ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសវៀតណាមគ្រោងនឹងកាត់បន្ថយអាយុសម្រាប់សិស្សចាប់ផ្ដើមរៀនភាសាអង់គ្លេស ដោយផ្លាស់ប្ដូរពីថ្នាក់ទី៣ មកថ្នាក់ទី១ វិញ, នេះបើយោងតាមសារព័ត៌មានវៀតណាម VN Express។
អនុរដ្ឋមន្ត្រីក្រសួងអប់រំ និងបណ្ដុះបណ្ដាល លោក Pham Ngoc Thuong បានបង្ហាញផែនការ នៅក្នុងសន្និសីទអប់រំ ក្នុងទីក្រុងហូជីមិញ កាលពីថ្ងៃទី២៧ ខែសីហាកន្លងទៅ។ លោកបាននិយាយថា រដ្ឋាភិបាលកំពុងពិនិត្យមើលសំណើ ដែលភាសាអង់គ្លេស នឹងនៅតែជាមុខវិជ្ជាជ្រើសរើស សម្រាប់សិស្សថ្នាក់ដំបូង ក្នុងរយៈពេលខ្លីខាងមុខនេះ។ ប៉ុន្តែក្រសួងមានបំណងកំណត់ភាសាអង់គ្លេស ជាភាសាកាតព្វកិច្ច នៅពេលដែលសាលាមានគ្រូដែលមានសមត្ថភាព និងសម្ភារៈបរិក្ខារគ្រប់គ្រាន់។
លោកអនុរដ្ឋមន្ត្រីក្រសួងអប់រំ បានសរសើរទីក្រុងហូជីមិញថា ជាអ្នកត្រួសត្រាយផ្លូវ សម្រាប់ការអនុវត្តគម្រោងនេះ។ ជាច្រើនឆ្នាំមកនេះ ទីក្រុងហូជីមិញបានណែនាំភាសាអង់គ្លេសដល់កុមារថ្នាក់មត្តេយសិក្សា ហើយបានផ្ដល់ជាមុខវិជ្ជាជម្រើសសម្រាប់សិស្សចាប់ពីថ្នាក់ទី១ ដោយជួយសិស្សឱ្យស្គាល់ភាសានេះ តាំងពីនៅវ័យក្មេង។ លោកបានបន្តថា ការសិក្សាកម្រិតដំបូងមានសារៈសំខាន់ណាស់ ប្រសិនបើភាសាអង់គ្លេសក្លាយជាភាសាទី២ពិតប្រាកដនៅទូទាំងប្រទេស។
ទីក្រុងហូជីមិញបានជាប់ចំណាត់ថ្នាក់ ជាទីក្រុងកំពូលទូទាំងប្រទេសវៀតណាម ដោយមានសិស្សទទួលបានលទ្ធផលភាសាអង់គ្លេសល្អបំផុត ក្នុងការប្រឡងមធ្យមសិក្សាទុតិយភូមិថ្នាក់ជាតិរបស់វៀតណាម។ ឆ្នាំនេះ ពិន្ទុភាសាអង់គ្លេស ជាមធ្យម ទីក្រុងហូជីមិញស្ថិតនៅលំដាប់ថ្នាក់ទី២ បន្ទាប់ពីហាណូយ។
ការិយាល័យនយោបាយនៅឆ្នាំ២០២៤ ក៏បានជំរុញឱ្យរដ្ឋាភិបាលក្នុងតំបន់ ពង្រឹងការរៀនភាសាបរទេសក្នុងចំណោមសិស្ស និងទទួលស្គាល់ភាសាអង់គ្លេសជាភាសាទី២ក្នុងសាលារៀនម្ដងបន្តិចៗ។ យោងតាមក្រសួងអប់រំ និងបណ្ដុះបណ្ដាល គោលដៅជាតិរបស់វៀតណាម គឺនៅឆ្នាំ២០៣៥ សិស្ស និងនិស្សិតសាកលវិទ្យាល័យ ១០០% នឹងសិក្សាភាសាអង់គ្លេសជាភាសាទី២៕
