សកម្មភាពគូសនៅលើផ្ទៃមុខកុមារ ច្រើនមាននៅតាមសាលារៀន ទីតាំងកម្សាន្តកុមារ ឬប្រារព្ធធ្វើឡើងតាមទីធ្លាសាធារណៈ និងនៅតាមព្រឹត្តិការណ៍ទូទៅ​! សកម្មភាពមួយនេះ តែងរៀបចំដោយមនុស្សធំ និងតាមរយៈកម្មវិធីសាលារៀន ឬពីសំណាក់អាណាព្យាបាល ក្នុង​គោលដៅជំរុញកុមារឱ្យផ្សារភ្ជាប់ទំនាក់ទំនងជាមួយកុមារដទៃផង និងការកម្សាន្តផង។

តាមរយៈ Coram Pacey គំនូរនៅលើផ្ទៃ​មុខ​កុមារ គឺលើសពីការ​កម្សាន្ត ដោយសកម្មភាពទាំងនេះ បានជំរុញឱ្យកុមារ មានឱកាសបញ្ចេញគំនិត បំផុសក្បាច់រចនា បង្កើនភាពច្នៃប្រតិដ្ឋដែលកើតមានឡើងដោយការគូរ ការស្វែងរកចំណាប់អារម្មណ៍នាពេលបច្ចុប្បន្ន និងបង្រៀនឱ្យកុមារបង្ហាញពីចំណាប់អារម្មណ៍ផ្ទាល់ខ្លួន ( self-expression) អំពីអ្វីដែលពួកគេបានរៀន និងរបៀបនៃការជ្រើសរើសគំនូរ និងការសម្រេចចិត្តជ្រើសរើសទាំងព័ណ៌និងសម្ភារៈនានា។

អត្ថប្រយោជន៍ជារួមនៃការគូសគំនូរលើផ្ទៃមុខ ៖ សម្រាប់កុមារដែលចាប់ផ្តើមសកម្មភាពតាំងពីពួកគេនៅវ័យកុមារភាព អ្វីដែលពួកគេទទួលបានគឺការគាំទ្រដល់ទំនាក់ទំនងសង្គម និងសុខភាពផ្លូវចិត្តកុមារ។ ការប្រាស្រ័យទាក់ទងតាមរយៈកុមារម្នាក់ ទៅកុមារម្នាក់ទៀត។ ការបង្កើនទំនុកចិត្ត និងពង្រឹងជំនាញនៃការស្គាល់គុណតម្លៃនៃខ្លួនឯង។ បង្កើនភាពច្នៃប្រតិដ្ឋ និងជំនាញនៃការស្រមើស្រមៃ រួមទាំងការគាំទ្រកុមារឱ្យស្វែងរកសក្តានុពលខ្លួនឯងដោយវិធីសាស្រ្តវិជ្ជមាន។

ត្រួសៗអំពីសម្ភារៈដែលគួរមានមុនពេលចាប់ផ្តើមគូសគំនូរ ៖ មិនសាមញ្ញដូចល្បែងដទៃពេកទេ! គំនូរនៅលើមុខកុមារ ត្រូវការសម្ភារៈដែលមានគុណភាព និងអនាម័យផងដែរ ដើម្បីធានាអំពីការកាត់បន្ថយមេរោគ បាក់តេរីមិនល្អ និងប៉ះពាល់ទៅកាន់ផ្នែកសំខាន់ៗនៃអវយវៈ ជាពិសេសគឺភ្នែក។ ចំពោះសម្ភារៈមានដូចជា ជក់, អេប៉ុងដែលមិនចាស់ពេក និងភាពចម្រុះបែបនៃជក់សម្រាប់ប្រើប្រាស់ពណ៌ដែលមានភាពខុសគ្នា។ ក្រៅពីនោះក៏ត្រូវការទឹកស្អាតដើម្បីលាយពណ៌ និងជ្រើសរើសទឹកថ្នាំដែលមានដាក់សម្គាល់ថា អាចប្រើលើផ្ទៃមុខកុមារបាន។

វិភាគអំពីហានិភ័យ និងការពារទុកមុន ៖ ចំពោះទីតាំងសាធារណៈ ឬក៏នៅកន្លែងអបរំ គួរតែមានក្រដាសអំពីភាគរយនៃការទទួលខុសត្រូវលើកុមារពេលមានបញ្ហា និងការប្រាប់ពីហានិភ័យឱ្យច្បាស់ៗ ហើយអាណាព្យាបាលក៏ត្រូវដឹងអំពីអ្វី ដែលកុមារ ឬកូនៗរបស់ខ្លួនថា អាចអាលែកហ្ស៊ីនឹងទឹកថ្នាំ ឬក៏អាលែកហ្ស៊ីនឹងសម្ភារៈណាខ្លះ។ អ្នកតំណាង ឬអ្នកមើលការខុសត្រូវនៅទីតាំងផ្ទាល់ ក៏គួរបញ្ជាក់ និងរំលឹកឱ្យបានជារឿយៗ (ឧទាហរណ៍ កុំលាបថ្នាំ ឬគូសនៅរង្វង់ភ្នែក និងកុំលេបឬទំពាសម្ភារៈគំនូរជាដើម។ ជារួមអាណាព្យាបាល និងអ្នកមើលការខុសត្រូវនូវកន្លែងគូសគំនូរ ចាំបាច់ត្រូវយកចិត្តទុកដាក់លើកុមារទៅតាមដែនសមត្ថភាព និងតួនាទីរបស់ខ្លួន ដើម្បីធានាឱ្យបាននូវសុវត្ថិភាព និងជំរុញផលិតភាពនៃការលូតលាស់របស់កុមារ៕