ការស្រាវជ្រាវជាច្រើន បានបង្ហញថា វិធីសាស្ត្រដែលម្តាយឪពុកចិញ្ចឹមកូន មានឥទ្ធិពលយ៉ាងខ្លាំង ទៅការរស់នៅរបស់កុមារ ជាពិសេស គឺជំនាញសង្គម និងលទ្ធផលក្នុងការសិក្សា។ កុមារ ដែលមិនសូវមានការអើពើពីឪពុកម្ដាយ ជាទូទៅ ជួបលទ្ធផលមិនល្អ ស្ទើរគ្រប់ផ្នែកនៃជីវិត។ ពួកគេមានទំនោររស់នៅក្នុងជីវិតដែលមានភាពចុះខ្សោយផ្នែកមុខងារយល់ដឹងរបស់ខួរក្បាល ការភ្ជាប់ទំនាក់ទំនង ជំនាញផ្នែកអារម្មណ៍ និងជំនាញសង្គម។

កុមារដែលធំធាត់ឡើង ដោយម្ដាយឪពុកមិនអើពើ អាចមានការពិបាកក្នុងការបង្កើតទំនាក់ទំនងជាមួយអ្នកដទៃ នៅពេលដែលពួកគេពេញវ័យ។ បញ្ហានេះ កើតឡើង ដោយសារតែពួកគេខ្វះការទទួលបានការឆ្លើយតបផ្នែកអារម្មណ៍ និងសេចក្ដីស្រឡាញ់ពីអ្នកមើលថែពួកគេ។

កង្វះការណែនាំ ពីអាណាព្យាបាលនៅផ្ទះ ធ្វើឱ្យពួកគេពិបាករៀនអំពីការរៀបចំ អត្តចរិត និងអាកប្បកិរិយា ស្របនឹងការណែនាំឱ្យសាលាមានកម្រិត និងឥទ្ធិពលផ្សេងៗពីសង្គម បានធ្វើឱ្យកុមារ ដែលម្ដាយឪពុកចិញ្ចឹមបែបមិនអើពើ មានភាពទំនោរសម្ដែងចេញនូវអាកប្បកិរិយាមិនសមរម្យ។

លទ្ធផលនៃការស្រាវជ្រាវបែបវិទ្យាសាស្ត្របានបង្ហាញថា កុមារ ដែលត្រូវបានម្ដាយឪពុកចិញ្ចឹមតាមរបៀបមិនអើពើ អាចរស់នៅជាមួយនឹងការថប់បារម្ភ និងភាពតានតឹង ដោយសារកង្វះការគាំទ្រពីគ្រួសារ, ព្យាយាមផ្ដាច់ខ្លួនពីសង្គម, មានអារម្មណ៍ភ័យខ្លាចច្រើន, មានហានិភ័យក្នុងការសេពសារធាតុញៀន, មិនត្រូវការជួយពីអ្នកដទៃ និងបង្ហាញអាកប្បកិរិយាឆ្គាំឆ្គង នៅពេលពួកគេឈានចូលវ័យជំទង់។

ធ្វើដូចម្ដេច ដើម្បីជៀសវៀងការចិញ្ចឹមកូន តាមរបៀបមិនអើពើ?

មានវិធីសាស្ត្រមួយចំនួន ដែលអ្នកអាចពង្រឹងសមត្ថភាព ភាពជាអាណាព្យាបាលរបស់អ្នក ដើម្បីចិញ្ចឹមកូនឱ្យកាន់តែមានប្រសិទ្ធភាព និងធ្វើឱ្យកុមារលូតលាស់ និងអភិវឌ្ឍខ្លួនបានល្អ។

រៀនជំនាញភាពជាអាណាព្យាបាល ៖ អានសៀវភៅ អានអត្តបទលើអ៊ីនធឺណិត និងអត្ថបទផ្សេងៗ ណែនាំអំពីវិធីសាស្ត្រចិញ្ចឹមកូន ដើម្បីពង្រឹងចំណេះដឹងចិញ្ចឹមកូន ប្រកបដោយប្រសិទ្ធភាព។

ចូលរួមវគ្គបណ្តុះបណ្តាលពីភាពជាអាណាព្យាបាល ៖ ការបណ្ដុះបណ្ដាលអំពីភាពជាអាណាព្យាបាល អាចជួយអ្នកពង្រឹងសមត្ថភាពចូលរួមជាមួយកូន ក្នុងនាមជាអាណាព្យាបាល។

ពិចារណាជួយពិគ្រោះជាមួយអ្នកជំនាញផ្លូវចិត្ត ៖ ការពិភាក្សាជាមួយអ្នកជំនាញសុខភាពផ្លូវចិត្ត ដែលអាចជួយអ្នកស្វែងយល់ពីបទពិសោធន៍ផ្ទាល់ខ្លួន និងអភិវឌ្ឍជំនាញភាពជាអាណាព្យាបាល ដែលអាចជួយអ្នកបង្កើតចំណង ជាមួយកូនប្រកបដោយប្រសិទ្ធភាព។

ចំណាយពេលជាមួយកូន ៖ ការចំណាយពេលជាមួយកូន ដោយយកចិត្តទុកដាក់ស្ដាប់ និងស្វែងយល់ពីជីវិតពួកគេ។ សកម្មភាពនេះ ពិតជាមិនងាយស្រួលទេ ប្រសិនបើអ្នកជាអាណាព្យាបាល ដែលរវល់ច្រើន ប៉ុន្តែការឆ្លៀតចំណាយពេលជាមួយកូនពិតជាសំខាន់ណាស់សម្រាប់អាណាព្យាបាល។

ការជៀងវៀង ពីការចិញ្ចឹមកូន តាមរបៀបមិនអើពើពិតជាមានសារៈសំខាន់ណាស់ ព្រោះការចិញ្ចឹមកូនបានត្រឹមត្រូវ ពួកគេនឹងក្លាយជាមនុស្សដែលមានទំនុកចិត្ត មានសុខភាពល្អ មានភាពធន់ ភាពកក់ក្ដៅ សេចក្ដីស្រឡាញ់ វិន័យល្អ និងឥរិយាបថល្អ៕