ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ក្នុងរយៈពេលមួយឆ្នាំ បន្ទាប់ពីការប្រកាសដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស របស់រាជរដ្ឋាភិបាល ចំនួន១.៥លាននាក់ យុវជនកម្ពុជាចំនួនជាង ៧ម៉ឺន៣ពាន់នាក់ទទួលបានការបណ្តុះបណ្តាល ហើយមួយចំនួនធំកំពុងទទួលបានការងារធ្វើ។
ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ចាប់តាំងពីរាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស កាលពីថ្ងៃទី១៤ ខែវិច្ឆិកា ឆ្នាំ២០២៣ រហូតមកដល់ខែវិច្ឆិកា ឆ្នាំ២០២៤ គឺមានរយៈពេល១ឆ្នាំ ដែលកម្មវិធីបណ្តុះបណ្តាលថ្នាក់ជាតិមួយនេះ ទទួលបានសិស្សចុះឈ្មោះចូលរៀនសរុបចំនួនជាង ៧៣០០០នាក់ ហើយក្នុងចំណោមសិស្សដែលបានចុះឈ្មោះចូលរៀនជំនាញសរុប ក្នុងនោះចំនួនសិស្សបានបញ្ចប់ការសិក្សាមានជាង ១៤០០០នាក់នៅទូទាំងប្រទេស ហើយយុវជនទាំងនោះបានទទួលការងារធ្វើ និងមានចំណូលសមរម្យ។
បើតាមប្រសាសន៍របស់ ឯកឧត្តមរដ្ឋលេខាធិការ បច្ចុប្បន្នកម្មវិធីបណ្តុះបណ្តាលនេះបាននិងកំពុងបន្តបេសកកម្មរបស់ខ្លួនក្នុងការបណ្តុះបណ្តាលជំនាញដល់យុវជនយ៉ាងសកម្មនៅទូទាំងប្រទេស ហើយទទួលបានលទ្ធផលប្រកបដោយផ្លែផ្កា។ ក្នុងនោះនៅតាមគ្រឹះស្ថានបណ្តុះបណ្តាលបច្ចេកទេសនៅទូទាំងប្រទេសក៏បានប្រកាសជ្រើសរើសយុវជនចូលសិក្សាជំនាញជាបន្តបន្ទាប់ផងដែរ។
វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស បាននិងកំពុងចូលរួមយ៉ាងសកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយតបតាមតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោលនយោបាយរបស់រាជរដ្ឋាភិបាល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត»។
ដើម្បីបំពេញតម្រូវការទីផ្សារការងារបច្ចុប្បន្ន និងអនាគត និងផ្តល់ឱកាសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងកម្មករនិយោជិក និងប្រជាពលរដ្ឋទូទៅ ក្លាយជាកម្លាំងពលកម្មជំនាញប្រកបដោយសមត្ថភាព និងផលិតភាពខ្ពស់ ដែលជាចំណុចស្នូលសម្រាប់ការអភិវឌ្ឍសង្គម និងសេដ្ឋកិច្ច សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដាក់ឱ្យអនុវត្តជាផ្លូវការ «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ» ដោយមិនបង់ថ្លៃ និងទទួលបានប្រាក់ឧបត្ថម្ភប្រចាំខែ លើវិស័យចំនួន១០ និងជំនាញអាទិភាពចំនួន ៤៥មុខជំនាញ ដើម្បីឱ្យប្រជាពលរដ្ឋម្នាក់មានជំនាញមួយយ៉ាងតិចប្រចាំជីវិត និងអាចប្រកបមុខរបរការងារ សម្រាប់ចិញ្ចឹមជីវិត ព្រមទាំងអាចរកចំណូលប្រចាំថ្ងៃបានបន្ថែមទៀត។
វិស័យអាទិភាពទាំង១០ ដែលក្រសួងការងារកំពុងតែធ្វើការបណ្តុះបណ្តាលដល់យុវជននោះរួមមាន ៖ វិស័យសំណង់ (ការងារកំបោរ, ដំឡើងបណ្តាញបំពង់ទឹក, ដំឡើងបណ្តាញអគ្គិសនីក្នុងអគារ, ដំឡើងពុម្ព, ការដំឡើងសរសៃដែក, ដំឡើងគ្រឿងឈើសម្រេច, ការងារការ៉ូ និងដំឡើងដំបូល), វិស័យអគ្គិសនី និងថាមពល (ការថែទាំ និងជួសជុលម៉ូទ័រអគ្គិសនី និងការដំឡើងប្រព័ន្ធបញ្ជាម៉ូទ័រអគ្គិសនី), វិស័យអេឡិចត្រូនិក (ថែទាំ និងជួសជុលបរិក្ខារបំពងសំឡេង, ការដំឡើង និងថែទាំកាមេរ៉ាសុវត្ថិភាព, ការថែទាំ និងជួសជុលទូរស័ព្ទ), វិស័យបរិក្ខាត្រជាក់ និងកំដៅ (សេវាកម្មបរិក្ខាត្រជាក់ក្នុងគេហដ្ឋាន), វិស័យកម្មន្តសាល (ការបន្ស៊ីលោហៈ, ការផ្សារលោហៈដោយធ្នូរអគ្គិសនី, ការផ្សារអគ្គិសនី, ផ្សារឧស្ម័ន, ជួសជុល និងថែទាំជណ្តើរយន្ត), វិស័យមេកានិក/មេកានិករថយន្ត (ថែទាំ និងជួសជុលម៉ាស៊ីនត្រជាក់រថយន្ត, ថែទាំ និងជួសជុលរថយន្ត, ថែទាំ និងជួសជុលអគ្គិសនីរថយន្ត, ថែទាំ និងជួសជុលម៉ាស៊ីនធុនតូច, ថែទាំនិងជួសជុលទោចក្រយានយន្ត), វិស័យទេសចរណ៍ (ធុរកិច្ចភេសជ្ជៈ, ការងារគេហកិច្ច, ផលិតនំ, ធ្វើម្ហូបខ្មែរ, ការងារការិយាល័យជួរមុខ, សេវាកម្មម្ហូបអាហារ និងភេសជ្ជៈ), វិស័យសេវាកម្ម (សេវាកម្មកាត់សក់បុរស, វាស់ភ្នែក និងកាត់កញ្ចក់វែនតា, សេវាកម្មសម្អាងកាយ), វិស័យកសិកម្ម និងកសិ-ឧស្សាហកម្ម (ដាំថែទាំ និងប្រមូលផលស្វាយកែវរមៀត, ដាំថែទាំ និងប្រមូលផលស្វាយចន្ទី, ដាំថែទាំ និងប្រមូលផលមៀន, ចិញ្ចឹម និងថែទាំត្រីប្រា, កែច្នៃបន្លែ និងផ្លែឈើ), វិស័យធុរកិច្ច និងព័ត៌មានវិទ្យា (សេវាកម្មធនធានមនុស្ស, សេវាកម្មកុំព្យូទ័រ, សេវាកម្មរដ្ឋបាល, សេវាកម្មអតិថិជន, រចនាក្រាហ្វិកដោយកុំព្យូទ័រ, ដំឡើងនិងថែទាំបណ្តាញកុំព្យូទ័រ និងការដំឡើង និងអនុវត្តបច្ចេកវិទ្យាឌីជីថល)៕
