ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចំនួនម៉ោងនៃការចំណាយពេល ទៅលើការសិក្សានៃសិស្សម្នាក់ៗ ពុំដូចគ្នាទេ! ជាពិសេសនៅពេលកម្រិតនៃការសិក្សាកាន់តែខ្ពស់ ហើយទំនួលខុសត្រូវក្នុងជីវិតកាន់តែមានទំហំធំ។ នេះជាហេតុបង្ហាញថា ការស្វែងរកវិធីសាស្រ្ត ក្នុងការសិក្សាកាន់តែមានសារៈសំខាន់ក្នុងការបន្តដំណើរសិក្សា ព្រោះកាលដែលជ្រើសរើសវីធីក្នុងការអនុវត្តបានត្រឹមត្រូវ គឺជាការជំរុញឱ្យការសិក្សាមានលទ្ធផលល្អប្រសើរ។
តាមរយៈគេហទំព័រ Scholarship Region បានបង្ហាញពីគន្លឹះក្នុងការរៀនឱ្យមានប្រសិទ្ធភាព ប្រើការប្រឹងប្រែងតិច ប៉ុន្តែទទួលបានលទ្ធផលល្អ ដោយមានដូចជា ៖
រៀនពីចំណុចតូចៗ និងប្រើល្បឿនយឺតៗ ៖ ប្រសិទ្ធភាពនៃការសិក្សាមានប្រសិទ្ធភាពទៅបាន មិនមែនជាការចាប់ផ្តើមក្នុងរូបភាពធំៗ ឬក៏ការសម្រេចបាននូវលទ្ធផលធំៗ តែមួយពេលៗនោះទេ ប៉ុន្តែជាការរក្សាទម្លាប់រៀនសូត្របានជាប្រចាំ ហើយការអនុវត្តន៍ទៀងទាត់ទៅបាន លុះត្រាណាតែសកម្មភាពទាំងនោះមិនលើសពីដែនសមត្ថភាព ឬក្នុងទំហំសាមញ្ញៗ និងងាយស្រួលដើម្បីទាក់ទាញចិត្តឱ្យចង់ធ្វើ។
រៀនក្នុងរូបភាពចម្រុះ ៖ មនុស្សមានវិធីនៃការទទួលបានសារ តាមរយៈរូបភាពខុសៗគ្នា ហើយដើម្បីដឹងមួយណាឆ្លើយតបនឹងខ្លួនឯង លុះត្រាតែសាកល្បងជាមួយវិធីសាស្រ្តរៀនឱ្យបានច្រើនប្រភេទដូចជា ការស្តាប់ ការទស្សនា និងការអានជាដើម គឺដើម្បីឱ្យខួរក្បាលមានឱកាសទទួលយកព័ត៌មានចម្រុះ និងការស្វែងរកខ្លួនឯងថា តើវីធីសាស្រ្តមួយណាមានប្រសិទ្ធភាពជាងគេ ហើយនៅពេលដែលរកឃើញថាមួយណាមានប្រសិទ្ធភាពហើយ គួរបន្តអនុវត្តន៍វិធីមួយនោះ ឱ្យបានច្រើនជាងគេ។
រៀនជាមួយគ្នីគ្នា ៖ មិត្តឬមនុស្សដែលរៀនជាមួយ មិនថាតិចក្ដី ច្រើនក្ដី ទោះពួកគេជាមនុស្សដែលរៀនជាមួយគ្នា ឬក៏សាលាជាមួយគ្នាក៏ដោយ ការផ្តល់ឱកាសឱ្យខ្លួនឯងបានរៀនសូត្រជាមួយអ្នកដទៃ បានដើរតួនាទីក្នុងការជំរុញទឹកចិត្តឱ្យបន្តការសិក្សា។
អបអរពេលទទួលបានលទ្ធផលល្អ ៖ ការយកចិត្តទុកដាក់ជាមួយនឹងខ្លួនឯង ជាពិសេសអបអរនៅពេលដែលកត់សម្គាល់ថា ការសិក្សាចាប់ផ្តើមទទួលបាននូវភាពជោគជ័យ ឬក៏លទ្ធផលសមប្រកបណាមួយ គួរតែផ្តល់រង្វាន់ឱ្យខ្លួនឯង និងការអបអរដើម្បីជាសារដាស់តឿនខ្លួនឯងឱ្យខិតខំបន្ត ក៏ដូចជាការរក្សាទម្លាប់សិក្សាឱ្យបានទៀងទាត់ និងបង្កើនភាពជឿជាក់ចំពោះខ្លួនឯង៕
