ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អាជ្ញាធរប្រទេសចិនបានប្រកាសពីវិធានការពង្រឹងសុខភាពផ្លូវចិត្តសិស្សនៅថ្នាក់បឋម និងមធ្យមសិក្សា តាមរយៈការកាត់បន្ថយសម្ពាធការសិក្សា កាត់បន្ថយពេលវេលាប្រើអេក្រង់ និងតម្រូវឱ្យហាត់ប្រាណពីរម៉ោងជារៀងរាល់ថ្ងៃ។
គំនិតផ្ដួចផ្ដើម ដែលបានប្រកាសកាលពីខែមុន ដោយក្រសួងអប់រំចិន រួមមាន ការហាមឃាត់ទូរស័ព្ទក្នុងថ្នាក់រៀន និងការកំណត់ពេលមិនប្រើអេក្រង់ ដើម្បីកាត់បន្ថយការពឹងផ្អែកជ្រុលហួសហេតុលើអ៊ីនធឺណិត។
សាលារៀនត្រូវតែគ្រប់គ្រងយ៉ាងតឹងរឹងលើចំនួនកិច្ចការផ្ទះ ដែលផ្ដល់ឱ្យសិស្ស និងយ៉ាងហោចណាស់ ជំរុញឱ្យសិស្សមានសកម្មភាពរាងកាយ ២ម៉ោង ក្នុងមួយថ្ងៃ សម្រាប់សិស្សសិក្សាថ្នាក់បឋម និងមធ្យមសិក្សា។
លើសពីនេះ សាលារៀនត្រូវធានាថា សិស្សគ្រប់គ្នាទទួលបានការគេងគ្រប់គ្រាន់ ដោយរៀបចំពេលវេលាចូលរៀន និងចេញពីសាលារៀន ឱ្យសមស្រប និងអនុញ្ញាតឱ្យមានការសម្រាកញ៉ាំអាហារថ្ងៃត្រង់គ្រប់គ្រាន់។
ក្រសួងបានប្រកាសនៅក្នុងសេចក្ដីថ្លែងការណ៍មួយ ដែលប្រកាសពីវិធានការទាំងនេះថា «ត្រូវតែគ្រប់គ្រងពេលវេលានៃការគេង ទប់ស្កាប់ការរំលោភបំពាន ដូចជាការសិក្សាហួសប្រមាណ និងបន្ទុកសិក្សាហួសកម្រិត។»
វិធានការទាំងនេះមានបំណងជួយសិស្សានុសិស្សឱ្យមានសមត្ថភាពទប់ទល់នឹងភាពតានតឹង និងការថប់បារម្ភ ជាពិសេសនៅជុំវិញការប្រឡង។
អ្នកជំនាញបាននិយាយថា កិច្ចការសាលាច្រើនហួសហេតុ គឺជារឿងធម្មតានៅក្នុងសាលារៀនទូទាំងប្រទេស ដែលទម្លាប់នេះបណ្ដាលឱ្យសិស្សគេងមិនគ្រប់គ្រង ប្រឈមនឹងការថប់បារម្ភខ្ពស់ និងការធ្លាក់ទឹកចិត្តកាន់តែខ្លាំងឡើង។
ប្រទេសចិនក្នុងឆ្នាំ២០២១ បានអនុម័តច្បាប់អប់រំមួយ ដែលមានគោលបំណងកាត់បន្ថយកិច្ចការផ្ទះ និងហាមឃាត់ការបង្រៀនក្រៅម៉ោងសិក្សាលើមុខវិជ្ជាស្នូលនៅសាលា។ យ៉ាងណា ឪពុកម្ដាយជាច្រើន នៅតែបន្តជួលគ្រូបង្រៀនក្រៅម៉ោង ដើម្បីបំប៉ន់សមត្ថភាពកូនរបស់ខ្លួនបន្ថែម ព្រោះប្រព័ន្ធអប់រំក្នុងប្រទេសចិន មានការប្រកួតប្រជែងខ្ពស់៕
