ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដំណាក់កាលសិក្សានៅមហាវិទ្យាល័យមិនសាមញ្ញពេកទេ សម្រាប់សិស្សអាចរាប់បានថាជាពេលវេលាដ៏តានតឹងមួយដែលត្រូវប្រឈមមុខដើម្បីបញ្ចប់នូវជំនាញនីមួយៗបាន ក្នុងនោះក៏មានមុខវិជ្ជាលម្អិតៗតូច ដែលមានភាពចម្រុះ ដែលកត្តានេះហើយទើបជំនាញនៃការគ្រប់គ្រងពេលវេលា ជាចំណែកដ៏សំខាន់ដែលសិស្សនិស្សិតត្រូវចេះ ដើម្បីសម្រួលដល់ដំណើរជីវិតនៃការសិក្សា។
ជាទូទៅ តួនាទីរបស់សិស្សមានច្រើនដូចជា ត្រូវបង្ហាញខ្លួនក្នុងថ្នាក់រៀនឱ្យបានទៀងទាត់ និងទាន់ពេលវេលា ត្រូវមើល៍មេរៀនដើម្បីត្រៀមប្រឡង ឆ្លៀតពេលបង្កើតមិត្តភ័ក្តិ ឬរក្សាចំណងទំនាក់ទំនងក្នុងសង្គមអ្នកសិក្សា ត្រូវតែមានពេលសម្រាក និងការស្វែងរកវិធីសាស្រ្តធ្វើលំហាត់ឱ្យបានលឿនជាងមុន។ ប្រសិទ្ធភាពនៃការសិក្សា ពុំមែនជាការបន្ថែមម៉ោងរៀនតែមួយមុខនោះទេ ប៉ុន្តែជាការស្វែងយល់ពីខ្លួនឯង និងការរៀបចំកាលវិភាគ ក៏ដូចជាការគ្រប់គ្រងពេលវេលាជាដើម។ តាមរយៈគេហទំព័រ Harvard Summer School បានបង្ហាញជូនគន្លឹះមួយចំនួន ដើម្បីគ្រប់គ្រងពេលក្នុងនាមជាសិស្ស ដែលមានលម្អិតនៅខាងក្រោមនេះ ៖
១. ធ្វើតារាងបែងចែកពេល ៖ សរសេរតារាងបែងចែកពេល នឹងជួយឱ្យកាត់បន្ថយភាពភ្ញាក់ផ្អើលក្នុងការបំពេញកិច្ចការណាមួយ មិនថាជាការងារសាលា ចំណាយពេលជាមួយអាណាព្យាបាល ឬក៏ពិភាក្សាកិច្ចការក្រុមនោះទេ។ ក្រៅតែពីកាលវិភាគសាលា ដែលបានផ្តល់ឱ្យក្នុងនាមជាសិស្ស ជាមួយគ្នានោះសិស្សក៏ត្រូវមានកាលវិភាគបែងចែកពេលវេលាផ្ទាល់ខ្លួនផងដែរ ដោយមានកត់ចំណាំឱ្យច្បាស់ៗ អំពីព្រឹត្តិការណ៍ដែលគ្រោងនឹងកើតឡើង ដូចជាថ្ងៃផុតកំណត់កិច្ចការសាលា ថ្ងៃប្រឡង ការចូលរួមព្រឹត្តិការណ៍ក្នុងសង្គម រួមទាំងកាតព្វកិច្ចសំខាន់ៗដទៃទៀត ដែលផ្តល់អត្ថប្រយោជន៍ក្នុងការអភិវឌ្ឍសមត្ថភាព។
២. ការរំឮក ៖ បន្ទាប់ពីសិស្សបានបង្កើតប្រតិទិន តារាងបែងចែកពេល ឬកាលវិភាគជាក់លាក់រួចហើយ ជាជំហានបន្ទាប់គឺទុកដាក់កាលវិភាគដែលបានធ្វើរួចនៅទីតាំងណាមួយដែលផ្តល់ភាពងាយស្រួលក្នុងការទាញមកមើលពេលក្រោយ ឬក៏បិតលើជញ្ជាំង និងដាក់ក្នុងកម្មវិធីឌីជីថល ឬក៏កំណត់ម៉ោងរោទិ៍នៅលើទូរស័ព្ទដៃ។
៣. មានកាលវិភាគផ្ទាល់ខ្លួន ៖ ទំនួលខុសត្រូវរបស់សិស្សម្នាក់ៗ គឺមានភាពខុសគ្នា ដែលជាហេតុបង្ហាញឱ្យដឹងថា កាលដែលមានកាលវិភាគផ្ទាល់ខ្លួនមានសារៈសំខាន់ និងដើម្បីឱ្យប្រាកដចិត្តថា កាលវិភាគធ្វើឡើង ពិតជាឆ្លើយតបនឹងតម្រូវការផ្ទាល់ខ្លួន។ កាលវិភាគផ្ទាល់ខ្លួន មានរួមបញ្ចូលដូចជា រៀនពេញម៉ោង និងរៀនក្រៅម៉ោង ចូលរួមសកម្មភាពសង្គម ចូលរួមក្លឹបសិក្សា ការសម្រាកលម្ហែផ្ទាល់ខ្លួនជាដើម និងជ្រើសរើសពេលសិក្សាដែលទទួលបាននូវផលិតភាពខ្ពស់៕
