អត្រាអត់ការងារធ្វើសកលក្នុងចំណោមយុវជន ដែលមានអាយុចន្លោះពី១៦ ទៅ២៤ បច្ចុប្បន្ន មាន ១៣ភាគរយ នេះបើយោងតាមអង្គការពលកម្មអន្តរជាតិ (ILO), អត្រានេះកំពុងបង្កើតកំណត់ត្រាទាបបំផុត ក្នុងរយៈពេល ១៥ឆ្នាំចុងក្រោយ។ ការថយចុះនៃអត្រាអត់ការងារធ្វើក្នុងចំណោមយុវជននេះ ត្រូវបានគេរំពឹងទុកថា នឹងបន្តរហូតដល់ឆ្នាំ២០២៥ ដែលនេះជារូបភាពវិជ្ជមានសម្រាប់អនាគតយុវជន។

ការងើបឡើងវិញ នៃចំនួនយុវជនមានការងារធ្វើ ក្នុងចំណោមយុវជន មិនទាន់កើនឡើងនៅទូទាំងពិភពលោកនោះទេ។ យ៉ាងណាក៏ដោយ តំបន់មួយចំនួនដូចជា អាស៊ីខាងកើត អាស៊ីអាគ្នេយ៍ ប៉ាស៊ីហ្វិក រដ្ឋក្នុងតំបន់អារ៉ាប់ និងអាហ្វ្រិកខាងជើង នៅតែប្រឈមនឹងអត្រានៃយុវជនអត់ការងារធ្វើក្នុងកម្រិតខ្ពស់។

ចំណុចនេះមានសារៈសំខាន់ ក្នុងការបន្តរក្សាការផ្ដោតលើបញ្ហាអត់ការងាធ្វើ។ នៅឆ្នាំ២០៣០ មនុស្សវ័យក្មេង ដែលមានអាយុចន្លោះពី ១៥ ទៅ២៤ឆ្នាំ នឹងមានចំនួនស្មើនឹង២០ភាគរយ នៃចំនួនប្រជាជនពិភពលោក។ អត្រានេះ តម្រូវឱ្យមានកិច្ចខិតខំប្រឹងប្រែង និងការសម្របសម្រួលបានល្អ ដើម្បីធានាថា យុវជនអាចទទួលបានការងារសមរម្យ ដែលជំរុញឱ្យអនាគតពួកគេ កាន់តែប្រសើរ និងអាចកាត់បន្ថយការថប់បារម្ភដោយសារការងារ, លើកកម្ពស់សមភាពយេនឌ័រ និងរួមចំណែកក្នុងការបង្កើត បរិយាប័ន្ន និងសន្តិភាព។

បច្ចុប្បន្ន ២០ភាគរយ នៃមនុស្សវ័យក្មេងទូទាំងពិភពលោក មិនបានចូលរួមក្នុងសកម្មភាពការងារ ការអប់រំ ឬបណ្ដុះបណ្ដាលជំនាញនោះទេ, នេះបើយោងតាមអង្គការពលកម្មអន្តរជាតិ (ILO) ក្នុងនោះស្ត្រីវ័យក្មេង មានរហូតដល់ ២/៣ នៃក្រុមនេះ។ ប្រសិនបើអត្រានៃការផ្លាស់ប្ដូរបច្ចុប្បន្ន នៅតែបន្ត នោះសមភាពយេនឌ័រនៅក្នុងអនុបាតការងារ និងប្រជាជនក្នុងចំណោមយុវជន ប្រហែលជាមិនអាចសម្រេចបានឡើយ រហូតដល់សតវត្សរ៍បន្ទាប់។

របាយការណ៍បង្ហាញថា បុគ្គលិកវ័យក្មេងជាច្រើន ខ្វះការការពារផ្នែកសង្គម ហើយជារឿយៗត្រូវធ្វើការក្នុងការងារ ដោយមិនមានគោលដៅច្បាស់លាស់ ដែលរារាំងការអភិវឌ្ឍសមត្ថភាពរបស់គេ ក្នុងការក្លាយខ្លួនជាមនុស្សពេញវ័យឯករាជ្យម្នាក់។ 

នៅប្រទេសដែលមានប្រាក់ចំណូលទាប មានបុគ្គលិកវ័យក្មេងតែម្នាក់ប៉ុណ្ណោះ ក្នុងចំណោម ៤នាក់ ដែលទំនងជាមានការងារទៀងទាត់ និងមានសុវត្ថិភាព បើធៀបនឹង ៣ ក្នុងចំណោម ៤នាក់ នៅប្រទេសចំណូលខ្ពស់។

ការងារសមរម្យ គឺជាកត្តាសំខាន់សម្រាប់ការធានានូវអនាគតល្អប្រសើរសម្រាប់យុវជន ហើយភាគីពាក់ព័ន្ធទាំងអស់ ត្រូវបង្កើតឱកាសការងារ ដើម្បីភាពរីកចម្រើន។ ប៉ុន្តែតើយើងអាចសម្រេចបាន ដោយរបៀបណា?

ខណៈការទទួលបានការអប់រំក្នុងចំណោមយុវជន កំពុងពង្រឹង ILO លើកឡើងថា សេដ្ឋកិច្ចជាច្រើន នៅតែជួបឧបសគ្គ ក្នុងការបង្កើតការងារ ដែលមានជំនាញខ្ពស់ក្នុងអត្រាមួយគ្រប់គ្រាន់ ដើម្បីបំពេញតម្រូវការការងារសម្រាប់និស្សិត ដែលបញ្ចប់ការងារជារៀងរាល់ឆ្នាំ។

កម្មវិធីទីផ្សារការងារសកម្ម ដែលផ្ដោតលើយុវជនអាចជួយបាន ។ កម្មវិធីនេះ ជាអន្តរាគមន៍ ដែលផ្ដោតលើការបណ្ដុះបណ្ដាលជំនាញ ភាពជាសហគ្រិន និងជំនាញទន់ ហើយការអន្តរាគមន៍ តាមរយៈកម្មវិធីនេះ នឹងអាចធ្វើឱ្យប្រសើរឡើងនូវស្ថានភាពសេដ្ឋកិច្ចសម្រាប់យុវជន និងអ្នកជំនាន់ក្រោយ៕