ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសប្រារព្ធទិវាសុខភាពភ្នែកពិភពលោក ១០ តុលា ក្រសួងសុខាភិបាលកម្ពុជា បានធ្វើការអំពាវនាវដល់មាតាបិតា អ្នកអាណាព្យាបាល ក្រុមគ្រួសារ និងសហគមន៍ទាំងអស់គ្នា យកចិត្តទុកដាក់លើបញ្ហាសុខភាពភ្នែករបស់កុមារ និងធានាថា កុមារគ្រប់រូបមានសុខភាពភ្នែកល្អ ដើម្បីអនាគត និងភាពជោគជ័យរបស់កូនៗ។
ទិវាសុខភាពភ្នែកពិភពលោកនៅឆ្នាំនេះ ប្រារព្ធក្រោមប្រធានបទ “ស្រឡាញ់សុខភាពភ្នែកកូនអ្នក” ក្នុងគោលបំណងលើកកម្ពស់ការយល់ដឹងពីការថែទាំ និងការពារសុខភាពភ្នែកទូទៅរបស់កុមារ។ បើតាមក្រសួងសុខាភិបាល ការចុះខ្សោយគំហើញចំពោះកុមារដែលមិនបានកែតម្រូវឱ្យទាន់ពេលវេលា អាចនាំឱ្យមានផលប៉ះពាល់យ៉ាងធ្ងន់ធ្ងរដល់ការសិក្សារបស់ពួកគេ ដោយបើយោងតាមការសិក្សាស្រាវជ្រាវរបស់អង្គការសុខភាពពិភពលោក និងទីភ្នាក់ងារអន្តរជាតិសម្រាប់បង្ការភាពពិការភ្នែកកុមារ ការផ្តល់វ៉ែនតាកែតម្រូវគំហើញអាចកាត់បន្ថយភាពបរាជ័យក្នុងការសិក្សាបានរហូតដល់ ៤៤ភាគរយ។
ដើម្បីចូលរួមក្នុងការទប់ស្កាត់ និងកាត់បន្ថយភាពពិការភ្នែក និងគំហើញចុះខ្សោយរបស់កុមារ ក្រសួងសុខាភិបាលបានធ្វើការណែនាំដល់មាតាបិតា អ្នកអាណាព្យាបាល និងគ្រូបង្រៀនគ្រប់រូប ត្រូវយកចិត្តទុកដាក់ផ្តល់អាទិភាពដល់សុខភាពភ្នែកកុមារ នៅក្នុងចំណោមបញ្ហាសុខភាពអាទិភាពសំខាន់ៗដទៃទៀត ដែលវានឹងជួយឱ្យបញ្ហាគំហើញថយចុះរបស់កុមារត្រូវបានធ្វើរោគវិនិច្ឆ័យ និងព្យាបាលបានទាន់ពេលវេលា ។ ក្នុងនោះដែរ មាតាបិតា អ្នកអាណាព្យាបាល ត្រូវប្រញាប់រួសរាន់នាំបុត្រធីតាដែលសង្ស័យថាមានបញ្ហាភ្នែក ទៅពិនិត្យព្យាបាលជាមួយគ្រូពេទ្យជំនាញនៅតាមមណ្ឌលថែទាំភ្នែក ឬមន្ទីរពេទ្យដែលមានផ្តល់សេវាផ្នែកចក្ខុរោគនៅតាមរាជធានី ខេត្ត ក្រុងឱ្យបានទាន់ពេលវេលា។
ក្រសួងសុខាភិបាលលើកឡើងថា ប្រសិនបើមាតាបិតា អ្នកអាណាព្យាបាល ស្រឡាញ់ភ្នែកកូនលោកអ្នក គឺត្រូវនាំពួកគេទៅធ្វើតេស្តភ្នែកជាមួយគ្រូពេទ្យជំនាញ ដែលនេះបង្ហាញពីការចូលរួមជាមួយមតាបិតា និងអ្នកអាណាព្យាបាលជុំវិញពិភពលោក ដែលកំពុងផ្តល់អាទិភាពដល់សុខភាពភ្នែកកូនរបស់ពួកគេ។
គួរបញ្ជាក់ថា នៅក្នុងផែនការយុទ្ធសាស្រ្តជាតិទី៣ សម្រាប់ការបង្ការ និងត្រួតពិនិត្យភាពពិការភ្នែកឆ្នាំ២០២១-២០៣០ កម្ពុជាមានគោលដៅមហិច្ឆតាក្នុងការកាត់បន្ថយអត្រាប្រវ៉ាឡង់ នៃភាពពិការភ្នែកឱ្យត្រឹម ០.៣៥% នៅឆ្នាំ២០៣០៕
