ភ្នំពេញ – គម្រោងថវិកា ជាផែនការមួយដែលលាតត្រដាងពីអ្វីដែលអ្នកបម្រុងធ្វើជាមួយនឹងប្រាក់កាសរបស់អ្នក ។ ទន្ទឹមគ្នានេះ គម្រោងថវិកាប្រៀបដូចជាផែនទីមួយសម្រាប់គោលដៅហិរញ្ញវត្ថុទៅថ្ងៃអនាគត។ ដូច្នេះ យើងត្រូវធ្វើគម្រោងថវិកាចំណូលរបស់យើង តើត្រូវរកចំណូលមកពីប្រភពណា? ត្រូវចំណាយលើអ្វីខ្លះ? ចំណាយណាដែលចាំបាច់ និងចំណាយណាដែលមិនចាំបាច់? ហើយត្រូវយកលុយទៅសន្សំបែបណា? វិនិយោគនៅកន្លែងណាខ្លះ?

លោកគ្រូ ជា ឃា មកពីវិទ្យាល័យសម្ដេចអគ្គមហាធម្មពោធិសាល ជា ស៊ីម ព្រែកអញ្ចាញ បានមានប្រសាសន៍ថា ដើម្បីរៀបចំគម្រោងថវិកាសម្រាប់ការសន្សំ និងចាយវាយឱ្យចំគោលដៅ រួមមាន ១.ពិនិត្យគោលបំណងហិរញ្ញវត្ថុរបស់អ្នក ២.ប៉ាន់ស្មានចំនួនថវិកាចំណូលទៅតាមប្រភពនីមួយៗ ៣.កត់ត្រាចំណាយនានា និងចំនួនប្រាក់ដែលត្រូវការ ៤.ធ្វើឱ្យប្រាកដថាចំណាយមិនលើសចំណូលរបស់អ្នក ៥. សម្រេចទៅលើចំនួនប៉ុន្មានដែលអ្នកនឹងសន្សំទុក និង៦. ពិនិត្យឡើងវិញ និងធ្វើការកែតម្រូវដែលចាំបាច់។ លោកគ្រូ ជា ឃា បន្តថា ចំណុចដែលបានរៀបរាប់នេះ អាចត្រួតពិនិត្យឡើងវិញប្រសិនចំណុចមួយណាដែលយើងមិនអាចសម្រេចបាន គឺយើងអាចកែតម្រូវ និងបន្តអនុវត្តបន្ថែមទៀត។

ខាងក្រោមនេះ គឺជាចំណុច​មួយ​ចំនួន​ក្នុងការជួយផ្លាស់ប្ដូរទម្លាប់ចាយវាយមិនចំគោលដៅ ៖

ទី១. ចំណាយបានត្រឹមត្រូវលើរបស់ដែលចាំបាច់ ៖ ការចាយវាយបានត្រឹមត្រូវនៅពេលយើងប្រើលុយ ឬចាយលុយរបស់យើងមិនខ្ជះខ្ជាយ ។ ទន្ទឹមគ្នានេះ យើងប្រើប្រាស់លុយរបស់យើងចំគោលដៅដែលជាតម្រូវការពិតប្រាកដមែន។ ប្រសិនបើយើងមានគោលដៅរយៈពេល១០ឆ្នាំទៅ២០ឆ្នាំទៅមុខទៀត យើងចង់បានផ្ទះ ឬចង់បានឡាន ឬចង់បានរបស់របស់អ្វីមួយ តើយើងសម្រេចចំនួនលុយប៉ុន្មានដែលយើងត្រូវសន្សំ? ឧទាហរណ៍ មួយខែ៥០ម៉ឺន មួយខែ១លាន ឬមួយខែប៉ុន្មានដើម្បីសម្រេចគោលដៅរយៈពេល១០ឆ្នាំ ឬ២០ឆ្នាំ ។

ទី២. សន្សំថវិកាមួយចំនួនសម្រាប់របស់អ្វីមួយដែលអ្នកចូលចិត្ត ឬស្រឡាញ់៖ កាលណាយើងស្រឡាញ់របស់អ្វីមួយយើងចាំបាច់ត្រូវសន្សំ ដោយធ្វើគម្រោងមួយដើម្បីសន្សំលុយរយៈពេលប៉ុន្មាន? សន្សំលុយចំនួនប៉ុន្មានដើម្បីបានរបស់ដែលយើងស្រឡាញ់នោះ? ប៉ុន្តែរបស់ដែលយើងចូលចិត្ត ឬរបស់ដែលយើងស្រឡាញ់នេះ ទោះជាមិនបានតាមអ្វីដែលយើងចង់ក៏មិនប៉ះពាល់ដល់ការរស់នៅប្រចាំថ្ងៃរបស់យើងដែរ ព្រោះវាគ្រាន់តែជាចំណង់ មិនមែនជាតម្រូវការចាំបាច់នោះទេ។

ទី៣. ទុកដាក់លុយមួយផ្នែកផ្សេងទៀតសម្រាប់ការចំណាយដែលកើតឡើងដោយមិនបានរំពឹងទុក ៖ ពេលយើងរៀបចំគម្រោងថវិកា គឺយើងអាចទុកលុយរបស់យើងមួយផ្នែកផ្សេងទៀតសម្រាប់ទប់ទល់ទៅលើបាតុភូតមួយចំនួនដែលកើតឡើងដោយយើងមិនបានគ្រោងទុក។ ឧទាហរណ៍ នៅពេលយើងជិះម៉ូតូនៅតាមផ្លូវ ម៉ូតូរបស់យើងធ្លាយ ឬម៉ូតូរបស់យើងខូច យើងត្រូវការជួសជុល ឬក៏យើងធ្វើដំណើរនៅតាមផ្លូវមានគ្រោះថ្នាក់ផ្សេងៗ គឺយើងត្រូវការចំណាយលុយ។

ទី៤. ទប់ស្កាត់ការចំណាយខ្ជះខ្ជាយដោយមិនបានគ្រោងទុកជាមុន៖ កាលណាយើងមានគម្រោងថវិកា ឬផែនការថវិកា ការចាយវាយទៅលើរបស់របរដែលមិនចាំបាច់ ឬអ្វីដែលមិនបានគ្រោងទុកនៅក្នុងគម្រោងរបស់យើងទេ គឺយើងត្រូវពិចារណាមុននឹងចាយថា តើគួរតែចំណាយឬអត់? ប្រសិនបើយើងចំណាយតើវាប៉ះពាល់ទៅដល់គម្រោងរបស់យើងឬអត់? នេះហេតុផលដែលថា គម្រោងថវិកាជារឿងសំខាន់សម្រាប់គ្រួសារ។

គួរជម្រាបជូនថា មនុស្សគ្រប់គ្នាអាចផ្លាស់ប្ដូរទម្លាប់ចាយវាយមិនចំគោលដៅបានដោយចាប់ផ្ដើមបង្កើតគម្រោងថវិកា ដោយត្រូវដឹងច្បាស់អំពីប្រភពចំណូលប្រចាំខែរបស់ខ្លួនបានមកពីប្រភពណាខ្លះ ហើយការចំណាយរាល់ខែទៅលើអ្វីខ្លះ ចំណែកប្រាក់ចំណូលដែលនៅសល់ពីការចំណាយត្រូវយកទៅសន្សំដើម្បីប្រើប្រាស់ក្នុងករណីដែលចាំបាច់។ ទន្ទឹមគ្នានេះ ការបង្កើតគម្រោងថវិកា ធ្វើយ៉ាងណាឱ្យការចំណាយតិចជាងចំណូលទើបជាការប្រសើរ៕