផ្លាស់ប្ដូរនូវអ្វីដែលថ្មី ដើម្បីឱ្យយើងបានអភិវឌ្ឍខ្លួន ប៉ុន្តែប្រសិនបើស្ត្រេសច្រើនពេក អាចបង្កទៅជាបញ្ហាប៉ះពាល់ដល់សុខភាពផ្លូវចិត្តរបស់យើង។ ដូច្នេះ យើងគ្រប់គ្នាត្រូវមានសមត្ថភាពដោះស្រាយបញ្ហា និងគ្រប់គ្រងភាពតានតឹង ឬស្ត្រេស ដើម្បីលើកកម្ពស់សុខុមាលភាពខ្លួនឯង។

បើតាមប្រសាសន៍របស់លោកស្រី រ៉ាដា ការដោះស្រាយបញ្ហាស្ត្រេស ឬភាពតានតឹង អាចមានច្រើនវិធីដូចជា ការប្រើប្រាស់ធនធាន និងសមត្ថភាពផ្ទាល់, ការជួបប្រឹក្សាយោបល់ជាមួយអ្នកឯកទេស មិត្តភក្តិ និងក្រុមគ្រួសារ។

ការដោះស្រាយបញ្ហា អាចធ្វើឡើង តាមរយៈការប្រើប្រាស់ធនធាន និងសមត្ថភាពផ្ទាល់, ការជួបប្រឹក្សាយោបល់ជាមួយអ្នកឯកទេស មិត្តភក្តិ និងក្រុមគ្រួសារ។

ទន្ទឹមនឹងនេះ លោកស្រីបានចែករំលែកវិធីសាស្ត្រមួយចំនួន ដើម្បីគ្រប់គ្រងភាពតានតឹង និងស្ត្រេស តាមបែបចិត្តសាស្ត្រ ដែលក្នុងនោះមានដូចជា ផ្ដោតលើការស្វែងរកដំណោះស្រាយ និងដោះស្រាយបញ្ហា, ត្រូវផ្ដោតលើអារម្មណ៍ និងអារម្មណ៍ទទួលយក ឬទទួលស្គាល់ការពិត, ការកសាងភាពធន់ឱ្យខ្លួន​ឯង តាមរយៈការរៀនពីបច្ចេកទេស ថែទាំផ្លូវចិត្ត ដូចជា បច្ចេកទេសសម្រាកចិត្តកាយ (ការតាំងសម្មាធិ, ការរៀនពីវិធីសាស្ត្ររំលឹកដឹង និងការផ្ដោតលើការរស់នៅក្នុងបច្ចុប្បន្នភាពជាដើម), ការគ្រប់គ្រងពេលវេលាឱ្យបានល្អ, ការថែទាំខ្លួនឯងជាប្រចាំ និងមានផ្នត់គំនិតវិជ្ជមាន៕