មនុស្សគ្រប់គ្នាប្រាកដជាដឹងហើយថា ការរៀនភាសាអង់គ្លេស គឺពិតជាសំខាន់ដើម្បីឱ្យយើងអាចប្រើប្រាស់ភាសាអង់គ្លេសក្នុងការសិក្សា នៅកន្លែងធ្វើការ និងការប្រាស្រ័យទាក់ទងនៅក្នុងជីវិតប្រចាំថ្ងៃ។ ទន្ទឹមគ្នានេះ សិស្ស និងនិស្សិតដែលជាយុវជនត្រូវតែរៀន និងចេះប្រើប្រាស់ភាសាអង់គ្លេស ព្រោះភាសាអង់គ្លេសពិតជាសំខាន់ និងចាំបាច់ខ្លាំងសម្រាប់ការសិក្សានៅមហាវិទ្យាល័យក្នុងការស្រាវជ្រាវ ក៏ដូចជាប្រឡងយកអាហារូបករណ៍ជាដើម។

តើរៀនភាសាអង់គ្លេសបែបណាដើម្បីឆាប់ចេះ និងអាចប្រើប្រាស់បានល្អ ?

កញ្ញា សេង រ័ត្នសេដ្ឋាមុនី អតីតសិស្សនិទ្ទេស A ឆ្នាំ ២០១៨ ដែលសព្វថ្ងៃកញ្ញាគឺជាអ្នកបង្កើតមាតិកាលើបណ្ដាញសង្គម និងជានិស្សិតកំពុងសិក្សាថ្នាក់បញ្ញាបត្រជាន់ខ្ពស់ បានប្រាប់ឱ្យដឹងថា ការប្រើប្រាស់ភាសាអង់គ្លេសបានល្អ នឹងធ្វើឱ្យយើងជឿជាក់លើខ្លួនឯងពេលធ្វើបទបង្ហាញនៅក្នុងថ្នាក់ និងជំរុញឱ្យយើងចង់ចូលរួមក្នុងការសម្ភាសន៍ ឬការដាក់ពាក្យសម្រាប់កម្មវិធីប្រកួតប្រជែងនានាទាំងក្នុង និងកៅប្រទេសតាមរយៈការប្រើប្រាស់ភាសាអង់គ្លេស។

កញ្ញា សេង រ័ត្នសេដ្ឋាមុនី បន្ថែមថា ការរៀនភាសាអង់គ្លេសតាមរយៈការកម្សាន្តបណ្ដើរ និងរៀនបណ្ដើរ ក៏អាចជួយឱ្យសិស្សានុសិស្សរៀនឆាប់ចេះភាសាអង់គ្លេសផងដែរ។ បើតាម រ័ត្នសេដ្ឋាមុនី អ្នកសិក្សាអាចចូលទៅក្នុង Netflix ដើម្បីមើលរឿងជាភាសាអង់គ្លេសដែលមានចំណងជើងរង (Subtitle) ឬចូលទៅក្នុង YouTube ដើម្បីមើល English Talk Show មួយចំនួន ដើម្បីជួយឱ្យយើងអភិវឌ្ឍជំនាញការស្ដាប់ ក៏ដូចជាការនិយាយភាសាអង់គ្លេសរបស់យើងបានផងដែរ។ បន្ថែមពីនេះ យើងចេះពាក្យពេចន៍ជាច្រើនបន្ទាប់ពីយើងមើលរឿងទាំងអស់នោះដោយគ្មានភាពធុញទ្រាន់។

“ខ្ញុំចាំបានថានៅពេលរៀនថ្នាក់បរិញ្ញាបត្រ ខ្ញុំបានផ្លាស់ប្ដូរការសិក្សាទៅក្រៅប្រទេសមួយចំនួន ហើយការផ្លាស់ប្ដូរការសិក្សាទៅក្រៅប្រទេសនេះសុទ្ធសឹងតែត្រូវការប្រើប្រាស់ភាសាអង់គ្លេស”

កញ្ញា សេង រ័ត្នសេដ្ឋាមុនី អតីតសិស្សនិទ្ទេស A ឆ្នាំ ២០១៨

ជាមួយគ្នានេះ បើតាម កញ្ញា រិទ្ធ សុវណ្ណាលីន ដែលនិស្សិតកំពុងសិក្សាជំនាញវិទ្យាសាស្រ្តកុំព្យូទ័រ និងបញ្ញាសប្បនិមិ្មត វិញ និយាយថា រូបនាងមានវិធីសាស្រ្តរៀនភាសាអង់គ្លេសខុសប្លែកពីគេ នោះ​គឺការមើលរឿងដើម្បីរៀនភាសាអង់គ្លេស ព្រោះថាការរៀនភាសាអង់គ្លេសនៅក្នុងថ្នាក់មិនទាន់គ្រប់គ្រាន់នោះឡើយ។

និស្សិតសិក្សាជំនាញវិទ្យាសាស្រ្តកុំព្យូទ័រ និងបញ្ញាសប្បនិមិ្មត រូបនេះ រំលឹកថា កាលនៅរៀនថ្នាក់វិទ្យាល័យរូបនាងចូលចិត្តមើលរឿង Harry potter ហើយប្រសិនបើសិស្សានុសិស្សចូលចិត្តអាចទៅមើលរឿងនេះ និងរៀនភាសាអង់គ្លេសតាមរយៈចំណងជើងរងនៅក្នុងរឿងបាន ដូចនេះ សិស្សានុសិស្សអាចកត់ប្រយោគដែលតួអង្គសន្ទនាទាំងអស់នោះមករៀនបន្ថែម ព្រមទាំងអាចសន្ទនាជាមួយមិត្តភក្ដិ។

“ខ្ញុំជឿជាក់ថាវិធីសាស្រ្តរៀនភាសាអង់គ្លេសងាយៗតាមរយៈការមើលរឿងបរទេសនេះ គឺលឿនជាងការរៀននៅក្នុងថ្នាក់ដែលរៀនតាមសៀវភៅពុម្ពទៀតផង”

កញ្ញា រិទ្ធ សុវណ្ណាលីន

ការរៀនភាសាអង់គ្លេសឱ្យបានពូកែសិស្សានុសិស្សចាំបាច់ត្រូវអនុវត្តជាមួយលោកគ្រូអ្នកគ្រូផ្ទាល់, អនុវត្តនិយាយភាសាអង់គ្លេសជាមួយមិត្តភក្ដិ និងអនុវត្តនិយាយភាសាអង់គ្លេសជាមួយខ្លួនឯង ។ ម៉្យាងវិញទៀត ការអានសៀវភៅជាភាសាអង់គ្លេសកាន់តែសំខាន់ដើម្បីពង្រឹងជំនាញអាន យល់ពីការប្រើប្រាស់វេយ្យាករណ៍ និងពាក្យពេចន៍កាន់តែច្រើនផងដែរ៕