ថ្ងៃកំណត់យកកិច្ចការ ការបារម្ភអំពីពិន្ទុ សម្ពាធពីឪពុកម្ដាយ និងគ្រូបង្រៀន រួមទាំងទំនួលខុសត្រូវជាច្រើនក្នុងការសិក្សា អាចធ្វើឱ្យសិស្សមានបញ្ហាថប់បារម្ភ ភាពច្របូកច្របល់ និងកើនឡើងភាពតានតឹង។ បញ្ហាទាំងនេះ នឹងប៉ះពាល់ដល់សុខភាព សេចក្ដីសុខផ្លូវចិត្ត ទំនាក់ទំនង និងលទ្ធផលសិក្សារបស់សិស្សនិស្សិត។ យ៉ាងណាក៏ដោយ អ្នកនៅតែអាចគ្រប់គ្រង និងដោះស្រាយបញ្ហានេះ តាមរយៈការអនុវត្តនូវបច្ចេកទេសចំនួន ៤ ដូចជា ៖

១. គេងឱ្យបានគ្រប់គ្រាន់ ៖ សិស្សដែលប្រកាន់ភ្ជាប់នូវស្មារតីនៃការសិក្សាខ្ជាប់ខ្ជួន និងមានកាលវិភាគសិក្សាច្រើន គឺភាគច្រើនគេងមិនគ្រប់គ្រាន់នោះទេ។ បើទោះបីជាការខិតខំសិក្សាជារឿងល្អ ប៉ុន្តែការគេងមិនគ្រប់គ្រាន់ អាចធ្វើឱ្យពួកគេជួបវិបត្តិ និងបញ្ហាផ្សេងៗទៀតជាច្រើន ដែលក្នុងនោះមានដូចជា ការធ្លាក់ចុះផលិតភាព ពិបាកផ្ដោតអារម្មណ៍លើការសិក្សា ហើយការចុះខ្សោយស្មារតី និងអារម្មណ៍ផ្ដោតអាចធ្វើឱ្យពួកគេមានគ្រោះថ្នាក់អំឡុងពេលធ្វើដំណើរទៀតផង។

ការស្រាវជ្រាវរកឃើញថា ការគេងមិនលក់ និងការងងុយគេងពេលថ្ងៃ គឺត្រូវបានផ្សារភ្ជាប់ទៅនឹងការប្រែប្រួលអារម្មណ៍ខ្លាំង ហានិភ័យខ្ពស់ ដែលអាចប្រឈមនឹងគ្រោះថ្នាក់ចរាចរណ៍ ការធ្លាក់ចុះមធ្យមភាគសិក្សា រៀនមិនចូល និងហានិភ័យខ្ពស់ក្នុងការបរាជ័យក្នុងការសិក្សា។

២. ធ្វើលំហាត់ប្រាណទៀងទាត់ ៖ វិធីមួយចំណោមវិធីជាច្រើន ដែលអ្នកអាចអនុវត្ត ដើម្បីថែសុខភាព និងស្មារតីរបស់ខ្លួន គឺការហាត់ប្រាណទៀងទាត់។ ភ័ស្តុតាងបង្ហាញថា សិស្សដែលបានចូលរួមសកម្មភាពកីឡាទៀងទាត់ មានកម្រិតនៃភាពតានតឹងទាប។ ស្របពេលដែលសិស្សទាំងនេះ ក៏ត្រូវប្រឈមនឹងសម្ពាធសង្គម ការសិក្សា និងជីវិត ដូចសិស្សដទៃទៀតដែរ។

សម្រាប់សិស្សមួយចំនួន ការស្វែងរកពេលវេលាសម្រាប់ហាត់ប្រាណអាចជាបញ្ហាប្រឈម ប៉ុន្តែមានយុទ្ធសាស្ត្រមួយចំនួនដែលអ្នកអាចប្រើ ដើម្បីបន្ថែមសកម្មភាពសម្រាប់រាងកាយជារៀងរាល់ថ្ងៃ។ សកម្មភាពទាំងនោះអាចជា ការហាត់យូហ្គានាពេលព្រឹក ការដើរឬជិះកង់ទៅសាលា ឬឆ្លៀតចូលរួមសកម្មភាពកីឡាផ្សេងៗ នៅពេលទំនេរពីការសិក្សាជាដើម។

៣. ធ្វើលំហាត់ដង្ហើម ៖ នៅពេលដែលរាងកាយរបស់អ្នកកំពុងប្រឈមនឹងភាពតានតឹង ជានិច្ចជាកាលអ្នកមិនអាចគិត ឬដោះស្រាយបញ្ហាអ្វីមួយបានល្អនោះទេ ហើយអ្នកក៏ទំនងជាដកដង្ហើមមិនត្រូវនោះដែរ ដោយចលនាដង្ហើមនោះ ប្រហែលជាខ្លី ឬរាក់ៗ។ នៅពេលដង្ហើមអ្នក​មិនត្រឹមត្រូវ វានឹងរំខានដល់ការផ្លាស់ប្ដូរអុកស៊ីហ្សែន និងកាបូនឌីអុកស៊ីក្នុងខ្លួនរបស់អ្នក។ វិធីដែលរហ័ស និងមានប្រសិទ្ធភាពមួយ ដើម្បីរំងាប់អារម្មណ៍នេះ គឺការធ្វើលំហាត់ដកដង្ហើម, វិធីសាស្ត្រនេះ អាចធ្វើបានគ្រប់ទីកន្លែង និងគ្រប់ពេលវេលាទាំងអស់ ដើម្បីគ្រប់គ្រងភាពតានតឹងក្នុងរយៈពេលប៉ុន្មាននាទីប៉ុណ្ណោះ។ ក្រៅពីអាចអនុវត្ត ដើម្បីគ្រប់គ្រងភាពតានតឹងរយៈពេលខ្លី ដូចជាមុនពេលប្រឡង ឬធ្វើបទបង្ហាញ អ្នកក៏អាចអនុវត្តវិធីសាស្ត្រនេះ ដើម្បីគ្រប់គ្រងភាពតានតឹងរយៈពេលវែង ដូចជា បញ្ហាហិរញ្ញវត្ថុ ការទំនាក់ទំនង ឬការងារជាដើម។

៤. ស្ដាប់តន្ត្រី ៖ តន្ត្រីជាឱសថកាត់បន្ថយភាពតានតឹង ដ៏មានប្រសិទ្ធភាពមួយប្រភេទ ជាពិសេសសម្រាប់សិស្សនិស្សិតដែលភាគច្រើនជាយុវវ័យ។ ក្រៅពីជួយកាត់បន្ថយភាពតានតឹង តន្ត្រីក៏អាចធ្វើឱ្យចិត្តអ្នកស្ងប់ និងជំរុញឱ្យអ្នកផ្ដោតក្នុងការរស់នៅជាមួយបច្ចុប្បន្នភាព។ ការស្រាវជ្រាវរកឃើញថា ការលេងតន្ត្រី ដែលមានល្បឿនលឿន អាចធ្វើឱ្យអ្នកទទួល យល់ និងឆ្លើយតបទៅនឹងព័ត៌មានកាន់តែប្រសើរ និងពង្រឹងសមត្ថភាពចងចាំ។ ការសិក្សាមួយរកឃើញថា សិស្សដែលស្ដាប់សំឡេងតន្ត្រី អាចបន្ធូរអារម្មណ៍ និងធ្វើឱ្យស្មារតីប្រសើរឡើង បន្ទាប់ពីតានតឹង៕