អ្នកជំនាញចិត្តសាស្ត្រ ជំរុញឱ្យឪពុកម្ដាយ និងអាណាព្យាបាលយកចិត្តទុកដាក់ខ្ពស់ លើផ្លូវចិត្តកុមារ អំឡុងពេលភ្លៀសសឹក ដោយសារបញ្ហាសង្គ្រាមរវាងកម្ពុជា-ថៃ ដោយសង្កត់ធ្ងន់ថា កុមារជាក្រុមមនុស្សដែលងាយមានបញ្ហាផ្លូវចិត្ត និងងាយរងគ្រោះបំផុត ក្នុងវិបត្តិនេះ។

លោក អ៊ីង វន្នី ជាអ្នកចិត្តសាស្ត្រ និងអ្នកជំនាញផ្នែកអប់រំកុមារតូច បានលើកឡើងថា សង្គ្រាមពិតជាប៉ះពាល់ផ្លូវចិត្តកុមារខ្លាំងមែនទែន ហើយទំហំនៃផលប៉ះពាល់ គឺខ្លាំងជាងមនុស្សចាស់ឆ្ងាយ។ លោកបន្ថែមថា បញ្ហាផ្លូវចិត្ត ដែលមានភាគរយខ្ពស់កើតឡើងលើកុមារ គឺ ការធ្លាក់ទឹកចិត្ត ការថប់បារម្ភ របួសផ្លូវចិត្ត និងការបាក់ស្បាត ក្រោយប៉ះទង្គិចផ្លូវចិត្ត (PTSD) ។

បើតាមលោក អ៊ីង វន្នី មូលហេតុ ដែលបណ្ដាលឱ្យកុមារប្រឈមនឹងវិបត្តិផ្លូវចិត្តខ្លាំងជាងមនុស្សចាស់ ព្រោះពួកគេជាក្រុមមនុស្សដែលងាយរងគ្រោះស្រាប់ បើទោះជាមិនទាន់មានសង្គ្រាមក៏ដោយ។

លោកសង្កត់ធ្ងន់ថា នៅអំឡុងពេលមានវិបត្តិនេះ ធ្វើឱ្យពួកគេកាន់តែងាយប្រឈមនឹងវិបត្តិ ព្រោះឪពុកម្ដាយ និងមនុស្សចាស់ ក៏ភ័យស្លន់ស្លោ តានតឹង និងពិបាកចិត្ត ដែលធ្វើឱ្យអារម្មណ៍ទាំងនេះ ជះឥទ្ធិពលលើផ្លូវចិត្តកុមារទ្វេដង។

ជាធម្មតា កុមារ គឺងាយរងគ្រោះទៅហើយ ប៉ុន្តែសង្គ្រាមគឺជាគ្រោះធំ សូម្បីតែឪពុកម្ដាយ របស់គាត់ ក៏ងាយរងគ្រោះដែរ ចុះទម្រាំសង្គ្រាម ងាយរងគ្រោះខ្លាំង ដោយសារគាត់ជាមនុស្សងាយរងគ្រោះស្រាប់

ចំពោះស្ថានភាពនេះ លោក នី សុផារ៉ាន់ នាយកប្រតិបត្តិអង្គការទស្សនៈពិភពលោកអន្តរជាតិ ប្រចាំនៅកម្ពុជា បានណែនាំ​ដល់ឪពុកម្តាយ អ្នកអាណាព្យាបាល ទោះស្ថានភាពភៀសសឹក ដោយគួរបង្កើតភាពទៀងទាត់ដូច ពេលបរិភោគអាហារ ពេលសម្រាក និងការលេងកម្សាន្តសម្រាប់កុមារ។

លោកបន្ថែមថា អាណាព្យាបាលត្រូវតាមស្ថានភាពរបស់កូន ហើយប្រសិនបើកុមារមានរោគសញ្ញាដូចជា ៖ មិនដេក, ភ័យខ្លាចខ្លាំង, ស្ងៀមស្ងាត់ខ្លាំង ឬឥរិយាបថដែលខុសពីធម្មតា ត្រូវប្រាប់អ្នកជំនាញផ្លូវចិត្ត ឬអង្គការដែលផ្តល់សេវាពាក់ព័ន្ធ ដើម្បីទទួលបានការជួយសង្គ្រោះ។

ទន្ទឹមនឹងនេះ លោក សុផានរ៉ាន់ លើកឡើងថា ក្នុងស្ថានភាពបច្ចុប្បន្ន ភាគីពាក់ព័ន្ធទាំងអស់ រាប់ចាប់តាំងពីអាជ្ញាធរពាក់ព័ន្ធ អង្គការដៃគូ អ្នកស្ម័គ្រចិត្ត ដើរតួនាទីយ៉ាងសំខាន់ ក្នុងការជួយគាំទ្រផ្លូវចិត្តកុមារ និងជនងរងគ្រោះ ដែលកំពុងភៀសសឹក។ ខណៈអង្គការទស្សនៈពិភពលោក ក៏កំពុងតាមដានស្ថានការណ៍ និងធ្វើការវាយតម្លៃជាបន្តបន្ទាប់ ដើម្បីឆ្លើយតបតាមតម្រូវការបន្ទាន់ រួមមាន អាហារ ទឹកស្អាត គ្រឿងអនាម័យ និងសម្ភារសង្គ្រោះជាបន្ទាន់ផ្សេងៗទៀត។

បើតាមទិន្នន័យក្រសួងមហាផ្ទៃ គិតត្រឹមថ្ងៃទី១១ ខែធ្នូ ចំនួនជនភៀសសឹក នៅតាមបណ្ដាខេត្តមានព្រំដែនជាប់ថៃ ដូចជា ព្រះវិហារ ឧត្តមមានជ័យ បន្ទាយមានជ័យ បាត់ដំបង ពោធិ៍សាត់ កោះកុង និងសៀមរាប បានកើនដល់ ៥៧,១០៥ គ្រួសារ ស្មើនឹងមនុស្ស ១៩៧,៧៥៤នាក់៕