ការរក្សាតុល្យភាពជីវិត និងការងារ ខណៈពេលដែលកំពុងកសាងយីហោផ្ទាល់ខ្លួន (Personal branding) មានន័យថា អ្នកកំពុងតែធ្វើការងារជាច្រើនក្នុងពេលតែមួយ (Multitasking)។ ចង់ឬមិនចង់ អ្នកចាំបាច់ត្រូវតែមានផ្នត់គំនិត និងយុទ្ធសាស្ត្រដ៏ត្រឹមត្រូវមួយ ដើម្បីគ្រប់គ្រងកិច្ចការនេះ ឱ្យដំណើរការទៅដោយរលូន។ ការបង្កើតយីហោផ្ទាល់ខ្លួន (Personal branding) គឺជាការធ្វើទីផ្សារសម្រាប់ខ្លួនឯង និងអាជីព ដើម្បីឱ្យមានការទទួលស្គាល់ ហើយសកម្មភាពនេះ ពិតជាមានសារៈសំខាន់ណាស់ នៅក្នុងសម័យឌីជីថលនេះ ប៉ុន្តែការផ្ដល់ពេលវេលាសម្រាប់ខ្លួនឯងក៏សំខាន់ដូចគ្នាដែរ។ មានជំហានសាមញ្ញ ៦ ដែលអ្នកអាចរក្សា ការរក្សាតុល្យភាពជីវិត និងការងារ ខណៈពេលដែលកំពុងកសាងយីហោផ្ទាល់ខ្លួន។

១. កំណត់ការងារអាទិភាព ៖ រឿងសំខាន់បំផុត ដើម្បីធ្វើឱ្យមានតុល្យភាពរវាងជីវិត – ការងារ និងការកសាងយីហោផ្ទាល់ខ្លួន គឺត្រូវកំណត់កិច្ចការអាទិភាពឱ្យបានច្បាស់។ កំណត់អ្វីដែលសំខាន់ និងបន្ទាន់ ដោយប្រើម៉ាទ្រីសកំណត់អាទិភាពការងារ។ ចំណុចនេះមានន័យថា អ្នកកំពុងវាយតម្លៃកិច្ចការ ដោយផ្អែកលើសារៈសំខាន់ និងពេលវេលាកំណត់របស់ការងាទាំងនោះ។ ផ្ដោតលើសកម្មភាព ដែលមានឥទ្ធិពលខ្ពស់ ស្របតាមគោលដៅកសាងយីហោរបស់អ្នក និងទំនួលខុសត្រូវការងាររបស់អ្នក។ តាមរយៈការធ្វើដូច្នេះ អ្នកអាចគ្រប់គ្រងពេលវេលារបស់អ្នកប្រកបដោយប្រសិទ្ធភាព ហើយអាចធានាថា គោលដៅរបស់អ្នកនឹងជោគជ័យ។

២. កំណត់ព្រំដែនច្បាស់លាស់ ៖ ភាពច្បាស់លាស់នៃព្រំដែនសកម្មភាព ពិតជាចាំបាច់ណាស់ក្នុងការរក្សាតុល្យភាពជីវិត – ការងារ ខណៈពេលដែលកំពុងកសាងយីហោផ្ទាល់ខ្លួន។ អ្នកចាំបាច់ត្រូវសម្រេចចិត្តឱ្យបានច្បាស់លើពេលវេលាបំពេញការងារប្រចាំថ្ងៃ ការចំណាយពេលកសាងយីហោផ្ទាល់ខ្លួន ពេលសម្រាប់សម្រាក និងពេលសម្រាប់មនុស្សជាទីស្រឡាញ់។ ការកំណត់ព្រំដែនពេលវេលាបានច្បាស់ នឹងជួយឱ្យអ្នករក្សាតុល្យភាពសកម្មភាពប្រចាំថ្ងៃបានល្អ។

៣. ទាញប្រយោជន៍ពីបច្ចេកវិទ្យា ៖ ក្នុងសម័យឌីជីថល បច្ចេកវិទ្យាបានជួយសម្រួលការងារជាច្រើន សម្រាប់មនុស្ស ជាពិសេសគឺការងារដដែល ភាគច្រើនត្រូវបានជំនួសដោយបច្ចេកវិទ្យាស្វ័យប្រវត្តិកម្ម។ ដូច្នេះ ដើម្បីសន្សំសម្ចៃពេលវេលា និងបង្កើនផលិតភាពការងារនៅក្នុងសម័យជឿនលឿននេះ អ្នកចាំបាច់ត្រូវមានចំណេះដឹងបច្ចេកវិទ្យា។ ខណៈបច្ចុប្បន្ន មានបច្ចេកវិទ្យាថ្មីៗជាច្រើន ត្រូវបានបង្កើតឡើង ជាពិសេសគឺ បច្ចេកវិទ្យាបញ្ញាសិប្បនិម្មិត (AI) និងស្វ័យប្រវត្តិកម្មជាដើម។

៤. បង្កើតបណ្ដាញប្រកបដោយភាពវៃឆ្លាត ៖ ការបង្កើតបណ្ដាញដោយភាពឆ្លាតវៃ មានន័យថា អ្នកកំពុងតែបង្កើតទំនាក់ទំនង ដែលមានអត្ថន័យ និងតម្លៃ សម្រាប់ការគាំទ្រដល់យីហោផ្ទាល់ខ្លួន និងគោលដៅអាជីពរបស់អ្នក។ ការបង្កើតបណ្ដាញគឺមានវិធីផ្សេងៗជាច្រើន ដូចជា ការចូលរួមកម្មវិធី ព្រឹត្តិការណ៍ ឬសិក្ខាសាលាផ្សេងៗ ឬក៏ការចូលរួមក្នុងសហគមន៍អនឡាញជាដើម។ ការបង្កើតបណ្ដាញ ប្រកបដោយប្រសិទ្ធភាព និងមានគុណភាព នឹងជំរុញឱ្យយីហោផ្ទាល់ខ្លួនរបស់អ្នកកាន់តែប្រសើរឡើង។

៥. មានទម្លាប់ថែសុខភាព ៖ រឿងមួយទៀត ដែលសំខាន់ គឺត្រូវមានទម្លាប់ថែទាំសុខភាពខ្លួនឯង ដើម្បីធានាថា ដំណើរការអភិវឌ្ឍ ការងារ និងម៉ាកយីហោផ្ទាល់ខ្លួនរបស់អ្នក មិនប៉ះពាល់ដល់សុខុមាលភាពរបស់អ្នក។ ការថែទាំងខ្លួនឯង អាចរួមបញ្ចូលនូវការហាត់ប្រាណ ការធ្វើអ្វីដែលខ្លួនឯងចូលចិត្ត ឬចំណាយពេលនៅម្នាក់ឯងជាដើម។

៦. ឆ្លុះបញ្ចាំងជាទៀងទាត់ ៖ ការឆ្លុះបញ្ចាំងអំពីសកម្មភាព និងលទ្ធផលការងារជាទៀងទាត់ អាចជួយក្នុងការរក្សាតុល្យភាពការងារ និងជីវិត ខណៈពេលដែលអ្នកកំពុងកសាងយីហោផ្ទាល់ខ្លួន។ អ្នកអាចប្រើពេលវេលានេះ ដើម្បីវាយតម្លៃអ្វីដែលដំណើរការ និងអ្វីដែលមិនដំណើរការ។ ឬអាចចោទជាសំណួរដូចជា តើយុទ្ធសាស្ត្របច្ចុប្បន្នរបស់អ្នកមាននិរន្តិភាពឬទេ? តើអ្នកមានពេលវេលាផ្ទាល់ខ្លួនគ្រប់គ្រាន់ដែរ ឬទេ? តើលទ្ធផល ដែលអ្នកទទួលបានសមស្របទៅនឹងការរំពឹងទុកដែរឬទេ? សកម្មភាពនេះ អាចជួយឱ្យអ្នកកែតម្រូវផែនការសកម្មភាពរបស់អ្នក ដើម្បីធានាថាយុទ្ធសាស្ត្រដែលអ្នកបានអនុវត្តមានប្រសិទ្ធភាពខ្ពស់ និងមិនប៉ះពាល់ដល់គុណភាពជីវិត៕