ការស្រាវជ្រាវពីសាកលវិទ្យាល័យ Kansas Life Span Institute បានរកឃើញថា ឪពុកម្ដាយ ដែលស្វែងរកព័ត៌មានអំពីការថែទាំសុខភាពតាមអ៊ីនធឺណិត សម្រាប់កូនរបស់ពួកគេ ជឿជាក់លើបញ្ញាសិប្បនិម្មិត (AI) ដូចជា ChatGPT ច្រើនជាងអ្នកជំនាញផ្នែកសុខភាព។ ពួកគេថែមទាំងបានវាយតម្លៃថា ចម្លើយដែលទទួលបានពី AI អាចជឿទុកចិត្តបាន មានក្រមសីលធម៌ និងត្រឹមត្រូវ។

Calissa Leslie-Miller និស្សិតថ្នាក់បណ្ឌិតផ្នែកចិត្តវិទ្យាកុមារ នៅសាកលវិទ្យាល័យ Kansas និងជាអ្នកដឹកនាំការស្រាវជ្រាវបានទទួលស្គាល់ថា ឪពុកម្ដាយជានិច្ចជាកាលតែងតែងាកមកប្រើអ៊ីនធឺណិតសម្រាប់ការប្រឹក្សា ខណៈក្រុមអ្នកស្រាវជ្រាវចង់យល់ពីរបៀបដែលអាណាព្យាបាលប្រើ ChatGPT និងរបៀបដែលពួកគាត់ទទួលយក និងបកស្រាយចម្លើយទាំងនោះ។

Leslie-Miller និងក្រុមការងាររបស់គាត់ បានធ្វើការសិក្សាជាមួយឪពុកម្ដាយ ១១៦នាក់ ដែលមានអាយុចន្លោះពី ១៨ ទៅ៦៥ឆ្នាំ។ ឪពុកម្ដាយត្រូវផ្ដល់អត្ថបទទាក់ទងនឹងសុខភាពជាមួយនឹងប្រធានបទដូចជា ការណែនាំអំពីរបៀបគេងរបស់ទារក និងអាហារូបត្ថម្ភ។ អ្នកចូលរួមទាំងអស់ ត្រូវបានគេឱ្យពិនិត្យមើលខ្លឹមសារ ដែលបង្កើតដោយ ChatGPT និងអ្នកជំនាញផ្នែកសុខភាព ប៉ុន្តែមិនត្រូវបានប្រាប់ពីប្រភពចម្លើយនោះទេ។

Leslie-Miller លើកឡើងថា អ្នកចូលរួមបានរកឃើញភាពខុសគ្នាតិចតួចរវាង vignettes សរសេរដោយអ្នកជំនាញ និងចម្លើយ ដែលផ្ដល់ដោយ ChatGPT ។ នៅពេលដែល vignettes មានស្ថិតិខុសគ្នាខ្លាំង ChatGPT ត្រូវបានគេវាយតម្លៃថា គួរឱ្យទុកចិត្ត ត្រឹមត្រូវ និងអាចទុកចិត្តបានជាងអ្នកជំនាញសុខភាព។

ហេតុអ្វីអាណាព្យាបាលទុកចិត្ត AI?

Leslie-Miller និយាយថា ការសិក្សាមិនបានសិក្សា ទៅលើថា តើហេតុអ្វីបានជាឪពុកម្ដាយ ជឿទុកចិត្តលើ ChatGPT ច្រើនជាងនោះទេ ប៉ុន្តែក្នុងទ្រឹស្ដីបានបញ្ជាក់ថា អាចបណ្ដាលមកពីកត្តាជាច្រើន។

លោក Jim Boswell ប្រធាន និងជានាយកប្រតិបត្តិនៅក្រុមហ៊ុន OnPoint Healthcare Partners ដែលមានបទពិសោធន៍ក្នុងការអភិវឌ្ឍន៍វេទិកាដែលមានមូលដ្ឋានលើ AI គាំទ្រដល់គ្រូពេទ្យ ណែនាំថា ភាពសាមញ្ញ និងភាពងាយស្រួលក្នុងការចូលទៅប្រើ ChatGPT អាចជាមូលហេតុចម្បងមួយ។ កត្តាមួយទៀត គឺសមត្ថភាពក្នុងការបង្ហាញព័ត៌មាន ដែលមានភាពងាយយល់របស់ ChatGPT ។

ហានិភ័យក្នុងការព្យាបាលកុមារដោយផ្អែកលើអត្ថបទ AI

ខណៈពេលដែលវាបង្កលក្ខណៈងាយស្រួល ប៉ុន្តែការទទួលបានព័ត៌មានសុខភាពពីប្រភពដូចជា ChatGPT មិនមែនគ្មានហានិភ័យនោះទេ។

Leslie-Miller និយាយថា ព័ត៌មានដែលទទួលពី ChatGPT អាចមិនត្រឹមត្រូវ ឬមិនសមស្របតាមកាលៈទេសៈជាក់ស្ដែង។ ឧទាហរណ៍ ការណែនាំថ្នាំសម្រាប់កុមារ ដែលមានវ័យក្មេងពេក ឬផ្ដល់ការណែនាំអំពីការព្យាបាល ដែលមិនត្រឹមត្រូវ អាចនាំទៅរកលទ្ធផលដែលគ្រោះថ្នាក់ច្រើន។

លោក Boswell ក៏បានពន្យល់បន្ថែមថា ការផ្ដល់ចម្លើយរបស់ AI អាចទទួលបានទិន្នន័យពីព័ត៌មានទូទៅជាច្រើននៅលើអនឡាញ ប៉ុន្តែវាខ្វះបទពិសោធព្យាបាល និងការយល់ដឹងពីការព្យាបាលឱ្យស្របតាមស្ថានភាពជាក់ស្ដែងរបស់អ្នកជំងឺ។ ដូច្នេះ ការពឹងផ្អែកលើឧបករណ៍ទាំងនេះ សម្រាប់ការទទួលយកដំបូន្មានវេជ្ជសាស្ត្រអាចនាំឱ្យខកខាន ក្នុងការទទួលបានព័ត៌មានអំពីស្ថានភាពធ្ងន់ធ្ងររបស់អ្នកជំងឺ ឬពន្យាពេលក្នុងការស្វែងរកការព្យាបាល ដែលសមស្រប។ ជាពិសេស សម្រាប់កុមារ បញ្ហាសុខភាពតូចតាច អាចវិវត្តន៍ទៅជាធ្ងន់ធ្ងរយ៉ាងឆាប់រហ័ស ដូច្នេះ ការទទួលបានការវាយតម្លៃស្ថានភាពពីសំណាក់អ្នកជំនាញពិតជាចាំបាច់៕